फिफा क्लब विश्वकप २०२५ को तयारी तीव्र गतिमा अघि बढेको छ । 

आउँदो १४ जुनदेखि १३ जुलाई २०२५ सम्म संयुक्त राज्य अमेरिकामा आयोजना हुने फिफा क्लब विश्वकपमा विश्वभरका ३२ उत्कृष्ट क्लबहरूले प्रतिस्पर्धा गर्दै छन् । यो प्रतियोगिता ११ शहरका १२ स्टेडियममा हुनेछ, जसमा उद्घाटन खेल मियामीको हार्ड रक स्टेडियममा इन्टर मियामी र अल अहलीबीच हुने पक्का भएको छ । फाइनल खेल भने १३ जुलाईमा न्यू जर्सीको मेटलाइफ स्टेडियममा हुनेछ ।

यो वर्षको क्लब विश्वकप नयाँ ढाँचामा आयोजना हुँदैछ । ३२ टोलीलाई ८ समूहमा विभाजन गरिएको छ ।  प्रत्येक समूहका शीर्ष दुई टोली नकआउट चरणमा प्रवेश गर्नेछन् । कुल ६३ खेलहरू हुने यो प्रतियोगितामा युरोपबाट रियल म्याड्रिड, म्यानचेस्टर सिटी, चेल्सी, दक्षिण अमेरिकाबाट बोका जुनियर्स, रिभर प्लेट, र एसियाबाट अल हिलालजस्ता टोलीहरू सहभागी छन् । आयोजक राष्ट्रको प्रतिनिधिको रूपमा इन्टर मियामीले स्थान पाएको छ, जसमा स्टार खेलाडी लियोनेल मेस्सीको उपस्थितिले प्रशंसकहरू उत्साहित छन् ।

तर, यो प्रतियोगिता विवादमुक्त भने छैन । इन्टर मियामीको छनोट र टिकट बिक्रीको कमजोर अवस्थाले आलोचना भइरहेको छ । उद्घाटन खेलका टिकटहरू ४० डलरबाट सुरु भए पनि बिक्री अपेक्षाकृत कम भएको फिफाले जनाएको छ ।  

प्रतियोगिताको कुल पुरस्कार राशि १ अर्ब अमेरिकी डलर छ ।