Neplays.com - Leading Sports News Portal Nepal

तीन खेलाडीको अर्धशतकमा विराटनगरले जनकपुरलाई दियो १७५ रनको लक्ष्य

Tue, 03 Nov 2026 14:32:00 +0545

काठमाडौं । लोकेश बम, इमरान शेख र आन्द्रे रसेलको अर्धशतकमा विराटनगर किंग्सले नेपाल प्रिमियर लिग (एनपीएल) मा जनकपुर बोल्ट्ससामु जितका लागि १७५ रनको लक्ष्य प्रस्तुत गरेको छ।

कीर्तिपुरस्थित त्रिवि क्रिकेट मैदानमा जनकपुरले टस जितेर बलिङ रोजेपछि ब्याटिङ गरेको विराटनगरले निर्धारित २० ओभरमा ३ विकेटको क्षतिमा १७४ रनको योगफल तयार पारेको हो।

विराटनगरका लागि तीन ब्याटरले अर्धशतक पूरा गरे। एनपीएलको एकै इनिङ्समा तीन ब्याटरले अर्धशतक पूरा गरेको यो पहिलो खेल हो। ४५ बलमा ५ चौका र २ छक्का सहयोगमा इमरान शेखले ५६ रनको योगदान दिए। रसेलले २९ बलमा २ चौका र ५ छक्का सहयोगमा ५२ रनमा अविजित रहे। शुभम रन्जाने ७ रनमा नटआउट रहे। ४० बलमा ३ चौका र ३ छक्का सहयोगमा ५० रन बनाएका लोकेश बम राहुल यादवको बलमा ललित राजवंशीको हातबाट क्याच आउट भए। एनपीएलमा २ अर्धशतक पूरा गर्ने लोकेश पहिलो खेलाडी हुन्।

यसअघि तृतराज दास, सोमपाल कामी, डेविड मलान, मोइन अली र दीपेन्दसिंह ऐरीले अर्धशतक हानेका थिए। जारी एनपीएलमा अहिलेसम्म आठ अर्धशतक भएको छ। आन्द्रे रसेलले ५२ रनको योगदान दिए। ओपनर सेहनान जयासुरिया १ रनमा नै आउट भए। जनकपुरका लागि अविशेक तिवारीले दुई तथा मोइन अलीले एक विकेट लिए। जनकपुरले केहीबेरमा जवाफी ब्याटिङ गर्नेछ।

विराटनगरका लोकेश बमले पनि पूरा गरे अर्धशतक

Tue, 03 Nov 2026 14:03:00 +0545

काठमाडौं । जनकपुर बोल्ट्सविरुद्धको खेलमा विराटनगर किंग्सका विस्फोटक ब्याटर लोकेश बमले पनि अर्धशतक पूरा गरेका छन्।

नेपाल प्रिमियर लिगअन्तर्गत आज भइरहेको खेलमा उनले ३९ बलमा ५० रन प्रहार गरेका हुन्।

उनको अर्धशतकमा ३ चौका र ३ छक्का समावेश छ। विराटनगरले २ विकेट गुमाएर १७.३ ओभरमा १४५ रन बनाइसकेको छ।

यसअघि इमरान शेखले पनि अर्धशतक प्रहार गरेका थिए।

टस जितेर विराटनगरविरुद्ध बलिङ गर्दै जनकपुर बोल्ट्स

Tue, 03 Nov 2026 12:31:00 +0545

काठमाडौं। नेपाल प्रिमियर लिग (एनपीएल) अन्तर्गत विराटनगर किङ्सविरुद्धको खेलमा जनकपुर बोल्ट्सले टस जितेर पहिले बलिङ गर्ने निर्णय गरेको छ।

टस जितेसँगै जनकपुरले विराटनगरलाई पहिले ब्याटिङको निम्तो दिएको छ ।

अब विराटनगरले निर्धारित ओभरमा प्रतिस्पर्धात्मक योगफल बनाउने लक्ष्यसहित ब्याटिङ गर्नेछ ।

राइजिङ स्टार्स एसिया कपका लागि भारत ‘ए’ टोली घोषणा, अभिषेक र बैभव सामेल

Tue, 03 Nov 2026 09:04:00 +0545

काठमाडौं । कतारको दोहामा नोभेम्बर १९ देखि २९ सम्म आयोजना हुने एसीसी राइजिङ स्टार्स एसिया कपका लागि भारतले आफ्नो ‘ए’ टोली घोषणा गरेको छ ।

भारतीय छनोट समितिले तिलक वर्माको कप्तानीमा १५ सदस्यीय टोली छनोट गरेको हो । तिलक वर्माको कप्तानीमा घोषित टोलीमा अभिषेक शर्मा, वैभव सूर्यवंशी, प्रभसिमरन सिंह, तिलक वर्मा, रजत पाटीदार, रिंकु सिंह, कुमार कुशाग्र, सूर्यांश शेड्गे, शाहबाज अहमद, विप्रज निगम, हर्ष दुबे, तनुष कोटियन, हर्षित राना, प्रिन्स यादव र अर्शद खान रहेका छन् । रजत पाटीदार उपकप्तान तथा प्रभसिमरन सिंह र कुमार कुशाग्र विकेटकिपर रहेका छन् ।

एकदिवसीय फर्म्याटमा हुने यस प्रतियोगितामा भारत ‘ए’ समूह ‘बी’ मा नेपाल, पाकिस्तान ‘ए’ र संयुक्त अरब इमिरेट्ससँगै रहेको छ । समूह ‘ए’ मा बंगलादेश ‘ए’, श्रीलंका ‘ए’, अफगानिस्तान ‘ए’ र हङकङ छन् । भारत ‘ए’ ले नोभेम्बर २० मा नेपालसँग पहिलो खेल खेल्नेछ ।

त्यसपछि नोभेम्बर २२ मा पाकिस्तान ‘ए’ र नोभेम्बर २४ मा संयुक्त अरब इमिरेट्ससँग प्रतिस्पर्धा गर्नेछ । दुवै समूहका शीर्ष दुई टोली सेमिफाइनलमा पुग्नेछन् । सेमिफाइनल नोभेम्बर २६ र २७ मा तथा फाइनल नोभेम्बर २९ मा हुनेछ ।

अस्ट्रेलियाका ग्लेन म्याक्सवेलले अन्तर्राष्ट्रिय क्रिकेटबाट सन्यास लिए

Tue, 03 Nov 2026 09:02:00 +0545

काठमाडौं । अस्ट्रेलियाका अनुभवी अलराउन्डर ग्लेन म्याक्सवेलले अन्तर्राष्ट्रिय क्रिकेटबाट सन्यास लिएका छन् ।

३८ वर्षीय म्याक्सवेलले प्रथम श्रेणी र लिस्ट ‘ए’ क्रिकेटबाट समेत बिदा लिने घोषणा गरेका हुन् । तर उनले बीग बास लिग (बीबीएल)मा मेलबर्न स्टार्सबाट खेल्नेछन् ।

म्याक्सवेलले गएको वर्ष एकदिवसीय अन्तर्राष्ट्रियबाट सन्यास लिएका थिए । तर, टी–२० अन्तर्राष्ट्रिय क्रिकेट खेलिरहेका थिए । दुई पटक एकदिवसीय विश्वकप जितेका म्याक्सवेलले सन् २०२१ मा अस्ट्रेलियालाई पहिलो पटक टी–२० विश्वकप च्याम्पियन बनाउने क्रममा विजयी पारी खेलेका थिए ।

म्याक्सवेलले अस्ट्रेलियाका लागि १३० टी–२० अन्तर्राष्ट्रिय खेल खेल्दै २ हजार ८९७ रन बनाएका छन् । उनले ५१ विकेटसमेत लिएका छन् ।

एनपीएलमा आज दुई खेल हुँदै

Tue, 03 Nov 2026 07:23:00 +0545

काठमाडौं । नेपाल प्रिमियर लिग (एनपीएल) अन्तर्गत आज पनि दुई खेल हुँदैछन् ।

आज पहिलो खेल अपराहन्न साढे १२ बजे बिराटनगर किंग्स र जनकपुर बोल्ट्सबीच हुँदैछ । जारी प्रतियोगितामा विराटनगर किंग्सले एक जित र २ हार बेहोरेको छ भने जनकपुरले ३ खेलमा २ जित र एक हार बेहोरेको छ ।

