एसियाली खेलकुदको महिला क्रिकेटमा स्वर्ण पदकका लागि भारत र श्रीलंका भिड्दैछन्। खेल नेपाली समयअनुसार १०ः४५ मा सुरु हुनेछ।
यो खेल सन् २०२३ को एसियाली खेलकुदको फाइनलको पुनरावृत्तिसमेत हो। त्यतिबेला भारतले श्रीलंकालाई पराजित गर्दै स्वर्ण जितेको थियो। यसपटक पनि दुवै टोली सहज जितसहित फाइनलमा पुगेका हुन्।
भारतले क्वार्टरफाइनलमा जापान र सेमिफाइनलमा बंगलादेशलाई पराजित गरेको थियो। श्रीलंकाले क्वार्टरफाइनलमा मलेसिया तथा सेमिफाइनलमा पाकिस्तानलाई हराउँदै फाइनल यात्रा तय गरेको हो।
भारत र श्रीलंकाबीच पछिल्लो भेट एक साताअघि महिला एसिया कपको फाइनलमा भएको थियो। उक्त खेलमा भारतले श्रीलंकालाई ७२ रनले पराजित गरेको थियो। भारतको ब्याटिङमा स्मृति मन्धाना र शेफाली वर्मा उत्कृष्ट लयमा छन्। शेफालीले एसियाली खेलकुदमा जापानविरुद्ध अविजित ४० रन बनाएपछि बंगलादेशविरुद्ध शतक प्रहार गरेकी थिइन्।
मन्धानाले पनि पछिल्ला खेलमा राम्रो प्रदर्शन गरिरहेकी छन्। मध्यक्रममा भने भारतले केही सुधार गर्नुपर्ने देखिन्छ। कप्तान हरमनप्रीत कौरले सेमिफाइनलमा ४० रन बनाए पनि पछिल्लो समय अपेक्षाअनुसार तीव्र गतिमा रन बनाउन सकेकी छैनन्। जी कामालिनी र भारती फुलमालीले पनि पाएका अवसरमा प्रभावशाली प्रदर्शन गर्न सकेका छैनन्। यद्यपि रिचा घोषले तल्लो क्रममा तीव्र गतिमा रन बनाउन सक्ने क्षमता राख्छिन्।
श्रीलंकाका लागि कप्तान चमारी अटापट्टु मुख्य हतियार हुन्। उनले एसियाली खेलकुदमा खेलेका दुवै खेलमा अर्धशतक बनाएकी छन्। पाकिस्तानविरुद्ध हसिनी परेराले २६ बलमा ४२ रन तथा मलेसियाविरुद्ध काभिशा दिलहारीले २७ बलमा अविजित ४४ रन बनाएपछि श्रीलंकाको शीर्ष र मध्यक्रम पनि लयमा देखिएको छ। भारतको स्पिन बलिङ श्रीलंकाका लागि चुनौती बन्न सक्छ।
दीप्ति शर्मा र एन श्री चरणीले पछिल्ला खेलमा विकेट लिएका छन्। नयाँ बलमा नन्दानी शर्माको प्रदर्शन पनि महत्वपूर्ण हुनेछ। टी-२० अन्तर्राष्ट्रियमा भारत र श्रीलंकाबीच अहिलेसम्म ३२ खेल भएका छन्। भारतले २६ खेल जित्दा श्रीलंकाले पाँच खेल जितेको छ भने एक खेल नतिजाविहीन भएको छ। श्रीलंका पछिल्ला सात टी-२० अन्तर्राष्ट्रिय खेलमा भारतसँग पराजित भएको छ।
यस एसियाली खेलकुदमा चमारी अटापट्टु र शेफाली वर्माको प्रदर्शन फाइनलमा निर्णायक बन्न सक्नेछ। अटापट्टुले दुई खेलमा ६३ र अविजित ८३ रन बनाएकी छन्। शेफालीले जापानविरुद्ध अविजित ४० तथा बंगलादेशविरुद्ध १०० रन बनाएकी छन्। दुवै टोलीले सेमिफाइनलमा आफ्नो पहिलो रोजाइको टोली उतारेका थिए र खेलाडीहरू पूर्ण रूपमा फिट छन्।
