काठमाडौं । नेपाल प्रिमियर लिग (एनपीएल) मा जनकपुर बोल्ट्सविरुद्ध काठमाडौं गोर्खाजले टस जितेको छ ।
त्रिवि अन्तर्राष्ट्रिय क्रिकेट मैदानमा काठमाडौं गोर्खाजका कप्तान करण केसीले टस जितेर पहिले ब्याटिङ गर्ने निर्णय गरेका हुन् । योसँगै जनकपुर बोल्ट्सले सुरुमा बलिङको निम्तो पाएको छ ।
काठमाडौं जितबाट सिजनको सुरुवात गर्ने दाउमा हुनेछ । जनकपुर बोल्ट्स भने दोस्रो खेलमा पहिलो जित निकाल्ने रणनीतिमा हुनेछ । जनकपुर बोल्ट्स पहिलो खेलमा कर्णाली याक्ससँग १९ रनले पराजित भएको थियो । काठमाडौं गोर्खाजको भने यस सिजनको पहिलो खेल हो । त्यसैले काठमाडौंविरुद्ध मैदान उत्रिँदा जनकपुर बोल्ट्समाथि जितको यात्रामा फर्किने दबाब हुनेछ ।
यसअघि एनपीएलका दुई संस्करणमा जनकपुर र काठमाडौंले एकअर्काविरुद्ध एक-एक जित निकालेका छन् । एनपीएलको पहिलो संस्करणमा जनकपुर बोल्ट्सले काठमाडौं गोर्खाजमाथि ५ विकेटको जित निकालेको थियो ।
दोस्रो संस्करणमा भने काठमाडौं गोर्खाजले जनकपुर बोल्ट्समाथि ५ विकेटकै जित निकालेको थियो । एनपीएलको यो तेस्रो भेटमा जित निकाल्दै दुवै टिमलाई अग्रता लिने अवसर छ ।
