बङ्गलादेशका क्रिकेट खेलाडी साकिब अल हसनले विद्यार्थी नेतृत्वको आन्दोलनका क्रममा मौन बसेकोमा माफी मागेका छन्। उनले अपदस्थ प्रधानमन्त्री शेख हसिनाको पार्टीका सदस्यहरूमध्ये एकको रूपमा प्रदर्शनकारीहरूमाथि घातक प्रहरी दमन र हत्याको अनुसन्धानको सामना गरिरहेका छन्।

साकिब, जसले सन् २०२४ मा संसदीय निर्वाचनमा सांसदको रूपमा चयनित भएका थिए, अगस्टमा हसिनाको राजीनामापछि संसद विघटन नभएसम्म र अशान्तिको समयमा भारतमा निर्वासित भएका थिए। बुधबार, उनले आफ्नो आधिकारिक फेसबुक पृष्ठमा एक लामो नोट लेख्दै प्रदर्शनका क्रममा नबोलेकोमा माफी मागेका हुन्।

उनले लेखेका छन्, “आफ्नो जीवन उत्सर्ग गर्ने सबै विद्यार्थीहरूप्रति म श्रद्धाञ्जलि अर्पण गर्दछु।” उनले मृतकका आफन्तजनप्रति समवेदना प्रकट गर्दै, “कुनै पनि कुराले कसैलाई गुमाउनुको रिक्ततालाई भर्न सक्दैन, तर मेरो मौनताबाट आहत भएका सबैसँग म क्षमा याचना गर्दछु। यदि म तपाईंको ठाउँमा भएको भए म पनि दुःखी हुने थिएँ।”

बङ्गलादेशको स्वास्थ्य मन्त्रालयका अनुसार, हसिनालाई सत्ताच्युत गर्नुअघि भएको अशान्तिमा ७०० भन्दा बढी व्यक्तिको मृत्यु भएको थियो। आन्दोलनको समयमा साकिब क्यानडामा घरेलु ट्वेन्टी–२० क्रिकेट प्रतियोगिता खेलिरहनुभएको थियो र त्यसपछि उनी बङ्गलादेश फर्किएका छैनन्।

हसिनाको बहिर्गमनपछि देशमा गठित अन्तरिम सरकारले उनलाई बङ्गलादेशी टोलीसहित पाकिस्तान र भारतको भ्रमण गर्न अनुमति दिएको थियो। साकिबले जनवरीमा सम्पन्न निर्वाचनमा सांसद निर्वाचित भएका थिए, जसमा हसिनाका विरोधीहरूले बहिष्कार गरेका थिए।

उनले आफ्नो गृहनगरको विकासमा योगदान गर्न चाहेको कारण चुनाव लड्ने निर्णय गरेको बताएका थिए। उनले भने, “यदि आफ्नो तोकिएको स्थान छैन भने बङ्गलादेशमा विकासमा प्रत्यक्ष भूमिका निर्वाह गर्न कठिन छ।”

गत महिना, साकिबले अन्तर्राष्ट्रिय क्रिकेटबाट सन्यासको घोषणा गरेका थिए। तर यसै महिनाको अन्त्यमा दक्षिण अफ्रिकासँग आफ्नो अन्तिम टेस्ट श्रृङ्खला खेल्न चाहेको बताएका छन्। उनले आफ्नो फेसबुक पोस्टमा लेखेका छन्, “आफ्ना सबै प्रशंसकहरूसँग ‘बिदाइ’ हुने अवसर मेरो इच्छा हो। मलाई आशा छ कि मेरो बिदाइको घडीमा तपाईंहरू सबै मेरो साथमा हुनुहुनेछ।”