प्रदेश एकमाथि गण्डकीको रोमाञ्चक जित, फाइनलमा पुग्ने एक टिमको टुंगो अन्तिम खेलले लगाउने
- नेप्लेज
- |
- २०७८-०८-१६
- |
- 695 पटक हेरिएको
हाइलाइट्स
- अब शुक्रबार हुने बागमती र सुदुरपश्चिम प्रदेशविचको खेलले फाइनलमा पुग्ने दोस्रो टिमको टुंगो लगाउनेछ । सो खेलमा सुदुरपश्चिम जितेको खण्डमा उसले फाइनलमा स्थान बनाउने छ भने बागमतीले जितेको खण्डमा रनरेटका आधारमा दोस्रो टिमको टुंगो लाग्नेछ ।
प्रदेश एकमाथि गण्डकी प्रदेशले एक विकेटको रोमाञ्चक जित निकालेको छ । यो जितसँगै गण्डकी प्रदेशले फाइनलको आशालाई जिवितै राखेको छ । हारपछि प्रदेश एकको फाइनल पुग्ने संभावना अब अरु टिमको खेलको नजितामा भरपर्ने भएको छ । यता जितपछि गण्डकीले पनि फाइनलको दावेदारीता पेश गरेको छ ।
प्रदेश एकको हारले अब फाइनलमा पुग्ने दोस्रो टिमका लागि सुदुरपश्चिम, प्रदेश एक र गण्डकी विच होड चलेको छ । तीनै टिमको समान ६–६ अंक भएको छ । तर रनरेटका आधारमा सुदुरपश्चिम दोस्रो स्थानमा छ । अब शुक्रबार हुने बागमती र सुदुरपश्चिम प्रदेशविचको खेलले फाइनलमा पुग्ने दोस्रो टिमको टुंगो लगाउनेछ । सो खेलमा सुदुरपश्चिम जितेको खण्डमा उसले फाइनलमा स्थान बनाउने छ भने बागमतीले जितेको खण्डमा रनरेटका आधारमा दोस्रो टिमको टुंगो लाग्नेछ ।
कीर्तिपुर मैदानमा टस जितेर पहिले ब्याटिङ गरेको प्रदेश एकले ४४ ओभर चार बलमा एक सय ३३ रनमा अलआउट भयो ।
खराव सुरुवात गरेको प्रदेश एकले मात्र चार रन हुँदा पहिलो विकेट गुमायो । त्यसपछि प्रदेश एकको स्कोर ३० रन हुँदा महत्वपुर्ण चार विकेट गएको थियो । उसका लुभ कामतले खाता खोल्न सकेनन् भने अंकित सुवेदी एक रनमा आउट भए ।
चौथो विकेटका लागि सोनु मण्डल र बिबेक मेहताविच ३३ रनको साझेदारी भएको थियो । त्यो नै उसका पारीमा भएको उच्च साझेदारी थियो । जसमा विवेकले १४ रन बनाए भने सोनु मन्डलले ११ जोडे ।
यस्तै राकेश शाहले पाँच, सिमरन राईले आठ विकेट लिए । प्रदेश एकका लागि दिपेश कँडेलले सर्वाधिक ४६ रन बनाए । बलिङमा कमल परियारले तीन तथा सुदिप अर्यालले दुई विकेट लिए ।
जवाफमा गण्डकी प्रदेशले ३८ ओभरमा नौं विकेट गुमाउँदै लक्ष्य पुरा गर्यो । सुरुवात खराव गरेको गण्डकीले चार रनमा पहिलो विकेट गुमायो । उसका ओपनर उत्सभ श्रेष्ठ मात्र चार रनमा पेभेलियन फर्किए ।
दोस्रो विकेटका लागि अर्जुन कुमाल र दिपक डुर्मेविच ६७ रनको साझेदारी भएपछि टिम सम्हालिएको थियो । जसमा दिपकले ३३ रन बनाए । त्यसपछि अर्जुनपनि ब्यक्तिगत ३५ रनमा आउट भएपछि गण्डकीले ९७ रनमा तेस्रो विकेट गुमायो । त्यसको केहि बेरमा विष्णु पाण्डेपनि मात्र दुई रनमा आउट भए । त्यो बेला गण्डकीको स्कोर एक सय ६ रन थियो । तर त्यसपछि उसले अरु ६ रन स्कोरबोर्डमा जोड्दा थप चार विकेट गुमायो ।
उसका विष्णु पाण्डे दुई, सुजल गौतम एक, सुवास भण्डारी र सन्देश सुनार र कमल परियारले खाता खोल्न सकेनन् । अन्तिममा किरन पौडेल र सुदिपले निकै धैर्यताका साथ ब्याटिङ गर्दा टिमलाई हारको नजिक पुगेरपनि जित दिलाए । जसमा सदिपले १९ बल खेल्दा दुई रन बनाए भने किरनले २४ खेलमा १२ रन बनाए ।
बलिङमा दिपेश कँडेलले चार तथा लभ कामतले तीन विकेट लिए ।