त्यसैगरी आज दोस्रो खेल साँझ ५ बजेदेखि लुम्बिनी लायन्स र पोखरा एभेन्जर्सबीच हुँदैछ । लुम्बिनी लायन्सले २ खेलमा एक जित र एक खेल बर्षाले रद्ध हुदा अंक बाँडेको छ भने पोखरा एभेन्जर्सले आफ्ना शुरुवाती दुवै खेलमा हार बेहोरेको छ ।

सुदूरपश्चिमको राम्रो पुनरागमन, चितवनविरुद्ध ५ विकेटको जित

Mon, 02 Nov 2026 20:44:00 +0545

काठमाडौं । चितवन राइनोजलाई पराजित गर्दै सुदूरपश्चिम रोयल्सले नेपाल प्रिमियर लिगमा दोस्रो जित दर्ता गरेको छ।

सोमबार भएको दोस्रो खेलमा सुदूरपश्चिमले चितवनलाई ५ विकेटले पराजित गरेको हो। सुदूरपश्चिमले चौथो खेलमा आएर दोस्रो जित हात पारेको हो।

पहिलो खेलमा लुम्बिनी लायन्ससँग ७ विकेटले पराजित भएको सुदूरपश्चिमले दोस्रो खेलमा पोखरा एभेन्जर्सलाई ६ विकेटले हराएको थियो। तेस्रो खेलमा भने विराटनगरसँग ३५ रनले पराजित भएको थियो।

चितवनले भने तेस्रो खेलमा आएर पहिलो हार व्यहोरेको हो। पहिलो खेलमा विराटनगर किंग्सलाई ८ रनले हराएको चितवनले दोस्रो खेलमा भने लुम्बिनी लायन्ससँग वर्षाले खेल प्रभावित हुँदा अंक बाँडेको थियो। चितवनले दिएको १ सय ३० रनको लक्ष्य सुदूरपश्चिमले १६.४ ओभरमा ५ विकेटको क्षतिमा भेट्टायो।

सुदूरपश्चिमका लागि ब्राण्डोन म्याक मुलेनले सर्वाधिक ४३ रनको योगदान दिए। उनले २१ बलमा ६ चौका र २ चौका हाने। इशान पाण्डे २५ रनमा एलबीडब्लु धरापमा परे। विनोद भण्डारी ११ र सैफ जैव २ रन बनाउँदै पेभेलियन फर्के। कप्तान दीपेन्द्र सिंह ऐरि गोल्डेन डकआउट भए। आरिफ शेख २० र सेरफाने रदरफोर्ड २१ रनमा अविजित रहे।

चितवनका लागि रन्जित कुमारले ३ विकेट लिएपनि टोलीको हार टार्न सकेनन्। उनले आफ्नो स्पेलमा २८ रन खर्चे। रिजन ढकाल र मौसम ढकालले समान १ विकेट लिए। त्यसअघि कीर्तिपुरस्थित त्रिवि क्रिकेट मैदानमा सुदूरपश्चिमले टस जितेर फिल्डिङ रोजेपछि ब्याटिङ गरेको चितवनले निर्धारित २० ओभरमा ६ विकेटको क्षतिमा १ सय २९ रनको योगफल तयार पारेको थियो।

चितवनका लागि रवि वोपाराले सर्वाधिक ४९ रनको योगदान दिए। चौथो नम्बरमा ब्याटिङमा आएका उनले ४० बलमा ३ चौका र २ छक्का सहयोगमा ४९ रन बनाउँदा स्कट कुग्लेजिनको बलमा कप्तान दीपेन्द्र सिंह ऐरिको हातबाट क्याच आउट भए। डविड मलान १६ रन बनाउँदा दीपेन्द्रको बलमा विकेटकिपर विनोद भण्डारीको हातबाट क्याच आउट भए। ओपनर देव खनाल ७ रनमा हेमन्त धामीको बलमा एलबीडब्लु धरापमा परे। अर्जुन साउद १५ रनमा स्कट कुग्लेजिनको बलमा बोल्ड आउट भए। कप्तान सिकन्दर राजा १५ रनमा क्याच आउट नै भए। विवेक यादव १७ रनमा रनआउट भए। सुदूरपश्चिमका लागि स्कट कुग्लेजिनले २ विकेट लिए। हेमन्त धामी, दीपेन्द्रसिंह ऐरि र अनिल खरेलले समान एक विकेट आफ्नो नाममा गरे।

चितवनले सुदूरपश्चिमलाई दियो १३० रनको लक्ष्य

Mon, 02 Nov 2026 20:37:00 +0545

काठमाडौं । नेपाल प्रिमियर लिग(एनपीएल)को तेस्रो संस्करणको ११ औं खेलमा चितवन राइनोजले सुदूरपश्चिम रोयल्सलाई १३० रनको विजय लक्ष्य दिएको छ।

कीर्तिपुरस्थित त्रिवी क्रिकेट स्टेडियममा टस हारेर ब्याटिङको निम्तो पाएको चितवनले निर्धारित २० ओभरमा ६ विकेट गुमाउँदै १२९ रन बनाएको हो।

चितवन राइनोजको लागि रवि बोपाराले सर्वाधिक ४९ रन बनाए। १८.१ ओभरमा स्कट केग्गुलिनको बलमा दिपेन्द्र सिंह ऐरीको हातमा उनी क्याच भए। उनले ४० बलमा ३ चौका र २ छक्का प्रहार गरेर पेभेलियन फर्किए।

चितवनले पहिलो विकेटको रुपमा ओपनर देव खनाललाई सस्तैमा गुमायो। त्यसपछि वान डाउन आएका अर्जुनले १५ रन बनाउँदा तेस्रो विकेटको रुपमा अर्का ओपनर डेविड मलान १६ रनमा पेभेलियन फर्किए। १३ रन बनाउँदा कप्तान सिकन्दर राजाले क्याच मिसको रुपमा जीवनदान पाए। तर १५ रन बनाएर सिकन्दर पेभेलियन फर्किए। विवेक यादव १७ रनमा रनआउट हुँदा टम टेलर ६ रनमा अविजित रहे।

सुदूरपश्चिम रोयल्सको लागि बलिङमा स्कट केग्गुलिनले २ विकेट लिँदा हेमन्त धामी, दिपेन्द्र सिंह ऐरी र अनिल खरेलले १-१ विकेट लिए। आजको पहिलो खेलमा काठमाडौं गोर्खाजले कर्णाली याक्सविरुद्ध ४ विकेटको जित दर्ता गरेको थियो।

सौराहा अन्तर्राष्ट्रिय तेक्वान्दोमा मधेश च्याम्पियन

Mon, 02 Nov 2026 19:48:00 +0545

काठमाडौं । मधेश प्रदेश प्रथम सौराहा अन्तर्राष्ट्रिय तेक्वान्दो च्याम्पियनसिपको टिम च्याम्पियन भएको छ।

चितवनको रत्ननगर नगरपालिकास्थित निपनीमा सम्पन्न प्रतियोगितामा मधेश प्रदेशले बागमती प्रदेशभन्दा एक कांस्य पदक बढी जित्दै टिम च्याम्पियनको उपाधि उचाल्यो । मधेश र बागमतीले समान १७ स्वर्ण र १० रजत पदक जिते । तर मधेशले ९ कांस्य पदक जित्दा बागमतीले आठ कांस्य पदक मात्र जित्न सफल भयो ।

यससँगै मधेशले आठ राष्ट्रले प्रतिस्पर्धा गरेको प्रतियोगितामा टिम च्याम्पियनको उपाधि उचाल्यो । च्याम्पियन मधेशले ५० हजार र उपविजेता बागमतीले ३० हजार रुपैयाँ नगद पुरस्कार पाए । प्रतियोगितामा नेपालसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, साउदी अरेबिया र जापानका करिब आठ सय खेलाडीले ग्योरोगी र पुम्से विधाका विभिन्न उमेर तथा तौल समूहमा प्रतिस्पर्धा गरेका थिए ।

