जेभियर इन्टरनेसनल कलेज प्रथम अन्तरकलेज छात्रा बास्केटबल प्रतियोगितामा बुधबार सेमिफाइनलमा प्रवेश गरेको छ ।

प्रोफेसनल एडुकेसन कन्सल्टेन्सी (पीइसी) द्वारा आयोजित प्रतियोगितामा जेभियरले अत्तिरिक्त समयमा रातो बंगलालाई ३०–२१ ले पराजित ग¥यो । जेभियरकी पेम्बा डोमा शेर्पाले १९ अंक जोडिन् । जितसंगै जेभियर समूह ‘ए’ को विजेता बन्यो । हारका बावजुद रातो बंगला पनि समूह उपविजेता हुँदै सेमिफाइनलमा पुग्न सफल भयो ।

सानागाउँस्थित रोयल स्पोर्ट्स सेन्ट्रलको कोर्टमा भइरहेको प्रतियोगितामा गोल्डेनगेट इन्टरनेसनल कलेजले ल्यान्डमार्क एकेडेमीलाई ३८–१२ ले हराउदै सेमिफाइनलमा पुग्यो । विजयी टिमका लागि श्रेया गुरुङले १० स्कोर  गरिन् । गोल्डेनगेट समूह ‘बी’ को विजेता भयो । ल्यान्डमार्क पनि समूह उपविजेता बन्दै सेमिफाइनलमा प्रवेश ग¥यो ।

अर्को महत्वहीन खेलमा कान्जिरोवाले ट्रिटन इन्टरनेसनल कलेजलाई ३३–११ ले पाखा लगायो । कान्जिरोवाकी अनिशा बोहराले २० अंक जोडिन् ।
यससंगै सेमिफाइनल समीकरण तयार भएको छ । सेमिफाइनल जेभियर र ल्यान्डमार्क तथा गोल्डेनगेट र रातो बंगलाबीच हुनेछ । सेमिफाइनल शुक्रबार हुनेछ ।