नेपाली राष्ट्रिय क्रिकेट टिमले त्रिकोणात्मक टी २० सिरिज अन्तर्गत आज उपाधिका लागि नेदरल्याण्डसँग खेल्दै छ ।

त्रिवि क्रिकेट मैदानमा दिउँसो सवा १ बजेबाट फाइनल खेल शुरु हुने छ ।

कोरोना महामारीका कारण नेपालले खेल्ने अन्तर्राष्ट्रिय प्रतियोगिताहरु स्थगित भएपछि नेपाल क्रिकेट संघ क्यानले नेदरल्याण्ड र मलेसियालाई काठमाडौंमा बोलाएर त्रिकोणात्मक सिरिज आयोजना गरेको हो ।

डबल राउण्ड रोविन लिग अन्तर्गत भएको खेलमा नेपाल शीर्ष स्थानमा रहँदै फाइनलमा पुग्दा नेदरल्याण्ड दोस्रो स्थानमा रहँदै फाइनल पुगेको हो ।

समूह चरणमा पहिलो खेलमा नेपाल नेदरल्याण्डलाई ९ विकेटले पराजित गरेको थियो भने दोस्रो खेलमा तीन विकेटले पराजित गरेको थियो । नेपालले समूह चरणमा मलेसियालाई पहिलो खेलमा नौ विकेट र अर्को खेलमा ६९ रनको जित निकालेको थियो ।

नेपाली राष्ट्रिय टिमले घरेलु मैदानमा उपाधि नजितेको ११ वर्ष भइसकेको छ । आजको फाइनल जित्दै ११ बर्षदेखिको घरेलु मैदानको उपाधि खडेरी तोड्ने अभियानमा नेपाली टिम रहेको छ ।

नेपालले अन्तिम पटक सन् २०१० आइसीसी विश्व क्रिकेट लिग डिभिजन ५ को उपाधि जितेपछि कुनैपनि प्रतियोगिता जित्न सकेको छैन । यो बीचमा नेपाल सन् २०१३ मा एसीसी टी २० कपको फा

इनलमा पुगेको थियो । तर त्यो बेला अफगानिस्तानसँग सात विकेटले पराजित भएको थियो ।

नेपाली टिमका कप्तान ज्ञानेन्द्र मल्लले प्रतियोगिताको उपाधि जित्ने संभावना बलियो रहेको बताएका छन् । उनले नेदरल्याण्ड्स टिममा तीन मुख्य खेलाडी नहुँदापनि अझै राम्रो गरिरहेको र फाइनलमा उसलाई सहज रुपमा लिन नहुने पनि बताएका छन् ।

यस्तै कप्तान मल्लले फाइनल खेल्ने नेपाली टिममा केहि परिवर्तन हुन सक्ने संभावना रहेको बताए । नेपालले मलेसियाविरुद्धको खेलमा सेटमा दुई खेलाडी परिवर्तन गरेको थियो । फाइनलमा पनि टिममा एक वा दुई खेलाडी परिवर्तन हुनसक्ने संभावना रहेको छ ।