चितवन तेक्वान्दो डोजाङको आयोजनामा भएको आयोजक टोली (चितवन जिल्लाको टोली) तेस्रो भयो । आयोजकले १० स्वर्ण, १७ रजत र ४० कांस्य पदक जित्यो । तेस्रो भएको आयोजक टोलीले २० हजार रुपैयाँ पुरस्कार प्राप्त गरे । च्याम्पियनसिपमा चितवनका साहिल मन्सुर ग्योरोगीतर्फ उत्कृष्ट पुरुष खेलाडी घोषित भए । बागमतीकी दीक्षा तामाङ उत्कृष्ट महिला ग्योरोगी खेलाडी बनिन् । उत्कृष्ट प्रशिक्षकको पुरस्कार मधेशका दीपेश मानन्धरले प्राप्त गरे । विजेता टोली तथा खेलाडीलाई रत्ननगर नगरपालिकाका प्रमुख प्रह्लाद सापकोटा, प्रतियोगिता संयोजक प्रमुख प्रज्वल दवाडी र आयोजक चितवन जिल्ला तेक्वान्दो डोजाङका प्रमुख रोशनलगायतले पुरस्कृत गरे ।

च्याम्पियनसिपमा उज्वल श्रेष्ठ उत्कृष्ट रेफ्री घोषित भएको प्रतियोगिताको अन्तर्राष्ट्रिय संयोजक अशोक खड्काले बताए । पुम्से पुरुषतर्पm आयुष गुरुङ र महिलामा युमी राई उत्कृष्ट खेलाडी घोषित भए । प्रतियोगितामा ग्योरोगीतर्फ सब जुनियर (९–११ वर्ष), क्याडेट (१२–१४ वर्ष), जुनियर (१५–१७ वर्ष) र सिनियर (१८ वर्षमाथि) तथा पुम्से विधामा गरी कुल ६४ स्वर्ण र रजत तथा १२८ कांस्य पदकका लागि प्रतिस्पर्धा भएको थियो ।

सुदूरपश्चिम टस जितेर बलिङ गर्दै : चितवनलाई ब्याटिङको निम्तो

Mon, 02 Nov 2026 17:12:00 +0545

काठमाडौं । नेपाल प्रिमियर लिग (एनपीएल) अन्तर्गत सोमबारको खोस्रो खेलमा चितवनले पहिलो ब्याटिङ गर्ने भएको छ ।

सुदूरपश्चिमका कप्तान दीपेन्द्रसिंह ऐरीले टस जितेर सुरुमा बलिङ गर्ने निर्णय गरेपछि चितवनले ब्याटिङको निम्तो पाएको हो ।

दुई खेलमा अपराजित चितवनले एक खेलमा जित र एक खेलमा वर्षाका कारण अंक बाँडेको छ । चितवन तीन अंकसहित तालिकाको चौथो स्थानमा छ । तीन खेल खेलिसकेको सुदूरपश्चिमले दुई हारको सामना गर्दा एक मात्र जित निकालेको छ ।

अपराजित चितवन दोस्रो जितको खोजीमा छ भने दुई खेलमा पराजित सुदूरपश्चिम चौथो खेलमा जित्नै पर्ने दबाबमा छ ।

काठमाडौं ४ विकेटले विजयी : १८० रन बनाउँदासमेत चुक्यो कर्णाली

Mon, 02 Nov 2026 17:10:00 +0545

काठमाडौं । काठमाडौं गोर्खाजले कर्णाली याक्सविरुद्ध सानदार जित निकालेको छ । कीर्तिपुरस्थित त्रिवि मैदानमा नेपाल प्रिमियर लिग (एनपीएल) अन्तर्गत सोमबार भएको खेलमा टस जितेर पहिला बलिङ गरेको काठमाडाैं चार विकेटले विजयी भएको हो ।

सुरुमा ब्याटिङ गरेको कर्णाली याक्सले दिएको १८१ रनको लक्ष्य काठमाडौंले दुई बल बाँकी हुँदा छ विकेटको क्षतिमा पूरा गरेको हो । काठमाडौंको जितमा कप्तान करण केसीले विष्फोटक ब्याटिङ गर्दै २० बलमा ४४ रन जोडे । उनले तीन छक्का र चार चाैका हिर्काए । उसका लागि रसिद खानले अर्धशतक बनाए। उनले ३२ बल खेल्दा तीन चौका र दुई छक्का हिर्काएर ५० रन पूरा गरेका हुन् । अन्तिममा विष्फोटक ब्याटिङ गर्दै काठमाडाैंका जहानदाद खानले १० बलकाे सामना गर्दा दुई छक्का र एक चाैकाको मद्दतमा २२ रन बनाए । उसका लागि ओपनर डेबिड वार्नरले १० बलमा १६ रन बनाउँदा माेहमद आदिल आलमले २० रन थपे । स्मित पटेलले ९ रन जोड्दा भीम सार्की ५ रनमा आउट भए ।

काठमाडाैंविरुद्ध कर्णालीका कप्तान सोमपाल कामी र हुसेन तलातले दुईदुई विकेट हात पार्दा मार्क वाट र नन्दन यादवले एकएक विकेट लिए । सुरुमा ब्याटिङ गरेको कर्णालीले ६ विकेटको क्षतिमा पूरै २० ओभर खेल्दै १८० रन बनाएको थियो। कर्णालीका लागि ओपनर आरिफुल इस्लामले सर्वाधिक ४४ रन बनाए । २२ बलको सामना गर्दा उनले पाँच चौका र तीन छक्का प्रहार गरे । त्यसैगरी हसन तलातले ३० बलमा ४० रन बनाउँदा पवन सरार्फले नटआउट ३० रन बनाए । त्यसैगरी कर्णालीका लागि गुल्सन झाले १२ बलमा दुई छक्काको मद्दतमा २० रन जोडे भने मार्क वाटले २० बल खेलेर १७ रन बनाए । आजको खेलमा दिपक डुम्रे भने ८ रन बनाउँदा आउट भएका थिए । कप्तान सोमपाल कामी दुई बलको सामना गर्दा १ रनमा सीमित भए ।

कर्णालीलाई सस्तैमा रोक्न काठमाडौंका कप्तान करण केसीले दुई विकेट हात पार्दा साहब आलम, जहानदाद खान, देव साह र सन्तोष यादवले एकएक विकेट हात पारे । कर्णाली यसअघिका दुई खेलमा जित निकाल्दै चार अंक जोडेर शीर्ष स्थानमा कायम छ । पहिलो खेलमा पराजित काठमाडौंले पहिलो जित निकाल्दै दुई अंक जोडेको हो ।

कर्णालीले काठमाण्डौलाई दियो १८१ रनको लक्ष्य

Mon, 02 Nov 2026 14:24:00 +0545

काठमाडौं । कर्णाली याक्सले नेपाल प्रिमियर लिग (एनपीएल)को तेस्रो सिजनमा काठमाण्डू गोर्खाजविरुद्ध १८१ रनको लक्ष्य प्रस्तुत गरेको छ ।

सोमबार कीर्तिपुरस्थित त्रिवि क्रिकेट रंगशालामा टस हारेर ब्याटिङमा आएको कर्णालीले काठमाण्डूविरुद्ध निर्धारित २० ओभरमा ६ विकेट गुमाएर १८० रनको योगफल खडा गरेको हो ।

काठमाडौंले टस जित्यो

Mon, 02 Nov 2026 12:55:00 +0545

काठमाडौं । पहिलो खेलमा पराजित काठमाडौं गोर्खाजले नेपाल प्रिमियर लिग(एनपिएल) मा कर्णाली याक्सविरुद्ध टस जितेको छ।

कीर्तिपुरस्थित टियु क्रिकेट मैदानमा टस जितेर काठमाडौंका कप्तान करण केसीले बलिङ रोजेका हुन्।

गत बिहिबार विराटनगर किंग्सविरुद्ध खेलेको कर्णालीको टोलीमा एक परिवर्तन भएको छ। विदेशी खेलाडी अकबर अलिको स्थानमा जिसाान अलिले स्थान बनाएका छन्।

सुरक्षा कारण देखाउँदै यामाहाले कतार मोटोजीपी दौड छाेड्याे

Mon, 02 Nov 2026 09:00:00 +0545

मध्यपूर्वमा जारी द्वन्द्वका कारण जापानी मोटोजीपी टोली 'यामाहा' कतार ग्रान्ड प्रिक्सबाट बाहिरिएको छ।

अप्रिलमा हुनुपर्ने यो प्रतियोगिता अब नोभेम्बर ६ देखि ८ सम्म लुसेल अन्तर्राष्ट्रिय सर्किटमा आयोजना हुने तय भएको छ।

