विश्वकप छनोट : यमनमाथि साउदी अरबको फराकिलो जित
- नेप्लेज
- |
- २०७८-०२-२३
- |
- 321 पटक हेरिएको
फिफा विश्वकप फुटबलको एशियाली छनोटमा साउदी अरबले अपराजित यात्रा कायमै राखेको छ ।
अहिलेसम्म ६ खेल खेल्दा सउदीले चार खेलमा जित र दुई खेलमा बराबरी गर्दै १४ अंकका साथ समूह डी मा आफूलाई शीर्ष स्थानमा राखेको छ । दोस्रो स्थानमा रहेको उज्बेकिस्तानको ९ अंक रहेको छ ।
शनिबार राति साउदी अरबले यमनमाथि ३–० गोल अन्तरको जित दर्ता गरेको हो । साउदीको जितमा फहद मौसेद अल मुवल्लाद अल हरबीकले २ गोल गर्दा सलेम मोहम्मद अल दौसारीले एक गोल गरेका थिए । खेल शुरु भएको चौथो मिनेटमा दौसारीले गोल गर्दै साउदीलाई अग्रता दिलाएका थिए ।
१७ औं मिनेटमा हरबीकले अग्रता दोब्बर बनाएका थिए । उनैले ३२ औं मिनेटमा व्यक्तिगत दोस्रो तथा टिमका लागि तेस्रो गोल गरेका थिए । पहिलो हाफमै ३ गोल गरेको साउदीले दोस्रो हाफमा भने थप गोल गर्न सकेन । पराजित भएको यमनले ६ खेल खेल्दा ५ अंक जोडेको छ भने तालिकाको पाँचौं स्थानमा रहेको छ ।