तेस्रो प्रयागराज सिंह सुवाल स्मृति अन्तर वडा फुटसल प्रतियोगिताको सम्पूर्ण तयारी पूरा भएको छ ।

काठमाडौँ महानगरपालिका वडा नं २३ को आयोजनामा कात्तिक २२ देखि २९ गतेसम्म लैनचौर फुटसल मैदानमा प्रतियोगिता हुँदैछ ।

सो प्रतियोगितामा काठमाडौँ महानगरपालिका केन्द्रसहित २५ वडा गरी २६ टिमको सहभागिता रहनेछ ।

उद्घाटन खेल काठमाडौँ महानगरपालिका र आयोजक २३ वडा बीच हुनेछ । आयोजक वडा २३ ले बिहिबार सहभागी टिमहरुलाई बोलाएर खेल तालिका ड्र गरेको थियो ।

नकआउटको आधारमा हुने प्रतियोगितामा विजेता टिमलाई ट्रफीसहित दुई लाख रुपियाँ प्रदान गरिनेछ ।

उपविजेता टिमले एक लाख रुपियाँ प्राप्त गर्नेछ । यसैगरी, विधागततर्फ उत्कृष्ट हुने सर्वश्रेष्ठ खेलाडी, सर्वाधिक गोलकर्ता र सर्वश्रेष्ठ गोलरक्षकलाई जनही दस हजार रुपियाँले पुरस्कृत गरिनेछ ।

पहिलो संस्करणमा वडा नं १४ र दोस्रो संस्करणमा १६ ले उपाधि जितेका थिए ।