स्पेनीस क्लव रियल मड्रिडको होम ग्राउण्ड स्तादियो सान्टियागो बेर्नाबेउको निर्माणको काम अझै केहि समय लाग्ने भएकाले यसले आगामी सिजनका लागि घरेलु मैदान एट्लेटिको मड्रिड मैदान वाडा मेट्रोपोलिटानोलाई बनाउनेमा सकारात्मक देखिएको छ ।

मार्काले जनाएअनुसार नयाँ सिजनमा रंगशालामा दर्शकको उपस्थिती सहित लिग हुने तयारी हुँदा रियलले आफ्नो होम मैदानका रुपमा एट्लेटिकोको रंगशालालाई प्रयोग गर्न सक्ने संभावना रहेको छ । २० देखि ३० हजार राखेर खेल खेल्नका लागि रियलको घरेलु मैदान तयार नहुने र अघिल्लो सिजन खेलेको मैदानको विकल्प खोजिरहेको बताइएको छ ।

सन् २०२० मा आफ्नो मुख्य रंगशाला पुर्ननिर्माण गर्न सुरु गरेपछि रियलको टिम प्रशिक्षण मैदानमा गएको थियो । जहाँ उसले सिजनको अधिकांश खेल खेलेको थियो । त्यो बेलापनि एट्लेटिको मड्रिडले रियललाई आफ्नो मैदान प्रयोग गर्न सक्ने भन्दै सकारात्मक कदम चालेको थियो । तर रियलले प्रशिक्षण गर्ने मैदानलाई प्रयोग गर्ने निधो गरेको थियो ।

अहिलेपनि एट्लेटिको रियललाई आफ्नो मैदान प्रयोग गर्न दिनेमा सहमत नै रहेको छ । यता रियलपनि सो मैदानलाई होम ग्राउण्डका रुपमा खेल्नका लागि केहि सकारात्मक देखिएको बताइएको छ । यतिबेला रियलले आफ्नो घरेलु मैदानलाई मल्टि प्रपोज र अत्याधुनिक बनाउने क्रममा छ ।