समाचारकाे सुरूमा हेराै जाँदाजाँदै उमेश पटवालले के भने

नेपाली क्रिकेटको मुख्य प्रशिक्षकमा करिव १० महिना सेवा गरेका भारतीय प्रशिक्षक उमेश पटवालले नेपाललाई अन्तिम खेलमा कीर्तिमानी जीत दिलाएर फर्किने भएका छन् । अमेरिकाविरुद्ध नेपालले ऐतिहासिक जित निकाल्दा प्रशिक्षक पटवालका लागि पनि गौरव गर्ने पक्ष थियो । त्यसैले त उनले खेल सकिएपछि आफ्नो कार्यकाल सुखद् रहेको र नेपाली युवा खेलाडीले धेरै मौका पाएको र नयाँ कीर्तिमान पनि बनाएको उल्लेख गरे । जसमा उनले अमेरिकाविरुद्धको खेलका साथै कुशल मल्लको कीर्तिमान, रोहित पौडेलको कीर्तिमान लगायतका पक्षहरु सम्झिए ।

नेपालले एकदिवसिय मान्यता पाएपछि मुख्य प्रशिक्षकका रुपमा उमेशको प्रशिक्षणमा नेपालले पहिलो अन्तराष्ट्रिय एकदिवसिय सिरीज खेल्यो । जसमा नेपालले दुई खेलमा जीत र दुईमा हार ब्यहोर्यो । तर उनको नेपालका लागि अन्तिम खेल भने ऐतिहासिक नै बन्यो ।

करिव १० महिना अगाडी सो बेलाका मुख्य प्रशिक्षक जगत टमाटाको स्थानमा आइसीसीले राष्ट्रिय खेलकुद परिषद्सँगको समन्वयमा पटवाललाई नेपालको प्रशिक्षकका रुपमा पठाएको थियो । त्यसअघिपनि पटवालले सल्लाहकार प्रशिक्षकका रुपमा नेपाली टिमलाई हेर्दा नेपालले यूएई विरुद्ध टी २० र एकदिवसिय सिरीज जितेको थियो ।

तर जब उनी मुख्य प्रशिक्षकका रुपमा नेपाल आएको पहिलो दिन नै केहि निराशा भोग्नु पर्यो । उनको प्रशिक्षकको घोषणा कार्यक्रमको आयोजना हुँदा अन्तिम समयमा राष्ट्रिय खेलकुद परिषद्ले बहिस्कार गर्यो । सो बेलाका परिषद्का सदस्यसचिवले अन्तिम समयमा कार्यक्रममा नआउने भनेका थिए ।

त्यसपछि परिषद्ले केहि दिनपछि पटवाललाई त्रिपुरेश्वरमा नै बोलाएर आधिकारीक सम्झौता गरेको थियो । जगत टमाटाको स्थानमा उनी नेपाली क्रिकेट टिमको काम सम्हालेपछि जुन किसिमको उचाई नेपाली टिमले लिने सोचाई राखिएको थियो, त्यो पक्कैपनि लिन सकेन । त्यसमा उनी दोशी भन्दापनि नेपाली क्रिकेट अभिभावक निकाय नहुँनाले पनि हो ।

प्रशिक्षक भएपछि उनले मलेसिया विरुद्धको दुई टी २० सिरीजको प्रतियोगिता जितेपनि सिंगापुरमा भएको टी २० विश्वकप छनोटमा निकै खराव प्रदर्शन टिमले गरेको थियो । कतार र सिंगापुरसँग हार्नु नेपालका लागि विश्वकप खेल्ने सपना चकनाचुर भएको थियो ।

त्यसपछि नेपाली टिमले बंगलादेशमा भएको एसीसी इमर्जिङ कप खेलेको थियो । जसमा नेपाल समुह चरणबाट नै बाहिरीयो । यस्तै एक दशक भन्दा लामो समयपछि घरेलु मैदानमा तीनदिवसिय खेलमा पनि नेपालले राम्रो नजिता निकाल्न सकेन ।

