नेपाल क्रिकेट संघ क्यानको चैत २९ गते बसेको बोर्ड बैठकले मे १५ तारिखसम्ममा खेलाडीको नयाँ केन्द्रीय सम्झौताको प्रतिवेदन पेश गर्न भन्दै उपाध्यक्ष राजुबाबु श्रेष्ठको संयोजकत्वमा तीन सदस्यीय समिति बनाएको थियो ।

तर मे महिना सकिएर जुन लाग्दा पनि सो समितिले प्रतिवेदन बुझाउनु त परै जाओस सामान्य छलफल पनि गर्न सकेको छैन । क्यानले समिति बनाएको केहि सातामा नै नेपालमा कोरोना महामारीको दोस्रो लहर सुरु हुँदा निषेधाज्ञा भयो भने क्यानले आफ्ना सबै कामहरु प्रतिकुल अवस्था भनेर बन्द नै गर्‍यो । अहिले निषेधाज्ञा हुँदा समितिमा रहेका राजुबाबु श्रेष्ठ र सञ्जयराज सिंह काठमाडौंमा नै भए पनि भेट्ने अवस्था छैन ।

समितिका अर्का सदस्य प्रशान्तविक्रम मल्ल भने भैरहवामा रहेका छन् । सो समितिले अनलाइनबाट यो विषयमा छलफल गर्ने भने पनि सबै डकुमेन्ट क्यानको कार्यालयमा रहेको र अहिले जाने अवस्था पनि नरहेकाले काम गर्न कठिन भएको समितिका संयोजक तथा उपाध्यक्ष श्रेष्ठले बताए । उनले भने ‘हामीले क्यानले तोकेको समयमा काम सक्ने तयारीमा थियौं, निषेधाज्ञाका कारण काम हुने सकेन ।’

यसअघि पनि क्यानले महिला र पुरुष खेलाडीको श्रेणी बर्गीकरण गर्दा निकै आलोचना पनि खेप्नु परेको थियो । शुरुवातमा बर्गीकरणमा रहेका खेलाडीको नाम सार्वजनिक गर्दा आलोचना भएर दोस्रो पटक सच्याउनुपर्ने बाध्यता आइलागेको थियो ।
६ महिनाका लागि गरिएको सम्झौता सकिएर पनि खेलाडीले तलव पनि पाइसकेका छन् ।

तर २०२१ का लागि क्यानले नयाँ सम्झौता गर्ने भनेको पाँच महिना वित्दा पनि गर्न सकेको छैन । यो सम्झौता अझै कहिले हुन्छ भन्ने विषयमा समितिका सदस्य मल्लले जेठ महिनासम्ममा सबै तयार हुने बताउँछन् । उनले भने ‘अहिले सबै कुरा कोभिडका कारण सरेकाले त्यसको असर हाम्रो कमिटीको काममा पनि परेको छ र क्यानले तोकेको समयमा नभए पनि अब जेठ महिना भित्र यसको टुंगो लगाउँछौं ।’

क्यानले श्रेष्ठ नेतृत्वको समितिलाई १८ जना महिला र १८ जना पुरुष खेलाडी छनोट गरेर प्रतिवेदन तयार पार्न भनेको थियो । केन्द्रीय सम्झौताका लागि एक्स्पर्ट (विज्ञ)का रुपमा दुई जना सदस्यलाई राख्न पाउने भनिएकाले क्यानका क्रिकेट म्यानेजर बिनोद दाशलाई पनि यसमा समावेश गरिएको छ ।

अहिले समितिले क्रिकेट म्यानेजर दाशलाई यसको खाका तयार पार्नका लागि जिम्मेवारी दिएको छ । उनले पनि केहि खाका तयार पारेको बताए । नयाँ केन्द्रीयसम्झौता हुँदा कुन मोडलमा गर्ने भन्ने अहिले मुख्य चुनौती रहेको छ । घरेलु र अन्तर्राष्ट्रिय प्रदर्शन, अनुशासन लगायतका बुँदालाई समावेश गरिने छ । नयाँ सम्झौता हुँदा यस अगाडिको जस्तो आलोचना नहुने किमिमले काम गर्न जरुरी पनि देखिएको छ । कोभिडकै बीच नेपालमा नै भएको त्रिकोणात्मक सिरिजमा केहि युवा खेलाडीले उत्कृष्ट प्रदर्शन गरेका छन् ।

जो यसअघिको क्यानको केन्द्रीयसम्झौतामा रहेका थिएनन् । त्यसैले पनि यो पटकको केन्द्रीय सम्झौतामा खेलाडी परिवर्तन हुने पक्का जस्तै छ ।

२०२० को बर्गिकरण यस्तो थियो ।
पुरुष खेलाडी
श्रेणी ए : ज्ञानेन्द्र मल्ल, पारस खड्का, सन्दीप लामिछाने, शरद भेषवाकर, करण केसी, बसन्त रेग्मी, दीपेन्द्रसिंह ऐरी, विनोद भण्डारी र सोमपाल कामी

श्रेणी बी : सुशन भारी, पवन सराफ, आरिफ शेख, अभिनाश बोहरा, र ललितनारायण राजवंशी

श्रेणी सी : सुवास खकुरेल, रोहित पौडेल, राशिद खान, कमलसिंह ऐरी र सन्दिप जोरा
यो सूचीबाट नयाँ बर्गिकरण (२०२१) हुँदा कुशल भुर्तेल र आशिफ शेख भित्रिने संभावना देखिएको छ । यसका साथै तीन श्रेणीमा केहि हेरफेर हुने संभावना छ ।

महिला खेलाडी

श्रेणी ए :  नेरी थापा, रुवीना क्षेत्री, सीता रानामगर, करुणा भण्डारी र इन्दु बर्मा
श्रेणी बी :  अप्सरी बेगम, ज्योती पाण्डे, रोमा थापा, कविता जोशी, सरस्वती चौधरी, सरिता मगर, रितु कनोजिया र काजल श्रेष्ठ
श्रेणी सी : अनुराधा जोशी, सोनु खड्का, अञ्जली चन्द, शोभा आले, ममता चौधरी, सुमन खतिवडा, कविता कुँवर र डली भट्ट

यसअघिको सम्झौतामा २२ खेलाडी राखिएकोमा नयाँ सम्झौता हुँदा मात्र १८ जना हुने भएकाले महिला र पुरुष दुवै तर्फ चार चार जनाको संख्या कटौटी हुने छ ।

हेराैं याे भिडियाेमा