मैत्रीपुर्ण खेल र फिफा विश्वकप छनाैटका लागि नेपाली टिम आजराति जाँदै
- नेप्लेज
- |
- २०७८-०२-११
- |
- 799 पटक हेरिएको
इराकसँगको मैत्रीपुर्ण खेलका साथै फिफा विश्वकप छनौटका लागि नेपाली टिम आज राती इराक प्रस्थान गर्दैछ । फिफाकाे सहयाेगमा कतार एयरवेजकाे चार्टडबिमानबाट नेपाली टिम इराक जान लागेकाे हाे ।
जेठ १५ गते अर्थात शनिबार हुने मैत्रीपुर्ण खेलका लागि नेपाली टिम मंगलबार इराक जान लागेको हो । इराकसँगको मैत्रीपुर्ण खेलपछि नेपाली टिम आइतबार सडकको बाटो भएर कुवेत प्रस्थान गर्नेछ । याे टुरका लागि जान लागेकाे टिमका २३ खेलाडी र १२ अफिसियलको कोरोना रिपोर्ट नेगेटिभ आएको छ । आज राती १० बजे कतार एयरवेजको विमानबाट दोहा हुँदै इराक जाने नेपाली टिमलाई लामाे प्रयासपछि एन्फाले पठाउन लागेकाे हाे ।
नेपालले इराकसँगकाे मैत्रीपुर्ण खेलपछि फिफा विश्वकप छनौट खेल्नेछ । जसमा नेपालले जुन तीन अर्थात जेठ २० गते चाइनीज ताइपेइसँग जुन सात अर्थात जेठ २५ गते जोर्डन र जुन ११ अर्थात जेठ २८ गते अष्ट्रेलियासँग छनौट खेल खेल्नेछ ।
यो टिममा राष्ट्रिय खेलकुद परिषद्का सदस्यसचिव रमेश सिलवालपनि जाने भएका छन । प्रशिक्षक अब्दुल्लाह अल्मुताइरीको प्रशिक्षणमा नेपालले पहिलो पटक अन्तराष्ट्रिय प्रतियोगिता खेल्न लागेको हो । यसपटक प्रशिक्षक अब्दुल्लाहले टिममा ६ जना नयाँ अनुहारलाई मौका दिएका छन । नेपाली टिमका लागि बलिया टिमसँगको खेल राम्रो म्याच एक्पोजर हुने अपेक्षा गरिएको छ ।
विश्वकप छनौटमा नेपालले अहिलेसम्म पाँच खेल खेल्दा एकमा जित र चार हार ब्यहोरेको छ । नेपालको विश्वकप छनौटको अर्को चरणमा जाने संभावना निकै कम भएकाले पनि प्रशिक्षक अब्दुल्लाहले युवा खेलाडीलाई एक्पोजर दिनका लागि नै मौका दिएका हुन । यसपटको टिममा युवा खेलाडीमा ए डिभिजन नखेलेका खेलाडीले पनि मौका पाएका छन ।
जसमा सुरज जिउ ठकुरी, कमल थापा, गौतम श्रेष्ठ, आयुष घलान र मनिष डाँगी पहिलो पटक राष्ट्रिय टिममा परेका छन् । नेपाली टिमका नियमित सदस्य भरत खवास, रंजित धिमालसहित अमित तामाङ, सेसेहाङ आङदेम्बे, रबि पासवान, निशान खड्का, विवेक बस्नेत, नितिन थापा र दर्शन गुरुङ टिमबाट बाहिरिएका छन् ।
नेपाली राष्ट्रिय फुटबल टिम :
गोलरक्षक : किरण चेम्जोङ, विशाल सुनार, दीप कार्की
डिफेन्डर : रोहित चन्द, अनन्त तामाङ, दिनेश राजवंशी, गौतम श्रेष्ठ, सुमन अर्याल, विकास खवास
मिडफिल्डर : सन्तोष तामाङ, सुमन लामा, सुनिल बल, सुरज जिउ ठकुरी, पुजन उपरकोटी, आयुष घलान, विशाल राई, मनिष डाँगी, एरिक विष्ट, कमल थापा,
फरवार्ड : अभिषेक रिजाल, अन्जन विष्ट, नवयुग श्रेष्ठ, आशिष लामा