काठमाडौंमा जारी टिआईए अन्तरविद्यालय बास्केटबल प्रतियोगिताको चौथो दिन ९ खेल सम्पन्न भएको छ ।

बुढानिलकण्ठस्थित टिआईएको कोर्टमा भएको दिनको अन्तिम खेलमा एचएचसीए ए लाई ४८–३९ को स्कोरमा हराउँदै आयोजक टिआईए छात्र ए क्वाटरफाइनलमा पुगेको छ । टिआईएको जितमा बर्दान थापाले १२ स्कोर गरे । यसअघि दिनको पहिलो खेलमा भ्याली पब्लिकले टिआईए छात्रा ए लाई ४१–१९ स्कोरले हरायो।

दोस्रो खेलमा दिक्षालयले निम्सलाई ३३–१२ को स्कोरमा हरायो। यस खेलमा दीपसिखाले १९ स्कोर गरिन् । छात्रातर्फ नै तेस्रो खेलमा मिल्सबेरीलाई हिम रश्मिले १९–० को स्कोरमा हरायो । यस खेलमा हिम रश्मिको खुसीले सर्वाधिक ६ स्कोर गरिन् ।

छात्रातर्फ चौथो खेलमा एनसीसीएसले चाँदबागलाई १६–१४ को स्कोरले हरायो । यस खेलमा एनसीसीएसका लागि गरिमा महर्जनले सर्वाधिक ८ स्कोर गरिन् । छात्रातर्फ अन्तिम खेलमा डाफोडिलले ज्ञानोदयलाई २२–१० को स्कोरले हरायो।

छात्रतर्फ रोमाञ्चक खेलमा विल्सनलाई ज्ञानोदयले ३५–३३ को स्कोरदे हरायो । ग्रिनल्याण्डले आयोजक टिआईए बी लाई ५८–२४ को स्कोरले पराजित गर्यो। गिनल्यान्डको जितमा सुरेश बिसिले १५ स्कोर गरे । डाफोडिलले काष्ठमन्डपलाई १९–८ को स्कोरमा पारजित गरेको हो ।