नेपाल क्रिकेट संघ क्यानको आयोजनामा एक बर्ष भन्दा बढि समयमा पहिलो पटक नेपालमा आयोजना भएको त्रिकोणात्मक टी २० सिरिजमा नेपालले नेदरल्याण्ड्सविरुद्ध नौ विकेटको सानदार जित निकाल्न सफल भयो । नेपालले एकै खेलमा चार वटा कीर्तिमान बनाउन सफल भयो ।

टी २० मा पहिलो विकेटका लागि सर्वाधिक ठूलो साझेदारी

नेदरल्याण्ड्सले दिएको एक सय ३७ रनको लक्ष्य पक्ष्याएको नेपालका लागि कुशल भुर्तेल र आशिफ शेखले पहिलो विकेटका लागि सानदार साझेदारी गरेर कीर्तिमान बनाए । उनीहरुले पहिलो विकेटका लागि एक सय १६ रनको पार्टनरसिप गरे । जसमा दुबै खेलाडीको टी २० क्रिकेटमा डेब्यु खेल थियो ।

पहिलो बलबाट नै आक्रामक खेल खेलेका कुशल र आशिफले सन् २०१९ मा भुटानविरुद्ध बनाएको एक सय आठ रनको रेकर्डलाई तोड्न सफल भए ।

यो क्रममा कुशलले ६२ रन बनाए भने आशिफले ५४ रन बनाए । उनीहरुले ७६ बलमा सो साझेदारी गरेका थिए । घरेलु मैदानमा दुबैको डेब्यु खेलमा देखाएको प्रदर्शनले नयाँ जोडीको स्थापना भएको संकेत गरेको छ ।

यसका साथै डेब्यु खेलमा नै शतकीय साझेदारी गर्ने उनीहरू पहिलाे नेपाली खेलाडी बनेका छन ।

डेब्यु खेलमा नै आशिफ र कुशलको अर्धशतक

नेदरल्याण्ड्सविरुद्धको खेलमा नेपालको ओपनरका रुपमा उत्रिएका थिए कुशल भुर्तेल र आशिफ शेख । दुबैको टी २० क्रिकेटमा पहिलो खेल थियो । त्यसका बाबजुतपनि प्रशिक्षक डेभ ह्वाटमोरले दुई युवा खेलाडीमा निकै विश्वास गरेका थिए । प्रशिक्षकको विश्वासमा उनीहरुपनि खरो रुपमा उत्रिए ।

नेदरल्याण्ड्सको बलिङलाई पारीको सुरुवात देखि नै बर्सिएका कुशलले मात्र ३० बलमा अर्धशतक बनाएका थिए । जसमा उनले पाँच चौका र चार छक्का प्रहार गरे । त्यसपछि पनि उनले आफ्नो ब्याटिङलाई कायमै राख्दै ४६ बलमा ६२ रनको उत्कृष्ट साझेदारी गर्न सफल भए । जसमा उनले पाँच चौका र पाँच छक्का प्रहार गरे । राष्ट्रिय टिमबाट टी २० मा ड्रिम डेब्यु गर्न सफल कुशलसँगै आशिफ शेखका लागि पनि यो खेल बर्षोसम्म सम्झिने किसिमको रह्यो ।

एकतर्फ कुशल निकै आक्रामक तरिकाले खेलिरहेका बेला सुरुवातमा आशिफले केहि शान्त भएर खेलेका थिए । तर जब जब पारी अगाडी बढ्यो उनले पनि आफ्नो ब्याटलाई खोल्न थाले ।

टिमले दिएको जिम्मेवारीमा खरो रुपमा उत्रिएका आशिफले ३६ बलमा अर्धशतक बनाए । त्यो बेलासम्म उनले चार चौका र चार छक्का प्रहार गरे । ४६ रनमा खेलिरहेका बेला आशिफले छक्का प्रहार गर्दै अर्धशतक प्रहार गरे ।

त्यसपछि अन्तिममा उनले ३८ बलमा ५४ रनको पारी खेले । नेपालका लागि टी २० क्रिकेटमा अर्धशतक बनाउने खेलाडीमा कुशल नबौं खेलाडी बनेका छन भने आशिफ १० औं खेलाडी बनेका छन ।

नेदरल्याण्ड्सविरुद्ध अहिलेसम्मकै उत्कृष्ट जित

नेपालले नेदरल्याण्ड्ससँग औपचारिक रुपमा टी २० क्रिकेटमा नेदरल्याण्ड्ससँग नौ विकेटको भारती अन्तरको जित पहिलो पटक निकालेको हो ।

यसअघि खेलिएका खेलहरुमा नेपालले नेदरल्याण्ड्सविरुद्ध ठूलो जित चार विकेटको थियो । यसका साथै नेपालले नेदरल्याण्ड्ससँगको इक्वेसन तीन तीन खेलमा पुर्याएको छ ।

यसका साथै नेदरल्याण्ड्सविरुद्ध रन चेज गर्ने क्रममा कम ओभरमा लक्ष्य पुरा गरेको पनि पहिलो पटक हो । यसअघि खेलेका ६ खेलमा २० औं ओभरमा पुगेर जितेको थियो ।