नेप्लेज । छत्रसाल स्टेडियममा जुनियर गोल्ड मेडलिस्ट पहलवान सागर राणाको हत्या आरोपमा भारतका लागि ओलम्पिकमा गोल्ड मेडल जितेका सुशील कुमार पक्राउ परेका छन् ।

उनलाई ६ दिन हिरासतमा राख्न भनिएको छ । सुशील कुमार भारतीय खेलाडीमा सवैभन्दा विवादास्पद खेलाडी हुन भन्दा पनि हुन्छ । उनी र विवादको साइनो निकै पुरानो रहेको भारतीय सञ्चारमाध्यमहरुले नै लेखेका छन् । सुशीलसँग विवाद हुँदा ओलम्पिकमा मेडल जितेका योगेश्वर दत्त, वल्र्ड रेस्लिङ च्याम्पियनसिपमा मेडल जितेका बजरंग पूनिया तथा अन्य केही रेस्लिङ (कुस्ती) खेलाडीले छत्रसाल स्टेडियम छोडेर गएका थिए ।

ओलम्पियन सुशील कुमार ६ दिनका लागि पुलिस हिरासतमा

नरसिंह यादव र सुशीलको विवाद भारतीय कुस्तीमा चर्चाको विषय नै बनेको थियो । २०१८ मा नेशनल छनोटका बेला प्रविण राणा र उनका भाइलाई कुटपिट गरेको आरोपमा सुशीललाई कारबाहीको माग गर्दै पुलिसमा आरोप पत्र दर्ता पनि भएको थियो ।

नरसिंहको सुशीलमाथि गम्भीर आरोप

सन् २०१६ मा रियो ओलम्पिकका लागि ७४ किलोमा नरसिंह यादव र २ पटकका ओलम्पिक मेडलिस्ट सुशील कुमार दावेदार थिए । सुशील ओलम्पिक क्वालिफायर्सको छनोटमा सहभागि हुन पाएनन् ।

त्यसपछि नरसिंहलाई ओलम्पिक क्वालिफायर्समा पठाइएको थियो । नरसिंहले ओलम्पिकमा स्थान पनि बनाउन सफल रहेका थिए । नेशनल रेसलिंग फेडरेशन अफ इन्डिया (डब्लयूएफआई)को नियम अनुसार जो खेलाडीले यो क्याटेगोरीमा कोटा हासिल गर्न सक्छ त्यही खेलाडी ओलम्पिकमा भारतबाट खेल्छ भनिएको थियो ।

सुशीलले भने आफू दुई पटकको मेडलिस्ट भएकाले आफूले नै त्यो मौका पाउनु पर्ने दावी गरेका थि ए । यो विषयमा सुशीलले अदालतमा गुहार लगाए पनि उनको मुद्दा नै अदालतले खारेज गरेको थियो ।त्यसपछि नरसिंहले छत्रसालमा नभई सोनीपत स्पोर्टस अथोरिटी अफ इन्डिया एसएआईमा अभ्यास शुरु गरेका थिए ।

ओलम्पिकको १० दिन पहिला नरसिंहले नेशल एन्टी डोपिङ एजेन्सी नाडाका तर्फबाट पठाएको स्याप्ल पोजेटिभ आयो । तर, नाडाले उनलाई क्लिन चीट दिएको थियो । उनलाई वल्र्ड एन्टी डोपिङ एजेन्सी (वाड)ले नरसिंहलाई ओलम्पिकमा सहभागीता जनाउन त दिएन नै साथ साथै चार वर्षको प्रतिबन्ध पनि लगाएको थियो ।

यो विषयमा नरसिंहले खुलेरै सुशील माथि गम्भीर आरोप लगाए । सुशीलको इशारामा आफूलाई फसाईएको नरसिंहले बताएका थिए । उनले सोनिपतमा आफूले गरिरहेको अभ्यासका क्रममा खानामा सुशीलले केही मिसाएर गएका कारण आफू डोपिङमा परेको बताएका थिए । यो विषयमा भारतीय प्रधानमन्त्रीले नै पहल गर्दै घटना जाँच गर्नका लागि कमिटी गठन गरिएको थियो । नरसिंहलाई फसाए पनि सुशीललाई भने इन्डियन ओलम्पिक एसोसिएशन ओलम्पिकमा पठाउन अस्वीकार गरेको थियो ।

