बैतडीको  दशरथचन्द नगरपालिकामा जारी नगरस्तरीय  महिला टि–२०   क्रिकेट प्रतियोगिताको सेमिफाइनल समिकरण पुरा भएको छ ।  दनपा १० बाराकोटले दनपा ५ दशरथचन्दलाई ६ विकेटले हराएर सेमिफाइनल पुग्ने अन्तिम टोली बनेको छ । यसअघि दनपा २ देहिमाडौं, दनपा ६ थालिगडा र दनपा ८ त्रिपुरा सेमिफाइनलमा पुगिसकेका छन् ।  

दशरथचन्दले दिएको ११७ रनको लक्ष्य बाराकोटले १७ दशमलब २ ओभरमा ४ विकेटको क्षतीमा पुरा गर्यो ।  जसमा करिश्मा बुडालले अविजित  १९ रनको योगदान गरिन् ।  दशरथचन्दका लागि संगिता चन्दले २ विकेट हात पारिन् ।  
त्यसअघि निंगलाशैनी क्रिकेट मैदान देहिमाडौंमा पहिला ब्याटिंग  गरेको दशरथचन्दले निर्धारित २० ओभरमा ७ विकेटको क्षतीमा ११६ रन बनायो ।  उसका लागि ममता लेखकले ३९ रनको योगदान गरिन् ।  बाराकोटका रितु बुडाल र रिया धामीले दुई दुई विकेट हात पारे । रितु ओम्यान अफ द म्याच भएकी स्कोरर द्रोपती कुँवरले जानकारी दिइन् ।     

यसैबीच प्रतियोगिताका सेमिफाइनलका खेलहरु सोमबार हुनेछन् ।  पहिलो सेमिफाइनलमा दनपा २ देहिमाडौं र दनपा ६ थालिगडा  भिड्दा, दोस्रो सेमिफाइनलमा दनपा ८ त्रिपुरा   र दनपा १० बाराकोट आमने सामने हुनेछन् ।
देहिमाडौं समूह ए को विजेता बन्दै सेमिफाइनल पुगेको हो भने थालिगडा समूह बी को उपविजेता बन्दै अन्तिम चारमा सुरक्षित भएको हो ।  यसका साथै दनपा ८ त्रिपुरा समूह बी को विजेता बन्दै सेमिफाइनलमा सुरक्षित भएको हो भने बाराकोट समूह ए को  उपविजेताको रुपमा सेमिफाइनलमा पुगेको हो ।    

दशरथचन्द नगरपालिकाको वार्षिक कार्यक्रम र नगरखेलकुद विकास समितिको आयोजनामा माघ ९ गतेदेखि शुरू  भएको  हो ।  सहिद दिवसको पूर्वसन्ध्यामा  सहिद दशरथचन्दको जन्मनगरमा आयोजित प्रतियोगिता माघ १७ गते सम्पन्न हुनेछ ।
नगरका ७ टोलीको सहभागिता रहेको प्रतियोगिताको प्रथम पुरस्कार  नगद २५ हजार, ट्रफि,मेडल र प्रमाण पत्र,द्धितिय  पुरस्कार नगद १५ हजार, ट्रफि मेडल र प्रमाण पत्र रहेको  दशरथचन्द नगर खेलकुद विकास समिति अध्यक्ष भुपेन्द्र चन्दले  जानकारी दिनुभयो ।

यस्तै प्रतियोगितामा ओमेन अफ द सिरिजलाई ३ हजार, बेष्ट बलर र बेष्ट व्याट्स ओमेलनलाई  १५÷१५ सय, अनुशासीत टिमलाई ३ हजार र ओमेन अफ म्याचलाई ट्रफि प्रमाण पत्र दिइने जनाइएको  छ ।  
प्रतियोगिताको समापनको दिन दशरथचन्द नगरपालिकाभित्र रहेका अन्तर्राष्ट्रिय खेलाडीलाई दोसल्ला र कदरपत्रसहित सम्मान गरिने जनाएको छ ।
यस्तै यस प्रतियोगितामा सहभागी खेलाडीको हौसला बढाउन प्रत्येक खेलमा   खाजा खर्च स्वरुप जनही  १५० का दरले खेलाडीलाई नगद दिने गरिएको छ ।
यसअघि नगरपालिकाले ब्याडमिन्टनका राष्ट्रिय खेलाडीलाई पनि सम्मान गरेको थियो। खेलकुद क्षेत्रलाई प्राथमिकतामा राखिएको र महिलाहरुको क्रिकेट खेलतर्फ  रुची बढाएर दक्ष खेलाडी उत्पादन गर्ने हेतुले  प्रतियोगिताको आयोजना गरिएको   दशरथचन्द नगरपालिकाका प्रमुख पुस्करराज जोशी लख्खाभाईले बताउनुभयो ।
निकट भविष्यमै नगरपालिकाले सबै खेलकुद प्रतियोगिता सञ्चालन गर्ने तयारी गरेको नगर खेलकुद विकास समिति अध्यक्ष चन्दको भनाइ छ ।