इरानविरुद्ध अमेरिका र इजरायलको युद्ध चलिरहेको बेला कतारमा प्रतिस्पर्धा गर्ने विषयमा चिन्ता व्यक्त गर्दै २२ मध्ये १९ जना राइडरले एउटा पत्रमा हस्ताक्षर गरेको खबर बाहिर आए पनि मोटोजीपीले भने प्रतियोगिता अघि बढाउने निर्णय गरेको छ।

फेब्रुअरीमा अमेरिका र इजरायलले इरानमाथि हवाई आक्रमण गरेका थिए। त्यसको जवाफमा इरानले इजरायल र यस क्षेत्रका अमेरिका निकट अन्य देशहरूलाई लक्षित गरी क्षेप्यास्त्र प्रहार गरेको थियो। यामाहाले मध्यपूर्वको यात्रासम्बन्धी आफ्नो कम्पनी-व्यापी प्रतिबन्धहरू परिवर्तन गर्नुपर्ने "पर्याप्त आधार नभेटिएको" जनाएको छ। जापान सरकारले पनि आफ्ना नागरिकहरूलाई यस क्षेत्रमा अत्यावश्यकबाहेकको यात्रा नगर्न सुझाव दिएको छ।

मोटोजीपीले यामाहाको निर्णयप्रति "निराशा" व्यक्त गरेको छ। मोटोजीपीका अनुसार, कतार र स्वतन्त्र सुरक्षा सल्लाहकारहरूले दौड (रेस) आयोजना गर्न सकिने भनी दिएको "पूर्ण आश्वासन" लाई यामाहाको यो निर्णयले समेट्दैन।

कतारले भनेको छ कि यदि द्वन्द्व बढेको खण्डमा पनि टोलीहरू त्यहाँ अलपत्र पर्ने छैनन् भन्ने कुराको उनीहरू ग्यारेन्टी दिन सक्छन्। हालैको निर्वाचनपछि इजरायलले आफ्नो राजनीतिक गतिरोध कसरी सुल्झाउँछ र मंगलबार हुने अमेरिकी मध्यावधि निर्वाचनको नतिजा कस्तो आउँछ, यी दुवै विषयले मध्यपूर्वको परिस्थितिमा ठूलो प्रभाव पार्न सक्छन्।

मोटोजीपीले थप्यो कि यामाहाको यो कदमले "खेलकुदका हिसाबले पनि असर" पार्नेछ। जापानकै अर्को टोली होन्डा र यामाहाको स्याटेलाइट टोली 'प्रामाक रेसिङ' (Pramac Racing) भने हाल कतारमा प्रतिस्पर्धा गर्न तयार छन्।

फर्मुला १ का लागि के हुन सक्छ?

मोटोजीपीको आयोजना 'लिबर्टी मिडिया'ले गर्छ, जसको स्वामित्वमा 'फर्मुला १' पनि रहेको छ। हालको तालिका अनुसार, एफ-१ सिजनको अन्त्य कतार ग्रान्ड प्रिक्स (२७-२९ नोभेम्बर) र त्यसपछि अबु धाबी ग्रान्ड प्रिक्स (४-६ डिसेम्बर) सँगै हुनेछ।

यद्यपि, यसले एफ-१ को प्राविधिक तथा व्यवस्थापकीय वृत्तमा केही चिन्ता सिर्जना गरेको बुझिएको छ, तैपनि एफ-१ ले यी दुवै दौड आयोजना गर्ने योजना अघि बढाइरहेको छ। उनीहरूका अनुसार, उनीहरूले उपयुक्त सुरक्षा ग्यारेन्टी र आश्वासनहरू प्राप्त गरेका छन्।

एफ-१ लाई दिइएको जानकारी अनुसार, मे महिनायता कतार वा संयुक्त अरब इमिरेट्समा नागरिक पूर्वाधारहरूमाथि कुनै आक्रमण भएको छैन। यदि कतार र अबु धाबीमा हुने भनिएका दुई दौड आयोजना हुन सकेनन् भने, सिजनको अन्तिम ग्रान्ड प्रिक्स (४-६ डिसेम्बर) का लागि इटालीको इमोलालाई सम्भावित आयोजक स्थलका रूपमा तयार राखिँदै छ।

रोनाल्डोले उज्बेकिस्तानविरुद्धको खेल गुमाउने

Mon, 02 Nov 2026 08:32:00 +0545

पोर्चुगलका स्टार फुटबलर क्रिस्टियानो रोनाल्डोले सोमबार उज्बेकिस्तानको पख्तकोरविरुद्ध हुने एएफसी च्याम्पियन्स लिग एलिटको खेल नखेल्ने भएका छन्।

अल-नासरका प्रशिक्षक एन्ज पोस्टेकोग्लुले रोनाल्डोसहित किंग्सले कोमान र मोहम्मद सिमाकनलाई उज्बेकिस्तान भ्रमण गर्ने टोलीमा समावेश गरेका छैनन्।

पख्तकोर र अल-नासरबिचको खेल सोमबार तासकन्दस्थित पख्तकोर सेन्ट्रल स्टेडियममा नेपाली समयअनुसार बेलुका ७:३० बजे सुरु हुनेछ।

रोनाल्डोको अनुपस्थितिमा अल-नासरले साडियो माने र जोआओ फेलिक्सजस्ता खेलाडीबाट अग्रपङ्क्तिमा राम्रो प्रदर्शनको अपेक्षा गर्नेछ। गत साता साउदी प्रो लिगमा अल-खोलुदविरुद्ध ह्याट्रिक गरेका रोनाल्डोको करियर गोल संख्या ९८५ पुगेको छ।

राम्रो लयमा रहेका रोनाल्डोलाई लगातारका खेल र लामो यात्राका कारण आराम दिइएको प्रशिक्षक पोस्टेकोग्लुले बताएका छन्। उज्बेकिस्तानमा आयोजित पत्रकार सम्मेलनमा पोस्टेकोग्लुले खेलको चाप र यात्राको दूरीलाई ध्यानमा राख्दै रोनाल्डो, कोमान र सिमाकनलाई आराम दिएको बताए।

सिजनको सुरुवातमा कठिनाइ भए पनि टोली अहिले राम्रो अवस्थामा पुगेको उनको भनाइ थियो। पहिलो पटक एसियाली उपाधि जित्ने लक्ष्य राखेको अल-नासरले प्रतियोगितामा अपेक्षाअनुसार सुरुवात गर्न सकेको छैन। प्रतियोगिताको पूर्वी र पश्चिमी क्षेत्रमा १६-१६ टोली छन्। दुवै क्षेत्रका समूहबाट शीर्ष आठ टोली नकआउट चरणमा पुग्नेछन्।

प्रिमियर लिगः १४ वर्षपछि एनफिल्डमा लिभरपुललाई हराउँदै आर्सनल शीर्ष स्थानमा उक्लियो

Mon, 02 Nov 2026 07:39:00 +0545

काठमाडौं। इंग्लिस प्रिमियर लिगमा आर्सनलले लिभरपुललाई १-० ले पराजित गर्दै शीर्ष स्थानमा तीन अंकको अग्रता बनाएको छ। लिभरपुलको घरेलु मैदान एनफिल्डमा सन् २०१२ सेप्टेम्बरपछि पहिलो जित निकाल्ने क्रममा आर्सनलले उत्कृष्ट प्रदर्शन गरेको हो ।

यसअघि एनफिल्डमा खेलेका पछिल्ला १३ खेलमा आर्सनल जितविहीन थियो । खेलको १६औँ मिनेटमा काइ हाभर्ट्जले डेक्लान राइसको लो क्रसलाई गोलमा परिणत गर्दै आर्सनललाई अग्रता दिलाए । पछाडिबाट खेल निर्माण गर्ने क्रममा लिभरपुलले बल गुमाएपछि आर्सनलले त्यसको फाइदा उठाएको थियो । गोलपछि लिभरपुलले लगातार दबाब सिर्जना गरे पनि आर्सनलको डिफेन्स बलियो रह्यो । फ्लोरियन विर्ट्जको फ्रिकिक बारमा लागेर फर्किएको थियो भने एलेक्सिस म्याक एलिस्टरले हेडरमार्फत पाएको राम्रो अवसर खेर फाले ।

