अध्यक्ष कप भलिबल प्रतियोगिताको उपाधि जुफाल युवा क्लबलाई
- नेप्लेज
- |
- २०७८-०६-०२
- |
- 804 पटक हेरिएको
डोल्पाको ठुलीभेरी नगरपालिका–८ ले आयोजना गरेका पुरुष जिल्लास्तरीय अध्यक्ष कप भलिबल प्रतियोगिताको उपाधि जुफाल युवा क्लबले जितेको छ ।
भाद्र पूर्णिमाको अवसरमा भदौ २८ देखि सुरु भएको अध्यक्ष कपका लागि दर्ता भएका १३ टिमलाई पछि पार्दै जुफाल युवा क्लबले एक लाख १५ हजार ५५५ नगदसहित ट्रफी र प्रमाणपत्र हात पारेको हो ।
वडा नं ८ को खेलकूद मैदानमा आज भएको फाइनल खेलमा सूर्यमुखी युवा क्लब ल्हाँलाई हराउँदै जुफाल युवा क्लब विजेता घोषणा भएको हो । त्यसैगरी सूर्यमुखी युवा क्लब दोस्रो भएर रु ७५ हजार ५५५, ट्रफीसहित प्रमाणपत्र हात पारेको छ ।
त्यसैगरी मुड्केचुला युवा क्लब तृतीय भएर रु ५१ हजार ५५५ नगदसहित प्रमाणपत्र पाएको छ । सहभागी १० वटै समूहलाई रु तीन हजार ५०० र प्रमाणपत्र प्रदान गरिएको कार्यक्रम संयोजक मनराम ठकुल्लाले बताए।
उत्कृष्ट खेलाडीका रूपमा जुफाल युवा क्लबका सुवास शाही र अनुशासित खेलाडीका रूपमा आयोजक समूहका खेलाडी चन्द्रप्र्रसाद डाँगीलाई पाँच हजार ५५५ र प्रमाणपत्र प्रदान गरिएको छ ।
कोभिड महामारीलाई मध्यनजर राख्दै उच्च सतर्कता अपनाउन खेलमा उपस्थित सम्पूर्ण खेलाडी र दर्शकलाई मास्क तथा स्यानिटाइजर वितरण गरिएको आयोजकले जनाएको छ ।