ओमानमा भएको पाँच देश सहभागि टी २० सिरीजमा पनि नेपालले खासै राम्रो गर्न सकेन । सो प्रतियोगितामा नेदरल्याण्ड्सलाई हराउँनु नेपालका लागि ठुलो उपलब्धि बन्यो । आरल्याण्डसँगपनि जितको नजिक पुगेर पराजित भएको थियो । ओमानसँग पनि निकै खराव प्रदर्शन गर्न पुग्यो । त्यसअघि सिंगापुरमा भएको टी २० सिरीजमा नेपालले सिंगापुरलाई हराएपनि जिम्बावेसँग पराजित हुन पुगेको थियो । टी २० मा नेपालले प्रशिक्षक पटवाल आएपछि २३ वटा अन्तराष्ट्रिय खेल खेल्यो । जसमा ११ खेलमा मात्र जित निकाल्यो ।

सिंगापुरमा भएको टी २० विश्वकपको क्षेत्रीय छनोटमा नेपालले राम्रो गर्न नसकेपछि पटवालले दिएको अभिब्यक्ति केहि विवादित बन्यो । उनले सो बेला नेपालको क्रिकेटको अवस्थालाई मध्यनजर गरेर नेपाली टिममा विश्वकप खेल्ने क्षमता नभएको बताएका थिए । जसलाई केहिले विरोधपनि गरे । उनमाथि स्पष्टिकरण लिनुपर्छपनि भनेर पनि भने ।

स्पष्ट र प्रष्ट बोली बोल्ने पटवालका बारेमा केहि सकारात्मक बोलि बोल्दा केहि आलोचना गर्नेपनि छन । पटवाल नेपालमा आउँदा नेपालको ब्याटिङमा निकै सुधार होला भन्ने ठुलो अपेक्षा थियो । तर सोचेको जस्तो उचाई नेपालले लिन सकेन । उनी प्रशिक्षक भएर आएपछिको ठुलो सेटब्याक टी–२० विश्वकप छनोट खेल्न नसक्नु नै हो ।

नेपालको प्रशिक्षकका रुपमा पटवालले विश्वकप क्रिकेट लिग दुई अन्तिम प्रतियोगिता बनाए । प्रतियोगिताको दुई दिन अगाडी उनले राजिनामा दिएको खबर बाहिर आएपछि एकाएक क्रिकेट जगतमा ठुलो तरंग छायो । जसले अबको प्रशिक्षक को, किन प्रतियोगिताको मुखैमा राजिनामा दिएको, प्रशिक्षकको राजिनामा पछि टिमको मनोबल कस्तो होला लगायतका प्रश्नहरु उब्जिए । तर यस्तै खुलदुलीका विच नेपालले घरेलु मैदानमा पहिलो अन्तराष्ट्रिय एकदिवसीय प्रतियोगिता खेल्यो । जसमा चार खेलमा दुईमा जित र दुई हार ब्यहोर्यो ।

प्रशिक्षक पटवालले नेपाललाई घरेलु मैदानमा सुखद नतिजा दिलाएर गएका छन । जाँदाजाँदै उनले भने– टिममा सायद कमब्याक गर्ने मौका पाउनेछु । टिमका केटाहरु एकदमै एक्टिभ छन् । म पारसदेखि सुरु गर्न चाहन्छु ज्ञानु पनि उत्कृष्ट छन् । नामेवियासँगको खेलमा नेपाली टिमले राम्रो नतिजा निकाल्नेछ भन्ने मैले विश्वास लिएको छु । नेपाल क्रिकेटमा मेरो योगदानबारे मलाई भन्दा तपाइहरुलाइ धेरै थाहा छ । हामीसँग टिममा नयाँ खेलाडीले राम्रो खेले यसको मतलब उसले सँधै राम्रो गर्नुपर्छ भन्ने छैन । नेपाल जस्तो टिमलाई धेरै प्रगति गर्न जरुरी छ कहिले प्रदर्शन राम्रो हुन्छ भने कहिले खस्कन्छ । अन्य देशसँग तुलना गर्नुभन्दा आफुमा राम्रो हुनु आवश्यक छ । मेरो कामप्रति म सँधै खुसी छु र नेपाली टिमलाई सकेजति दिएजस्तो लाग्छ ।

अब पटवालले नेपाली क्रिकेटको प्रशिक्षकमा आउने मौका पाउलान नपाउलान त्यो भविष्यले बताउनेछ । तर तत्कालको अर्को प्रश्न नेपाली क्रिकेटलाई राम्रोसँग हेर्नसक्ने क्रिकेट विकाशका काम गर्नसक्ने प्रशिक्षक को होला भन्ने छ ।