इंग्लिस प्रिमियर लिग फुटबलमा शीर्ष स्थानको म्यानचेस्टर सिटीले ४ अंकको अग्रता बनाएको छ ।
आज भएको खेलमा लिड्स युनाइटेडलाई २–१ गोल अन्तरले पराजित गर्दै ४ अंकको अग्रता बनाएको हो । ३४ खेलबाट ८२ अंक बनाउँदा दोस्रो स्थानमा रहेको आर्सनलको समान खेलबाट ७८ अंक रहेको छ ।
घरेलु मैदानमा म्यानचेस्टर सिटीलाई आज जिताउन गुन्डोगनले २ गोल गरेका थिए । लिड्सका रोड्रिगोले सान्त्वना गोल फर्र्काए ।
१९ औं मिनेटमा गुन्डोगनले गोल गर्दै सिटीलाई अग्रता दिलाएका थिए । २७ औं मिनेटमा उनै गुन्डोगनले व्यक्तिगत दोस्रो गोल गर्दा सिटीले अग्रता पनि दोब्बर बनाएको थियो । दुवै गोलमा रियाद मेहरेजले एसिस्ट गरेका थिए ।
८५ औं मिनेटमा रोड्रिगोले १ गोल फर्काएर पनि त्यो सान्त्वना गोलमा परिणत भयो । लिड्स युनाइटेड ३० अंकका साथ तालिकाको १७ औं स्थानमा छ ।