पहलवान प्रवीण कुमारसँगको कुटपिट प्रकरण

सुशीलको नाम सन् २०१७ को रेसलर प्रवीण राणासँगको कुटपिट प्रकरणमा पनि आएको थियो । त्यतिबेला दिल्लीको इन्दिरा गान्धी इन्डोर स्टेडियममा २०१८ को गोल्ड कोस्ट कमनवेल्थ गेमका लागि छनोट गरिएको थियो । यो छनोटमा सुशीलको भिडन्त उदाउँदो रेसलर प्रवीण राणासँग भएको थियो । त्यतिबेला सुशीलका समर्थकहरुले प्रवीण र उनका भाईमाथि हातपात गरेका थिए । उनीहरुले सुशीलकै ईशारामा यो घटना भएको भन्दै प्रहरीमा उजुरी पनि दिएका थिए ।

ओलम्पिक पदक विजेता योगेश्वरसँग पनि झगडा

लण्डन ओलम्पिकमा सुशीलसँगै कास्य पदक जितेका योगेश्वरसँग पनि उनको विवाद भएको थियो । योगेश्वर छत्रसाल स्टेडियममै अभ्यास गर्ने गरेका खेलाडी हुन् । सुशीलसँगको विवाद र लण्डन ओलम्पिकपछि छत्रसाल स्टेडियम नै छाडेका थिए । योगेश्वर र सुशील पहिला भने राम्रा साथीको रुपमा रहेका थिए ।

जीतेन्द्र र प्रवीण दुवै ७४ किलो वेट क्याटेगोरीका खेलाडी हुन् । दुवै जनाले सुशीललाई आदर्श मान्ने गरेका थिए र सार्वजनिकरुपमै उनीहरुले सुशीलको पाउ छुने पनि गरेका दृश्यहरु सार्वजनिक भएका थिए । त्यसका साथै वल्र्ड रेस्लिङ च्याम्पियनसिपमा मेडल जिति सकेका बजरंग पूनिया पनि सुशीलसँगकै विवादका कारण छत्रसाल स्टेडियम छाडेर गएका थिए । पुनियाले अहिले टोकियो ओलम्पिकका लागि स्थान पक्का गरिसकेका छन् ।

२०१९ को वल्र्ड च्याम्पियनसिपको छनोटमा जीतेन्द्रसँग विवाद

२०१९ को वल्ड च्याम्पियनसिपका लागि भएको छनोटमा सुशीलमाथि पहलवान जीतेन्द्रले आफूलाई जानी जानी आँखामा हानेको आरोप लगाएका थिए । २०१९ मा इन्दिरा गान्धी स्टेडियममा भएको छनोटको फाइनलमा जीतेन्द्र र सुशील भिडेका थिए ।

सुशीलले कुस्तीका बेला जीतेन्द्रको औठामा चोट लगाइदिएका थिए । त्यसपछि बायाँ आखामा मुड्कीले प्रहार गरेका थिए । जीतेन्द्रले त्यतिबेला एक न्यूज एजेन्सीसँगको कुराकानीमा त्यो चोट पछि केही बेर आखाँ नै देख्न नसकेको बताएका थिए । तर, चोट लागे पवनि जीतेन्द्रले अन्तिमसम्म सुशीलसँग फाइट गरेका थिए ।

प्रशिक्षक रामफल र वीरेन्द्र सिंहले पनि छाडे

सुशीलको विवाद खेलाडीसँग मात्रै सिमित थिएन । उनको व्यवहारका कारण उनका प्रशिक्षकहरु पनि हैरान नै थिए । फलस्वरुप उनीहरुले सुशीलको मात्रै साथ छोडेनन् छत्रसाल स्टेडिम नै छाडेका थिए । लण्डन ओलम्पिकपछि प्रशिक्षक रामफल छत्रसाल स्टेडियम छोडेर गएका थिए । त्यसको ६ महिनापछि सुशीलको खास मानिने प्रशिक्षक वीरेन्द्र सिंहले पनि विवादकै कारण सुशीलसँगको सम्बन्ध तोडेका थिए ।

यूपीमा ग्यांङ स्टारसँग सम्बन्ध
सुशीलको नाम उत्तर प्रदेशका नामी सुटर भाटीसँग पनि जोडिएर आउने गरेको छ । सुशीलले दिल्ली र गाजियाबादको सिमानामा टोल ट्याक्स असुल गर्ने ठेक्का लिएका छन् । सुशीलले त्यो ठेक्का त्यहाँका ग्यांङस्टार सुन्दर भाटीलाई दिएको आरोप पनि लाग्ने गरेको छ । –एजेन्सीको सहयोगमा