इन्डियन प्रिमियर लिग (आईपीएल) २०२६ को फाइनलमा रोयल च्यालेन्जर्स बेंगलुरु (आरसीबी) सँग पराजित भएपछि गुजरात टाइटन्सको टोली एउटा ठूलो दुर्घटनाबाट जोगिएको छ । फाइनल खेलपछि नरेन्द्र मोदी स्टेडियमबाट होटल फर्कने क्रममा गुजरातका खेलाडी र सपोर्ट स्टाफ सवार बसमा अचानक सर्ट सर्किट हुँदा भित्र धुवाँ फैलिएको थियो । तर, समयमै सबैलाई सुरक्षित बाहिर निकालिएकाले ठूलो क्षति नभएको भारतीय सञ्चारमाध्यमहरुले जनाएका छन् ।
अहमदाबादको नरेन्द्र मोदी स्टेडियममा फाइनल खेलेपछि आइतबार राति गुजरात टाइटन्सको टोली बसमा चढेर होटलतर्फ जाँदै थियो । सोही क्रममा बाटोमा बसको विद्युतीय प्रणालीमा सर्ट सर्किट भई आगो लागेको थियो र हेर्दाहेर्दै बसभित्र धुवाँ भरिएको थियो ।
सुरक्षाकर्मीले सपोर्ट स्टाफलाई तुरुन्तै बसबाट बाहिर निकालेका थिए । आगो लागेपछि टोलीका सदस्यहरू करिब एक घण्टासम्म सडकमै अलपत्र परेका थिए । पछि अर्को वैकल्पिक सवारी साधनको व्यवस्था गरेर सबैलाई सुरक्षित रूपमा होटल पुर्याइयो । यस घटनामा कुनै पनि खेलाडी वा स्टाफ सदस्य घाइते भएका छैनन् ।