दोस्रो हाफमा पनि आर्सनलले उत्कृष्ट डिफेन्स प्रदर्शन जारी राख्यो । लिभरपुललाई गोल गर्ने अवसरबाट टाढा राखेको आर्सनलले लगातार दोस्रो खेलमा विपक्षीलाई टार्गेटमा प्रहार गर्नसमेत दिएन । मिकेल आर्टेटाको टोलीले नौ खेलबाट २४ अंक जोड्दै शीर्ष स्थानमा उक्लिएको छ ।

शनिबार ब्राइटनसँग घरेलु मैदानमै पराजित भएको म्यानचेस्टर सिटी २१ अंकसहित दोस्रो स्थानमा छ । लिगमा दोस्रो हार बेहोरेको लिभरपुल भने १५ अंकसहित पाँचौँ स्थानमा छ । शीर्ष स्थानको आर्सनलभन्दा टोलि नौ अंकले पछाडि परेको छ ।

एमबाप्पेको गोलसँगै रियल म्याड्रिडको लगातार छैटौँ जित

Mon, 02 Nov 2026 07:36:00 +0545

स्पेनिस क्लब रियल म्याड्रिडले आइतबार ला लिगामा रेसिङ सान्तान्डरलाई ३-० ले पराजित गरेको छ।

केलियन एमबाप्पे, जुड बेलिङ्घम र यान डिओमान्डेको गोलमा रियलले सबै प्रतियोगितामा लगातार छैटौँ जित निकालेको हो।

खेलको ११औँ मिनेटमा एमबाप्पेले पेनाल्टीमार्फत गोल गर्दै रियललाई अग्रता दिलाएका थिए। त्यसपछि अर्दा गुलरको पासमा बेलिङ्घमले गोल गर्दै अग्रता दोब्बर बनाए। उनले विपक्षी गोलरक्षकलाई छल्दै खाली पोस्टमा बल पुर्‍याएका थिए।

पहिलो हाफ सकिनुभन्दा नौ मिनेटअघि यान डिओमान्डेले आकर्षक प्रहारमार्फत तेस्रो गोल गरे। उनले पछिल्ला ६ खेलमा चार गोल गर्नुका साथै तीन गोलका लागि सहयोग गरेका छन्।

दोस्रो हाफमा रेसिङ सान्तान्डरले प्रतिस्पर्धा गरे पनि रियलको रक्षापंक्ति तोड्न सकेन। रियलले विपक्षी टोलीलाई लक्ष्यमा एक मात्र प्रहार गर्न दिएको थियो। खेलको अन्तिम समयमा एमबाप्पेको प्रहार पोस्टमा लागेपछि उनी व्यक्तिगत दोस्रो गोल गर्नबाट चुके।

गत साता बार्सिलोनालाई हराएको रियलले यो जितसँगै आफ्नो लय कायम राखेको छ। यो जितपछि रियल म्याड्रिड ३२ अंकसहित तेस्रो स्थानमा छ।

टोली शीर्ष स्थानको बार्सिलोनाभन्दा तीन र दोस्रो स्थानको एट्लेटिको म्याड्रिडभन्दा एक अंकले पछाडि छ। रियल म्याड्रिडले अब बुधबार च्याम्पियन्स लिगमा एईके एथेन्ससँग प्रतिस्पर्धा गर्नेछ।

एनपीएलमा आज दुई खेल हुँदै

Mon, 02 Nov 2026 07:30:00 +0545

काठमाडौं । नेपाल प्रिमियर लिग (एनपीएल) अन्तर्गतको आज दुई खेल हुँदैछन् ।

आज पहिलो खेल अपराहन्न साढे १२ बजे कर्णाली याक्स र काठमाडौँ गोर्खाजबीच हुँदैछ भने दोस्रो खेल साँझ ५ बजेदेखि चितवन राइनोज र सुदूरपश्चिम रोयल्सबीच हुँदैछ ।

कर्णाली याक्सले प्रतियोगितामा शुरुका दुवै खेल जितेर शानदार शुरुवात गरेको छ । कर्णालीले जनकपुर बोल्ट्स र विराटनगर किंग्सलाई पराजित गरेको थियो । त्यस्तै काठमाडौँ गोर्खाजले आफ्नो पहिलो खेलमा हार बेहोरेको थियो । काठमाडौँ पहिलो खेलमा जनकपुर बोल्ट्ससँग पराजित भएको थियो । त्यसैगरी चितवन राइनोजले भने यसअघिका दुई मध्ये एक खेलमा विराटनगरलाई पराजित गरेको थियो भने एक खेल बर्षाले अवरुद्ध हुदा लुम्बिनी लायन्ससँग अंक बाँडेको थियो ।

त्यस्तै, सुदूरपश्चिम रोयल्सले भने खेलेका ३ खेलमा दुई हार र एक जित हासिल गरेको छ । सुदूरपश्चिमले पोखरालाई पराजित गरेको थियो भने लुम्बिनी र विराटनगरसँग हार बेहोरेको थियो ।

जिशन अलाम कर्णाली याक्समा अनुबन्ध

Sun, 01 Nov 2026 23:17:00 +0545

काठमाडौं । कर्णाली याक्सले तेस्रो नेपाल प्रिमियर लिग (एनपिएल)को लागि टेष्ट राष्ट्र बंगलादेशका युवा ब्याटर जिशन अलामलाई अनुबन्ध गरेको छ ।

आइतबार जिशनलाई बाँकी खेलको लागि अनुबन्ध गरेको कर्णाली याक्स स्पोर्ट्स प्रा.लीका अध्यक्ष गृहेन्द्र घिमिरेले जानकारी गराए । अध्यक्ष घिमिरेले जिशनको आगमनसँगै टिमको शीर्षक्रम बलियो हुने विश्वास व्यक्त गरे । ‘जिशन पछिल्लो समय राम्रो लयमा रहेका कारण हामीले अनुबन्ध गरेका हौं । उनको आगमनपछि कर्णाली याक्सको शीर्षक्रम बलियो अझै बलियो हुने विश्वास लिएका छौं ।’

अध्यक्ष घिमिरेले टिममा दुई बंगलादेशी खेलाडी रहिसकेकाले जिसमलाई पनि नेपालको वातावरणमा खेल्न सहज हुने बताउाछन् ।

जिशन कर्णालीमा अनुबन्ध हुने तेस्रो बंगलादेशका खेलाडी हुन् । यसअघि अरिफुल इस्लाम र अकवर अली अनुबन्ध भएका थिए ।

२१ वर्षीय ब्याटिङ अलराउण्डर जिशनले बंगलादेशको यु–१९ हुँदै ए टिमबाट खेलिसकेका छन् । यस्तै, बंगलादेशको फ्रेन्चाइज टोलीहरु राजशाही वारिअर्स र दुरबार राजशाहीबाट खेलेका छन् । उनले लिष्ट ए मा ४९ खेल खेल्दै १ हजार २९५ रन बनाएका थिए । त्यस्तै, २७ टी–२० आईमा ५ सय ७१ रन बनाएका छन् ।

जिसनले अस्ट्रेलियामा भएको टप एण्ड टी–२० शृंखलामा नेपालविरुद्ध पनि सानदार प्रदर्शन गरेका थिए । बंगलादेशले ९ विकेटको जित निकाल्दा अविजित ५२ रन बनाएका थिए । उनले सो खेलमा २९ बलमा तीन चौका र ४ छक्का हिर्काएका थिए । सोही खेलमा कर्णाली याक्सबाट खेलिरहेका अरिफुल इस्लामले पनि ३४ रन बनाएका हुन् ।

कर्णाली याक्सले सोमबार प्रतियोगिताको आफ्नो तेस्रो खेलमा काठमाडौं गोर्खाजसँग खेल्दैछ । सो खेलमा जिशन उपलब्ध हुनेछन् । प्रतियोगिताको पहिलो दुबै खेलमा जित निकाल्दै कर्णालीले प्रभावशाली सुरुवात गरिसकेको छ । कर्णालीले पहिलो खेलमा जनकपुर बोल्ट्सलाई १९ रन र विराटनगर किंग्सलाई ४ विकेटले हराएको थियो ।

