इंग्ल्याण्डविरुद्धको दोस्रो एक दिवसीय क्रिकेटमा दक्षिण अफ्रिका ५ विकेटले विजयी भएको छ । योसँगै ३ खेलको एक दिवसीय सिरिजमा दक्षिण अफ्रिकाले सिरिज एक खेल अगावै कब्जा गर्न सफल भयो । इंग्ल्याण्डले दिएको ३४३ रनको विशाल लक्ष्य दक्षिण अफ्रिकाले ४९.१ ओभरमा ५ विकेट गुमाएर पूरा गर्न सफल भयो । 

टस हारेर पहिला ब्याटिङ गरेको इंग्ल्याण्डले निर्धारित ओभरमा ७ विकेट गुमाएर ३४२ रन बनाएको थियो । उसका लागि जोस बटलरले नटआउट ९४ रनको पारि खेल्दा हेरी ब्रुकले ८० रन बनाएका थिए ।

यसैगरी मोइन अलिले ५१ रन जोड्दा साम कुरानले २८ रन जोडेका थिए । बेन डकेटले २० रन बनाउँदा क्रिस वोक्सले १४  तथा डेभिड मलानले १२ रन बनाए । जोसन रोयको ब्याटबाट ९ रन बन्दा ३४ रन अतिरिक्त पनि पाएको थियो । दक्षिण अफ्रिकाका एनरिच नोट्जले सर्वाधिक २ विकेट लिए । यसैगरी वेन परर्नेल, लुंगी एनगिडी, मार्को जेनसन, केशव महाराज र एडेन मार्करमले एक एक विकेट लिए ।

३४३ रनको लक्ष्यसहित मैदान उत्रिएको दक्षिण अफ्रिकालाई कप्तान टेम्बा बमुभाको शतकीय पारि महत्वपूर्ण रह्यो । उनले १०९ रनको शतकीय पारि खेले । यसैगरी एडेन मार्करमले ४९ रन जोड्दा डेभिड मिलरले ५८ रनको नटआउट पारि खेले । यस्तै माक्रो जेनसनले पनि नटआउट ३२ रनको योगदान गर्दा रसे भान डर डुसेनले ३८ रन जोडे । क्विन्टन डीककले ३१ रन बनाएका थिए ।

इंग्ल्याण्डका लागि ओले स्टोन र आदिल रसिदले दुई दुई विकेट लिए । सामकरणको नाममा १ विकेट रह्यो । दक्षिण अफ्रिकाले पहिलो खेल २७ रनले जितेको थियो । आजको जितसँगै दक्षिण अफ्रिकाले २–० को अग्रता लिँदै सिरिज भने कब्जा गरेको छ ।