किङ्ग पावर स्टेडियममा आइतबार राति भएको खेलमा लिभरपूलले घरेलु टोली लेस्टर सिटीमाथि १-० को कठिन जित निकाल्दै प्रिमियर लिग उपाधितर्फ ठुलो फड्को मारेको छ। सो जितसँगै लिभरपूलको शीर्ष स्थान थप सुदृढ भएको छ भने लेस्टर सिटीको रेलिगेसन सुनिश्चित भएको छ। जितको नायक बने, चोटबाट फर्किएका ‘स्काउजर’ ट्रेण्ट एलेक्जेन्डर-आर्नोल्ड। दोस्रो हाफमा मात्र मैदान छिरेका उनले ७६औं मिनेटमा गोल गर्दै लिभरपूलका समर्थकहरूलाई खुसीयालीले झुमाएका थिए। गोलपछि आर्नोल्डले आफ्नो जर्सी खोलेर कर्नर फ्ल्यागमा राख्दै उत्सव मनाए।
अब लिभरपूलले उपाधि जित्न आर्सनलले बुधबार क्रिस्टल प्यालेससँग हार्नुपर्नेछ। यदि आर्सनलले जित्यो भने लिभरपूलले आगामी आइतबार टोटनहमलाई हराएमा घरेलु मैदान एन्फिल्डमै २० औं प्रिमियर लिग उपाधि उचाल्नेछ। यो उपाधि उनीहरूले २०१९–२० सिजनमा कोभिडका कारण दर्शकबिनाको वातावरणमा जितेका थिए।
भर्जिल भान डाइक र मोहम्मद सालाहले नयाँ सम्झौतामा हस्ताक्षर गरिसकेका छन्, तर एलेक्जेन्डर-आर्नोल्ड भने सिजन समाप्तिपछि रियल म्याड्रिडमा जाने सम्भावनामा रहेको चर्चा जारी छ। यदि उनी गए भने यो गोल र यो जित उनको विदाईका लागि ऐतिहासिक बन्नेछ।
लेस्टर सिटीका लागि यो सिजन दुःस्वप्न जस्तै रह्यो। लगातार नवौं घरेलु खेलमा पनि गोल गर्न नसक्दा उनीहरूलाई रेलिगेसनको कटु यथार्थ भोग्नुपरेको छ। रुवान भान निस्टर्रोयको प्रबन्धकीय कार्यकाल पनि यस सिजनसँगै अन्त्य हुने सम्भावना देखिएको छ। सालाहले पहिलो हाफमै दुई पोस्ट हाने भने जोटाले पनि बार हानेका थिए। अन्ततः बल एलेक्जेन्डर-आर्नोल्डको खुट्टामा पुगेको थियो, जसले हाफ-भलीमा उत्कृष्ट प्रहार गर्दै निर्णायक गोल गरे।