जनकपुर बोल्ट्सको अर्को जित, पोखरा लगातार दोस्रो खेलमा पराजित

Sun, 01 Nov 2026 21:04:00 +0545

काठमाडौं । नेपाल प्रिमियर लिग (एनपीएल) अन्तर्गतको आइतबार सम्पन्न खेलमा जनकपुर बोल्ट्सले पोखरा एभेन्जर्सलाई ९ रनले पराजित गरेको छ ।जनकपुरले दिएको १४८ रनको लक्ष्य पछाएको पोखराले २० ओभरमा ९ विकेट गुमाउदै १३८ रन बनाएको थियो ।

पोखराका लागि कप्तान कुशल भुर्तेलले ३५ रन बनाए भने विपिन आचार्यले २०, विपिन खत्रीले १७ र किरण ठगुन्नाले १५ रन बनाएका थिए ।

त्यस्तै जनकपुरका बलर मोईन अलीले ३, कप्तान हरमित सिंह र सैफ हसनले २-२ तथा ललित राजबंशी र जिम्मी निशामले एक एक विकेट लिएका थिए ।

यसअघि टस हारेर पहिला ब्याटिंग गरेको जनकपुरले २० ओभरमा ७ विकेट गुमाएर १४७ रन बनाएको थियो । जनकपुरका लागि तृतराज दासले सर्बाधिक ६१ रन बनाएका थिए भने अभिषेक तिवारीले अविजित २४ रन बनाएका थिए भने मोइन अलीले २१ र जिम्मी निशामले ११ रन बनाएका थिए ।

त्यसैगरी, पोखराका बलर शकिब अल हसनले ३ विकेट र चामिका करुनारत्नेले २ विकेट लिए भने मोहमद सैफुद्दीन र मेहदी हसनले एक एक विकेट लिएका थिए । यो जनकपुरको तेस्रो खेलमा दोस्रो जित हो भने पोखराले जारी प्रतियोगितामा लगातार दोस्रो हार बेहोरेको छ ।

दशौँ राष्ट्रिय खेलकुदको तयारी तीव्रः मन्त्री पोखरेल र कर्णालीका मुख्यमन्त्री शाहीबीच छलफल

Sun, 01 Nov 2026 19:46:00 +0545

सुर्खेत । आगामी दशौँ राष्ट्रिय खेलकुद प्रतियोगिताको तयारीलाई थप तिब्रता दिने र व्यवस्थित बनाउने उद्देश्यले शिक्षा तथा खेलकुद मन्त्री सस्मित पोखरेलले कर्णाली प्रदेशका मुख्यमन्त्री र सामाजिक विकास मन्त्रीसँग सुर्खेतमा छलफल गरेका छन् ।

दशौँ राष्ट्रिय खेलकुद प्रतियोगिताको आयोजना स्थलसमेत रहेको कर्णाली प्रदेशमा खेलकुद पूर्वाधार निर्माण, व्यवस्थापन र अन्य आवश्यक तयारीका सन्दर्भमा सो छलफल केन्द्रित रहेको हो ।

सुर्खेतमा भएको छलफलमा शिक्षा तथा खेलकुद मन्त्री सस्मित पोखरेल, कर्णाली प्रदेशका मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लबीच प्रतियोगितालाई भव्य र ऐतिहासिक रूपमा सफल पार्न संघीय र प्रदेश सरकारबीच हुनुपर्ने समन्वय, पूर्वाधारहरूको अवस्था लगायतका विषयमा कुराकानी भएको जनाइएको छ ।

छलफलका क्रममा मन्त्री पोखरेलले तोकिएकै समयमा प्रतियोगिता सम्पन्न गर्न मन्त्रालयले सबै पक्षसँग सहकार्य गरिरहेको बताउँदै कर्णाली प्रदेशमा खेलकुद पूर्वाधारको विकास र व्यवस्थापनमा संघीय सरकारको तर्फबाट पूर्ण सहयोग रहने प्रतिबद्धता व्यक्त गरे ।

त्यस्तै, मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लले दशौँ राष्ट्रिय खेलकुदलाई सफल बनाउन प्रदेश सरकार पूर्ण रूपमा लागिपरेको जानकारी गराउँदै आवश्यक तयारी अन्तिम चरणमा पुगेको बताए ।

मन्त्री पोखरेल दशौँ राष्ट्रिय खेलकुद प्रतियोगिताको तयारी, पूर्वाधार निरीक्षण तथा सरोकारवालाहरूसँगको समन्वयका लागि हाल सुर्खेत भ्रमणमा छन् ।

जनकपुरले पोखरालाई दियो १४८ रनको लक्ष्य

Sun, 01 Nov 2026 19:13:00 +0545

काठमाडौं । नेपाल प्रिमियर लिग(एनपीएल)को तेस्रो संस्करणको नवौं खेलमा जनकपुर बोल्ट्सले पोखरा एभेन्जर्सलाई १४८ रनको विजयी लक्ष्य प्रस्तुत गरेको छ।

कीर्तिपुरस्थित त्रिवी क्रिकेट स्टेडियममा टस हारेर ब्याटिङको निम्तो पाएको जनकपुर बोल्ट्सले निर्धारित २० ओभरमा ७ विकेट गुमाउँदै १४७ रन बनाएको हो।

जनकपुर बोल्ट्सका लागि ओपनर ब्याटर तृतराज दासले सर्वाधिक ६१ रन बनाए। उनले ५५ बलमा ७ चौका र २ छक्का प्रहार गरे। उनले पहिलो विकेटको लागि अर्का ओपनर मोइन अलिसँग ४७ रनको साझेदारी बनाएका थिए।

मोइन अलिले २१ रन बनाए। पावरप्लेमा बिना कुनै विकेटको क्षती ४५ रन बनाएको थियो। त्यसपछि भने जनकपुरले सोचेअनुरुप खेल्न सकेन। जनकपुरको मध्यक्रममा सुस्तायो।

सैफ हसन र हर्मित सिंह क्रमशः १ र ९ रन बनाएर पेभेलियन फर्किए। अनिल कुमार शाहले ९ रन बनाउँदा जिमी निशम ११ रनमा क्याच भए। जनकपुरका युवा ब्याटर अभिषेक तिवारीले आक्रमक ब्याटिङ प्रदर्शन गरे। उनले १० बलमा १ चौका र २ छक्कासहित २४ रनमा अविजित रहे। अमर सिंह रौतेला २ रनमा बोल्ड भए।

पोखरा एभेन्जर्सका लागि शकिब अल हसनले सर्वाधिक ३ विकेट लिए। चमिका करुणारत्नेले २ विकेट लिए। मेहेदी हसन र मोहम्मद सैफउद्धिनले १-१ विकेट लिए। पोखराको यो दोस्रो खेल हो।

पोखराले पहिलो खेलमा सुदूरपश्चिम रोयल्ससँग ६ विकेटको हार बेहोरेको थियो। जनकपुर बोल्ट्सको भने यो तेस्रो खेल हो।

जनकपुरले पहिलो खेलमा कर्णाली याक्ससँग १९ रनको हार बेहोरेको थियो। दोस्रो खेलमा भने जनकपुरले काठमाडौं गोर्खाजविरुद्ध ८ विकेटको जित दर्ता गरेको थियो।

हिमालयन जुनियर चेस च्याम्पियनसिपमा शुभांग र श्रिषा च्याम्पियन

Sun, 01 Nov 2026 18:19:00 +0545

टस हरेर पहिले ब्याटिङ थालेको जनकपुरले २ विकेट गुमाएर ५७ रन बनाएको हो।

काठमाडौं। हिमालयन जुनियर चेस च्याम्पियनसिपमा शुभांग प्रधान र श्रिषा बल्ला च्याम्पियन भएका छन्।

थापाथलीस्थित हिमालयन चेस एकेडेमीमा आइतबार सम्पन्न यू–१० प्रतियोगितामा शुभांग छात्र र श्रिषाले छात्रातर्फ पहिलो स्थान हासिल गरेका हुन्। रातो बंगला स्कुलका शुभांगले ६ अंक र सेन्ट मेरिज स्कुलकी श्रिषाले ४ अंक प्राप्त गरे।

जेम्स स्कुलका विराज सार्दा ५ अंकसहित दोस्रो तथा रातो बंगला स्कुलकै आरम्भ श्रेष्ठ ४ अंकसहित तेस्रो भए। छात्रातर्फ रातो बंगला स्कुलकी काव्या अग्रवाल २ अंकसहित दोस्रो स्थानमा रहिन्।

