काठमाडौं । नेपाल प्रिमियर लिग एनपीएलको ट्रफी सार्वजनिक गरिएको छ । प्रधानमन्त्री केपी शर्मा ओलीले मंसिर १५ गतेदेखि पुस ६ गतेसम्म आयोजना हुन लागेको एनपीएलको ट्रफी सार्वजनिक गरेका हुन् । 

काठमाडौंको सुनधारास्थित धरहरा परिसरमा एक समारोहकाबीच ट्रफी सार्वजनिक गरिएको हो ।

कार्यक्रममा नेपाल क्रिकेट संघ क्यानका सचिव पारस खड्काले नेपाली खेलकुदलाई नयाँ अध्यायमा लैजानका लागि सरकारले गरिरहेको  सहयोगको लागि धन्यवाद दिए ।

सिद्धार्थ बैंक एनपीएलको ट्रफी आफैमा विशेष रहेको बताउँदै यो एनपीएल प्रतियोगिताले अन्तर्राष्ट्रिय स्तरमा पनि चर्चा पाउने बताए । 

ट्रफीमा सर्वोच्च शिखर सगरमाथाको काख कालापत्थरबाट ल्याएको ढुंगा प्रयोग गरिएको छ भने यसमा निकुञ्ज बन जंगलको पनि समिश्रण रहेको पनि बताए । उक्त पत्थर पवर्तारोही निमा शेर्पा र मिंगमा तेन्जी शेर्पाले ल्याएका थिए ।

ट्रफी सार्वजनिक समारोहलाई सम्बोधन गर्दै प्रधानमन्त्री केपी शर्मा ओलीले आजको दिन नेपाली खेलकुद क्षेत्रका लागि विशेष महत्वको दिन रहेको बताए । ऐतिहासिक र गौरवपूर्ण धरहराको काखमा नेपाल प्रिमियर लिगको ट्रफी अनावरण गर्दा खेलकुदमा नयाँ जाँगर भरेको पनि बताए ।

नेपाली क्रिकेट इतिहासको विशाल एवं उमंगमय पर्व एनपीएल भएको पनि बताए । अहिलेको पुस्ताले नेपाली खेलाडीहरुको मेहनत र सफलतालाई अंगालेका छन् । क्रिकेट नेपाली युवा पुस्ताको सपना र गौरबको रुपमा रहेको छ । यो खेलमात्रै नभएर अनुशासनको मानक पनि भए । आफूले आयरल्याण्डका खेलाडीलाई आशिफ शेखले रन आउट नगरेर स्पोर्टस म्यानसिपको उत्कृष्ट नमुनाको भिडियोको चर्चा गरे । यसैगरी करण केसीको भ्यालेन्टाइन ब्वाए नामको बारेमा पनि चर्चा गरे । यसैगरी कुशल भुर्तेल बलर कि ब्याटर भनेर प्रश्न गर्दै शतक प्रहार गर्न आग्रह गरे ।

चितवन राइनोजका विषयमा आफूले चितवन गैडाज भनेर सम्बोधन गरे । चितवन गैंडाजका कुशल मल्ललको पनि आगामी दिनमा थप चर्चा हुने विश्वास गरे ।

लुम्बिनीका कप्तान रोहित पौडेलको नाउँ सुन्दा नै आफूलाई गर्व लाग्ने बताए । उनलाई जसले जिते पनि देशले जितेको महसुस हुने बताए ।

विराटनगरका कप्तान सन्दीप लामिछानेलाई नेपाली क्रिकेटको ब्राण्ड एम्बास्डर भन्दै नेपालीले चान्स पायो कि डान्स गर्छ भन्दै प्रशंसा गरे ।

कर्णाली याक्सका सोमपाल कामीको योर्करबारे पनि चर्चा गर्दै सफलताको  शुभकामना दिए । यसैगरी कर्णाली याक्सले भारतका गब्बर (शिखर) धवनको आगमनले झनै उमंग थपेको बताए ।

सुदूरपश्चिमका दीपेन्द्रसिंहको बारेमा प्रशंसा गर्दै उनका कीर्तिमानहरुबारेमा चर्चा गरे । देशको प्रधानमन्त्री भएकाले आठ वटै टिमको समर्थन र सद्भाव रहने बताए । पहिला सबैलाई शुभकामना दिने तर जितेपछि बधाई दिन्छु ।  यसैगरी क्यानलाई महिला फ्रेन्चाइज क्रिकेट पनि आयोजना गर्नका लागि आग्रह गरे ।

कार्यक्रममा युवा तथा खेलकुद मन्त्री तेजुलाल चौधरीले देश विदेशमा एनपीएलको चर्चा र परिचर्चा भएको प्रति खुसी व्यक्त गरे । एनपीएल अब आर्थिक, खेल पर्यटनको उद्योगको रुपमा अघि बढ्ने विश्वास व्यक्त गर्दै सहयोग हुने प्रतिवद्धता व्यक्त गरे । 

राखेपका सदस्यसचिव टंकलाल घिसिङले पुराना मान्यतालाई भत्काएर नयाँ मान्यता स्थापित गर्नका लागि एनपीएल सफल हुनेमा विश्वास व्यक्त गरे । प्रतियोगिताका लागि राखेपले सदा साथ दिने पनि प्रतिवद्धता जनाए ।

एनपीएलमा ८ टिमले सहभागीता जनाएका छन् ।

समरोहमा प्रधानमन्त्री ओलीका साथै, युवा तथा खेलकुदमन्त्री तेजुलाल चौधरी, राखेप सदस्य सचिव टंकलाल घिसिङ, क्यानका अध्यक्ष चतुरबहादुर चन्द लगायत खेल पदाधिकारी र खेलाडीहरुको उपस्थिीति रहेको थियो ।