एभिसी सिनियर महिला भलिबल च्याम्पियनसिपमा नेपाल नखेल्ने
- नेप्लेज
- |
- २०७८-०४-०१
- |
- 1725 पटक हेरिएको
फिलिपिन्समा आयोजना हुने एभिसी सिनियर महिला भलिबल च्याम्पियनसिपबाट नेपालले खेल्न नपाउने भएको छ ।
भदौ १३ देखि १८ सम्म हुने प्रतियोगितामा आयोजक फिलिपिन्सले कोरोनाका कारण नेपाललाई रेड लिष्टमा राखेपछि प्रतियोगिताबाट हटाएको हो । ।
यसको अर्थ अब प्रतियोगितामा आठ टिमको मात्र सहभागिता रहनेछ ।
यो प्रतियोगितामा सुरुवातमा १७ टिमले खेल्ने बताएपनि विचमा ५ टिमले नाम फिर्ता लिएपछि १२ टिमको नाम पक्का भएको थियो ।
तर एभिसीले तालिका सार्वजनिक गर्दा नेपालसहित जापान, हङकङ र भारतको नाम उल्लेख गरेको छैन । काेराेना महामारीका कारण नेपाललाई पनि रेड लिस्टमा राखेपछि नेपालले याे प्रतियाेगिता खेल्न नपाउने भएकाे हाे ।
नेपालले पहिलो पटक एभिसी सिनियर महिला भलिबल च्याम्पियनसिपमा सहभागिता जनाउने योजना थियो । जसका लागि महिला भलिबल टिमले तयारी पनि गरिरहेको थियो ।
सुरुवातमा चीनमा हुने भनिएको यो प्रतियोगिता विचमा फिलिपिन्समा सरेको थियो । चीनले प्रतियोगिता गर्न अस्विकार गरेपछि फिलिपिन्सले मौका पाएको थियो ।
भलिबल संघलेपनि खेलाडीले क्याम्पमा राखेर नियमित प्रशिक्षण गरिरहेको थियो । जसमा सुरुवातमा ३० खेलाडीलाई क्याम्पमा राखेको थियो ।
दोस्रो चरणमा नौ खेलाडीलाई हटाउँदै १८ खेलाडीमा झारेको थियो । प्रतियोगिताका लागि अन्तिम चरणमा १२ खेलाडी छनौट गर्ने योजना थियो ।
पछिल्लो पटक नेपाल र भारतमा कोरोनाको लहर बढ्दो भएकाले दुबै देशलाई रेड जोनमा राखेको थियो ।
जसका कारण पनि बिहिबार एभिसीले नेपालसँग भारतलाई पनि प्रतियोगितामा सहभागिताका लागि समावेश नगरेको हो ।