काठमाडौं । जारी एभरेस्ट महिला भलिबल लिगमा बुधबार पनि तीन खेल हुने भएको छ।

खेल त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा हुने दिनको पहिलो खेलमा  ललितपुर क्विन्स र कर्णाली यश्विज आफ्नो विजयी यात्रालाई तेस्रो खेलसम्म पनि कायम राख्ने लक्ष्यमा हुनेछन्। 

यो खेल दिउँसो ३ः४५ बजेबाट सुरु हुनेछ।

ललितपुर दुई खेलमा ६ अंकका साथ शीर्षस्थानमा छ। यसअघि ललितपुरले काठमाडौं स्पाइकर्स र मधेश युनाइटेडलाई समान ३–१ को सेटमा पराजित गरेको थियो।

समान खेलबाट कर्णाली पाँच अंकका साथ दोस्रो स्थानमा छ। यसअघि कर्णालीले मधेशलाई ३–१ तथा गण्डकी थन्डर्सलाई ३–२ को सेटमा पराजित गरेको थियो।

यसैगरी ४ः४५ मा काठमाडौंले गण्डकी तथा ७ः४५ मा चितवनले मधेशको सामना गर्नेछ।

काठमाडौं र चितवन दोस्रो तथा गण्डकी र मधेश पहिलो जितको लक्ष्यमा हुनेछन्। ललितपुरसँग पराजित काठमाडौंले चितवनलाई हराएको थियो। गण्डकी चितवन र कर्णालीसँग पराजित भएको थियो।