दोस्रो एसकेबिसी बागमती प्रदेश आमन्त्रित तेक्वान्दो प्रतियोगिताको उपाधि ढल्को तेक्वान्दो डोजाङले जितेको छ। टोखा नगरपालिकाको बसुन्धारास्थित हेराल्ड इन्टरनेसनल कलेजमा आयोजित प्रतियोगितामा ढल्कोले ७ स्वर्ण, ५ रजत र ३ कास्य जितेर टिम च्याम्पियन बन्यो।

आयोजक एसकेबिसी तेक्वान्दो क्लब ५ स्वर्ण, ३ रजत र १० कास्यसहित दोस्रो भयो। बालाजु तेक्वान्दो डोजाङले ४ स्वर्ण, ३ रजत र ६ कास्यसहित तेस्रो स्थान हासिल गर्‍यो।

पुरुषतर्फ जैशीदेवल तेक्वान्दो डोजाङका रावलहाङ लिम्बू र महिलातर्फ गोर्खाली तेक्वान्दो डोजाङकी प्रतिमा भुजेल उत्कृष्ट खेलाडी घोषित भए। एसकेबिसीका सुवास बोहरा उत्कृष्ट प्रशिक्षक र कुमार लावत उत्कृष्ट निर्णायक चुनिए। उत्कृष्ट सबैलाई ओप्पो मोबाइल पुरस्कार प्रदान गरियो।

विजेताहरूलाई टोखा नगरपालिका वडा ५ का अध्यक्ष मदन गुरुङलगायतले पुरस्कृत गरे। गुरुङले प्रतियोगितालाई निरन्तरता दिन वार्षिक बजेट विनियोजन गर्ने प्रतिबद्धता जनाए।

टोखा नगरपालिकाको मुख्य प्रायोजनमा भएको प्रतियोगितामा बागमती प्रदेशका १८ डोजाङ र क्लबबाट ५०० सिनियर/जुनियर खेलाडी सहभागी थिए। प्रतियोगिता संयोजक रञ्जित डंगौराले च्याम्पियनसिपलाई वार्षिक रूपमा आयोजना गर्ने लक्ष्य रहेको बताए।