पाकिस्तानलाई हराउँदै भारतले जित्यो साफको उपाधि

  • Image नेप्लेज
  • १ मंसिर २०८३, मङ्गलवार
  • 73 पटक हेरिएको
पाकिस्तानलाई हराउँदै भारतले जित्यो साफको उपाधि

काठमाडौं । पाकिस्तानलाई २–१ गोलले पराजित गर्दै भारतले साफ च्याम्पियनसिप फुटबलको उपाधि जितेको छ ।

मंगलबार ढाकास्थित राष्ट्रिय रङ्गशालामा भएको रोमाञ्चक फाइनलमा एक गोलले पछि परेको अवस्था उल्टाउँदै भारतले कीर्तिमानी दसौँ पटक उपाधि जितेको हो ।

भारतको जितमा सुहैल भट्ट र सन्दीप मण्डीले गोल गरे । पाकिस्तानका लागि आलमगीर गाजीले एक गोल गरेका थिए । खेलको पहिलो हाफको अतिरिक्त समयमा आलमगीर गाजीले गोल गर्दै पाकिस्तानलाई अग्रता दिलाएका थिए ।

पहिलो हाफमा एक गोलले पछि परेको भारतले दोस्रो हाफमा उत्कृष्ट पुनरागमन गर्‍यो । खेलको ५९औँ मिनेटमा जुनैद शाहले रातो कार्ड पाएपछि पाकिस्तान १० खेलाडीमा सीमित भयो । त्यसको एक मिनेटपछि नै भारतका सुहैल भट्टले गोल गर्दै खेललाई १–१ को बराबरीमा ल्याए । खेलको ८८औँ मिनेटमा सन्दीप मण्डीले कर्नरबाट आएको बललाई हेडरमार्फत जाली चुमाएपछि भारतले २–१ को अग्रता बनायो । बाँकी समयमा पाकिस्तानले बराबरी गोल गर्न सकेन ।

यस जितसँगै भारतले लगातार तेस्रो पटक साफ च्याम्पियनसिपको उपाधि जितेको छ । भारतले यसअघि सन् १९९३, १९९७, १९९९, २००५, २००९, २०११, २०१५, २०२१ र २०२३ मा उपाधि जितेको थियो ।

साफ च्याम्पियनसिपको इतिहासमा भारत सबैभन्दा सफल टोली हो । पाकिस्तान भने पहिलो पटक फाइनलमा पुगेर पनि उपविजेतामा सीमित भएको छ । एक गोलले पछि परेको अवस्थामा खेलमा फर्कँदै अन्तिम समयमा निर्णायक गोल गर्न सफल भारतले आफ्नो उपाधि सङ्ख्या १० पुर्‍याएको छ ।