एकेडेमीका निर्देशक याईशाष यासिर खम्बूका अनुसार प्रतियोगितामा ६ विद्यालयका कुल ११ खेलाडीले सहभागिता जनाएका थिए। प्रतियोगिता १० मिनेटको र्‍यापिड फर्म्याटमा सञ्चालन गरिएको थियो।

हिमालयन जुनियर चेस च्याम्पियनसिपअन्तर्गत यू–६, यू–८, यू–१०, यू–१२ र यू–१४ उमेर समूहमा छात्र तथा छात्रातर्फका प्रतियोगिता आयोजना गरिनेछ। अक्टोबर ४ मा यू–६ र अक्टोबर ११ मा यू–८ प्रतियोगिता सम्पन्न भइसकेका छन्। अब नोभेम्बर १५ मा यू–१२ र नोभेम्बर २२ मा यू–१४ समूहका खेल हुनेछन्।

नोभेम्बर २९ मा विभिन्न उमेर समूहबाट छनोट भएका खेलाडीबीच ‘अल्टिमेट ग्रान्ड’ च्याम्पियनसिप आयोजना गरिने खम्बूले जानकारी दिए। प्रत्येक उमेर समूहका शीर्ष तीन खेलाडीले उक्त प्रतियोगितामा स्थान बनाउनेछन्।

प्रतियोगिता फिडेका नियमअनुसार सञ्चालन हुनेछ। खेलाडीले आफ्नो उमेर समूह वा त्यसभन्दा माथिल्लो उमेर समूहमा प्रतिस्पर्धा गर्न पाउनेछन्। प्रतियोगिताको दर्ता शुल्क प्रतिइभेन्ट ३०० रुपैयाँ तोकिएको छ। खेल बिहान १०स्३० देखि दिउँसो २ बजेसम्म सञ्चालन हुने खम्बूले बताए।

एनपीएल-३ : जनकपुर बोल्ट्सविरुद्ध पोखरा एभेन्जर्सले टस जित्यो, पहिला बलिङ गर्ने

Sun, 01 Nov 2026 16:43:00 +0545

काठमाडौं । नेपाल प्रिमियर लिग (एनपीएल) मा जनकपुर बोल्ट्सविरुद्ध पोखरा एभेन्जर्सले टस जितेको छ ।

त्रिवि अन्तर्राष्ट्रिय क्रिकेट मैदानमा पोखरा एभेन्जर्सका कप्तान कुशल भुर्तेलले टस जितेर सुरुमा बलिङ रोजेका हुन् ।

योसँगै जनकपुर बोल्ट्सले सुरुमा ब्याटिङको निम्तो पाएको छ ।

जनकपुर बोल्ट्स लगातार दोस्रो जित निकाल्ने दाउमा छ । पहिलो खेलमा कर्णाली याक्ससँग १९ रनले पराजित जनकपुर बोल्ट्सले दोस्रो खेलमा भने काठमान्डु गोर्खाजलाई ८ विकेटले हराएको थियो । त्यसैले पनि जनकपुर बोल्ट्स लगातार दोस्रो जितको खोजीमा हुनेछ ।

उता, पहिलो खेलमा सुदूरपश्चिम रोयल्ससँग ६ विकेटले पराजित भएको पोखरा एभेन्जर्स जित यात्रा सुरु गर्ने रणनीतिमा हुनेछ । पोखरा एभेन्जर्स जनकपुरमाथि जित निकाल्दै २ अंक जोड्ने दाउमा हुनेछ । अघिल्ला दुई संस्करणमा प्लेअफसम्म पनि पुग्न नसकेको पोखरा यसपटक प्लेअफ पुग्न चाहन्छ ।

एनपीएलमा आज जनकपुर र पोखरा भिड्दै

Sun, 01 Nov 2026 07:47:00 +0545

काठमाडौं । जारी तेस्रो संस्करणको नेपाल प्रिमियर लिग (एनपीएल) अन्तर्गत आज एक खेल हुँदैछ ।

टियु क्रिकेट मैदानमा आज साँझ ५ बजेदेखि जनकपुर बोल्ट्स र पोखरा एभेन्जर्सबीच खेल हुँदैछ ।

जारी प्रतियोगितामा जनकपुर बोल्ट्सले एक जित र एक हार बेहोरेको छ भने पोखरा एभेन्जर्सले आफ्नो पहिलो खेल हारेको छ । जनकपुरले पहिलो खेल कर्णाली याक्ससँग १९ रनले हारेको थियो भने दोस्रो खेलमा काठमाडौँ गोर्खाजलाई ८ विकेटले पराजित गरेको थियो ।

त्यस्तै पोखरा एभेन्जर्सले भने पहिलो खेलमा सुदूरपश्चिम रोयल्ससँग ६ विकेटको हार बेहोरेको थियो ।

विराटनगरको पहिलो जित, सुदूरपश्चिम ३५ रनले पराजित

Sun, 01 Nov 2026 07:45:00 +0545

काठमाडौं । जारी नेपाल प्रिमियर लिग (एनपीएल) मा विराटनगर किंग्सले पहिलो जित हासिल गरेको छ ।

शनिबार राति सम्पन्न खेलमा विराटनगरले सुदूरपश्चिमलाई ३५ रनको अन्तरले पराजित गरेको हो ।

बर्षाका कारण ५-५ ओभरमा खेलाइएको खेलमा विराटनगरले दिएको १०६ रनको लक्ष्य पछाएको सुदूरपश्चिम रोयल्सले ५ ओभरमा ३ विकेट गुमाएर ७० रन मात्र बनाएको थियो ।

यसअघि टस हारेर पहिला ब्याटिंग गरेको विराटनगरले निर्धारित ५ ओभरमा २ विकेट गुमाएर १०५ रन बनाएको थियो ।

विराटनगरका लागि शेहान जयसूर्याले ३९ रन बनाएका थिए भने आन्द्रे रसेलले २९ र लोकेश बमले २५ रन बनाएका थिए ।

त्यस्तै, सुदूरपश्चिमका बलर अविनाश बोहोराले २ विकेट लिएका थिए । यो विराटनगरको तेस्रो खेलमा पहिलो जित हो भने सुदूरपश्चिमले ३ खेलमा दोस्रो हार बेहोरेको छ ।

सुदूरपश्चिमलाई विराटनगरले दियो १०६ रनको चुनौतीपूर्ण लक्ष्य

Sat, 31 Oct 2026 22:11:00 +0545

काठमाडौं । विराटनगर किंग्सले नेपाल प्रिमियर लिग (एनपीएल)को तेस्रो सिजनमा सुदूरपश्चिम रोयल्ससामु १०६ रनको लक्ष्य प्रस्तुत गरेको छ ।

कीर्तिपुरस्थित त्रिवि क्रिकेट रंगशालामा टस हारेर ब्यटिङमा उत्रिएको विराटनगरले सुदूरपश्चिमविरुद्ध पाँच ओभरमा दुई विकेट १०५ गुमाएर रन बनाएको हो ।

विराटनगरका सेहन जयसुर्याले ३९ रनको योगदान गरे । उनले ११ बलमा दुई चौका र पाँच छक्का प्रहार गरे । आन्द्रे रसेलले २९, लोकेश बमले २५ रन बनाए ।

सुदूरपश्चिमका अभिनाश बोहराले दुवै विकेट लिए । उनले दुई ओभरमा २८ रन खर्चिए । उनले पहिलो विकेटमा जसुर्यालाई एलबीडब्ल्यूको सिकार बनाए । २.३ ओभरमा अम्पायरले उक्त बलमा नटआउटको संकेत गरेका थिए । तर, सुदूरपश्चिमले डीआरएसको अपिल गर्दा उक्त निर्णय उल्ट्याउँदै टीभी अम्पायरले एलबीडब्ल्यूको संकेत गरेका हुन् । दोस्रो बलमा उनले लोकेशलाई कप्तान दीपेन्द्रसिंह ऐरीबाट क्याच गराएका थिए ।

टस गर्न सुदूरपश्चिमको आनाकानी, सुरु हुन सकेन खेल

Sat, 31 Oct 2026 20:00:00 +0545

काठमाडौं। नेपाल प्रिमियर लिग (एनपीएल) अन्तर्गत सुदूरपश्चिम रोयल्स र विराटनगर किंग्सबीचको खेल सुरु हुन सकेको छैन।

