भारतीय क्रिकेट कन्ट्रोल बोर्ड बीसीसीआईले आसन्न इन्डियन प्रिमियर लिग क्रिकेटमा मुख्य मुख्य खेलाडीलाई खेल्न नदिने भएको छ।

पछिल्लो समय खेलाडीहरु लगातार घाइते भएकाले र यसै वर्षको अक्टोबरमा विश्वकप पनि रहेको भन्दै मुख्य मुख्य खेलाडीहरुलाई खेल्न रोक्ने निर्णय भएको हो। मुम्बईमा भएको बीसीसीआइको समिक्षा बैठकले विभिन्न निर्णयहरु लिएको छ।

खेलाडीहरुको ‘वर्कलोड म्यानेजमेन्ट’ गर्ने विषयमा महत्पूर्ण छलफल भएको भारतीय सञ्चारमाध्यमहरुले जनाएका छन्। मुम्बई बैठकमा टोलीका कप्तान रोहित शर्मा, प्रशिक्षक राहुल द्रविड, बीसीसीआई अध्यक्ष रोजर बिन्नी, बीसीसीआई सचिव जय शाह, छनोट समितिका पूर्व अध्यक्ष चेतन शर्मा र एनसीए प्रमुख भीभीएस लक्ष्मणको उपस्थिति थियो।

एकदिवसीय विश्वकप पनि यसै वर्षको अक्टोबरमा हुने भएको छ। यस्तो अवस्थामा बीसीसीआईले आईपीएलमा प्रमुख खेलाडीलाई आराम दिन सक्छ। यस बैठकमा २०२२ मा भारतीय टोलीको प्रदर्शनको बारेमा पनि छलफल भएको थियो। दक्षिण अफ्रिका र इङ्ल्यान्डसँगको शृङ्खलाको हार र टी–२० विश्वकपमा भारतको सेमिफाइनलमा हारको कुरा पनि चर्चाको विषय बनेको छ।

भारतका धेरै प्रमुख खेलाडीहरु यो वर्ष चोटको सामना गरिरहेका छन्। यस्तो अवस्थामा यो भेटमा चोटको बारेमा निकै चर्चा भएको जनाइएको छ। बंगलादेशसँगको एकदिवसीय शृंखलामा भारतको पराजयपछि कप्तान रोहित शर्माले ठूला खेलाडीको चोटबारे बताएका थिए। उनलाई खेलाडीहरु फिट भएर पनि बारम्बार किन घाइते भइरहेका छन् भनी सोधिएको थियो। जवाफमा रोहितले भनेका थिए, ‘हामीले प्रयास गर्नुपर्छ र यसको तलसम्म पुग्नु पर्छ। मलाई थाहा छैन यो के हो। सायद उनीहरू धेरै क्रिकेट खेलिरहेका छन्। हामीले प्रयास गर्नुपर्छ र खेलाडीहरुमा नजर राख्नु पर्छ। किनभने यो। यो बुझ्नु महत्त्वपूर्ण छ कि जब तिनीहरू भारतका लागि आउँछन्, तिनीहरू पूर्ण रूपमा फिट हुन आवश्यक छ।’

सन् २०२२ को अधिकांश समय दीपक चाहर घाइते भए। जसप्रित बुमराह ढाडको समस्याबाट क्रमश ठिक हुँदैछन्। रविन्द्र जडेजा खुट्टाको चोटबाट निको भइरहेका छन्। चिकित्सक टोलीले यी सबै खेलाडीलाई कार्यभार व्यवस्थापनका बारेमा प्रस्तुति दिएको थियो।

मुम्बई बैठकले गरेका निर्णयहरु 

बैठकमा टोलीका महत्वपूर्ण खेलाडीलाई चोट लाग्ने सम्भावना देखिए आइपिएलबाट टाढा राख्ने निर्णय भएको छ।

२० खेलाडीको पूल बनाइएको छ, जसमध्येबाट एकदिवसीय विश्वकपको टोली छनोट गरिनेछ।

नयाँ खाकाअनुसार खेलाडीको सेन्ट्रल पूलका लागि फिटनेस र वर्कलोड रोडम्याप तयार गरिनेछ, जसका लागि काम सुरु भइसकेको छ।

खेलाडीहरूको फिटनेसको सही जानकारी प्राप्त गर्न यो–यो टेस्टसँगै डेक्सा स्क्यान पनि थप्न सिफारिस गरिएको छ। डेक्सा स्क्यानबाट खेलाडीको हड्डीको बल थाहा हुन्छ।

डेक्सा स्क्यान शरीरको संरचना र हड्डीको बल मापनको लागि अन्तर्राष्ट्रिय मानक हो। यो १०–मिनेट परीक्षण हो जसले शरीरको कुल बोसो र हड्डी र मांसपेशी बल मापन गर्दछ।

राष्ट्रिय टोलीमा पर्नका लागि घरेलु क्रिकेटमा युवा खेलाडीले पर्याप्त क्रिकेट खेल्नुपर्ने पनि बैठकमा बताइएको छ। यसअघि आइपिएलमा चम्कने खेलाडीले सिधै भारतीय टोलीमा स्थान पाउँछन्।

आईपीएलको दोस्रो चरण २०२१ को टी–२० विश्वकप अघि खेलिएको थियो। जसमा वेंकटेश अय्यर र वरुण चक्रवर्तीले उत्कृष्ट प्रदर्शन गरे र कोलकाताको टोली पनि फाइनलमा पुग्यो। त्यसको लगत्तै दुवै खेलाडीलाई टी–२० विश्वकपका लागि भारतीय टोलीमा मौका दिइयो र दुवैले निकै निराश बनाए।

भारतको हारमा दुवैको महत्वपूर्ण योगदान थियो। यस कारणले अब राष्ट्रिय टोली छनोटको लागि आईपीएल मात्रै मापदण्ड नरहने निर्णय गरेको छ।