वर्षाका कारण प्रभावित खेल ५–५ ओभरमा खेलाउने तयारीसहित सुरुमा साँझ ७:२५ बजे टस गर्ने समय तय गरिएको थियो। तर, टस हुन नसकेपछि पुनः ७:३५ बजेका लागि समय निर्धारण गरियो।

दोस्रो पटक निर्धारित समयमा विराटनगर किंग्सका कप्तान सन्दीप लामिछाने टसका लागि पिचमा पुगे पनि सुदूरपश्चिम रोयल्सका कप्तान दीपेन्द्रसिंह ऐरी भने उपस्थित भएनन्। यससँगै खेल सञ्चालनबारे अन्योल थपिएको छ।

सौराहा अन्तर्राष्ट्रिय तेक्वान्दोमा प्रस्तुत र दीक्षालाई स्वर्ण

Sat, 31 Oct 2026 19:27:00 +0545

चितवनको न्यु स्टार तेक्वान्दो डोजाङका प्रस्तुत आचार्यले प्रथम सौराहा अन्तर्राष्ट्रिय तेक्वान्दो च्याम्पियनसिपमा ग्योरोगीमा स्वर्ण पदक जितेका छन् ।

चितवनस्थित रत्ननगर नगरपालिकामा शनिबार भएको च्याम्पियनसिपमा प्रस्तुतले ग्योरोगीतर्फ क्याडेट पुरुष ३३ केजी तौलसमूहमा स्वर्ण पदक जितेका हुन् र

उनले फाइनलमा उत्कृष्ट प्रदर्शन गर्दै अस्मिन थताललाई हराए । यसै तौल समूहमा सुभाष शाही ठकुरी र आदर्श भण्डारीले संयुक्त रूपमा कांस्य पदक जिते । नेपालकै करण धोलीले पनि ग्योरोगीमा स्वर्ण पदक जितेका छन् ।

सिनियर पुरुष ५४ केजी तौल समूहमा करणले नेपालकै अंकित अंकित साहानीलाई हराउँदै स्वर्ण जिते । अंकितले पहिलो खेलमा भारतका असिफ हुसेन र सेमिफाइनलमा बोनका राउतलाई हराएका थिए । करणले बंगलादेशका मोहम्मद साहिन अली र नेपालकै अजय घर्तीलाई हराउँदै फाइनलमा यात्रा तय गरेका हुन् । फाइनलमा पनि उनी हाबी भए । यसै विधामा अजय घर्ति र रोनक राउत तेस्रो भए । सब जुनियर महिला यु–२६ केजी तौलसमूहमा आयोजकका साहिल मन्सुरले नेपालकै अभिमन्यु गजुरेललाई हराउँदै स्वर्ण जिते ।

यसै विधामा भारतका अर्ष सोफियन कुरेस र नेपालका सुर्यान्सजंग न्यौपाने कांस्य जित्न सफल भए । सब जुनियर महिला २५ केजीमा दीपान्सी बायादीले स्वर्ण जितिन् । उनले फाइनलमा सार्वाना क्षेत्रीलाई हराइन् । यस तौलमा आत्मिका लिम्बू र चिरागी बस्याल कांस्य पदकमा नै सीमित भए । पुरुष सिनियर ५८ केजीमा नेपालका राजन लामाले स्वर्ण जिते । उनले फाइनलमा नेपालकै मोहमेद हुसेलाई हराए । यस विधामा नेपालकै कमल खड्का र अन्सुल परियारले कांस्य पदक पाए । सब जुनियर पुरुष २८ केजी तौलमा नेपालका सुप्रिम गुरुङले फाइनलमा नेपालकै सलिन अधिकारीलाई हराए ।

पुरुष ५८ केजी तौलसमूहमा नेपालका मोहम्मद हुसेनले स्वर्ण जिते । उनले फाइनलमा रोजन लामालाई हराए । महिला ४६ केजीमुनि नेपालकी दीक्षा तामाङले स्वर्ण जितिन् । उनले स्वर्णको प्रतिस्पर्धामा नेपालकै रस्मिका गुरुङलाई हराइन् । यस तौलमा प्रकृति मल्ल र अञ्जली चौधरी स्वर्ण जिते । पुरुष पुम्से (१०–११ वर्षको समूह) कियानराज कटुवालले स्वर्ण, समर्थ केसी रजत तथा श्रवण गुरुङ र रयान अर्यालले कांस्य जिते । कियानले ६.९९ अंक र समर्थले ६.७१६ अंक ल्याए । यसै उमेरसमूहको महिलामा बितिशा तामाङले स्वर्ण जितिन् । उनले सर्वाधिक ७.३४ अंक ल्याइन । एरिक न्यौपानेले ६.९३३ अंक प्राप्त गर्दै रजत जितिन् ।

यसै विधामा राज्बी श्रेष्ठ र मालाश्री महर्जनले कांस्य जिते । १४ देखि १४ वर्ष उमेरसमूहको पुम्सेमा नेपालकी रेवा काफ्लेले स्वर्ण र मुना थापाले रजत पदक जितिन् । रेवाले ६.९६६ र मुनाले ६.५९ अंक ल्याए । पुरुष १५ देखि १७ वर्ष उमेरसमूहमा बिसु राईले स्वर्ण, सचिन विकले रजत जित्दा अस्बिन लामा र शान केसीले कांस्य पदक जितेको आयोजक चितवन जिल्ला तेक्वान्दो डोजाङका प्रमुख रोशन खानले जानकारी दिए । च्याम्पियनसिपमा पुम्से र ग्योरोगी विधाअन्तर्गत विभिन्न उमेर तथा तौलसमूहमा प्रतिस्पर्धा हुँदैछ । नेपालसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, साउदी अरेबिया र जापानलगायतका करिब आठ सय खेलाडीले प्रतियोगितामा प्रतिस्पर्धा गर्ने अन्तर्राष्ट्रिय संयोजक अशोक खड्काले जानकारी दिए ।

टिम च्याम्पियनले ५० हजार रुपैयाँ, दोस्रो हुनेले ३० हजार र तेस्रो हुने टोलीले २० हजार रुपैयाँ पुरस्कार प्राप्त गर्नेछन् । प्रतियोगिताका संयोजक प्रज्वल दवाडीले ग्यरोगीतर्पm सब जुनियर (९–११ वर्ष), क्याडेट (१२–१४ वर्ष), जुनियर (१५–१७ वर्ष) र सिनियर (१८ वर्षमाथि) तथा पुम्सेमा गरी कुल ६४ स्वर्ण, ६४ रजत र १२८ कांस्य पदकका लागि प्रतिस्पर्धा हुने बताए । प्रतियोगिताका अन्तर्राष्ट्रिय संयोजक अशोक खड्काले उत्कृष्ट पुम्से पुरुष, उत्कृष्ट पुम्से महिला, उत्कृष्ट ग्योरोगी पुरुष, उत्कृष्ट ग्योरोगी महिला, उत्कृष्ट प्रशिक्षक र उत्कृष्ट रेफ्रीलाई जनही १०० अमेरिकी डलर पुरस्कार प्रदान गरिने जानकारी दिए ।

सुदूरपश्चिम र विराटनगरबीच ५–५ ओभरको खेल हुने

Sat, 31 Oct 2026 19:19:00 +0545

काठमाडौं । नेपाल प्रिमियर लिग(एनपीएल) अन्तर्गत सुदूरपश्चिम रोयल्स र विराटनगर किंग्सबीच ५–५ ओभरको खेल हुने भएको छ ।

वर्षाले प्रभावित खेलमा त्रिवि क्रिकेट मैदानमा ग्राउन्ड स्टाफको निकै कठिन परिश्रमपछि ५–५ ओभरको खेल हुने भएको हो ।

भर्खरै मैदानको निरीक्षणपश्चात अम्पायरहरूले ५–५ ओभर खेल हुने निर्णय लिएका छन् ।

एनपीएल : क्रिकेट मैदान जलमग्न भएपछि आजको पहिलो खेल रद्द

Sat, 31 Oct 2026 14:16:00 +0545

काठमाडौं । तेस्रो संस्करणको नेपाल प्रिमियर लिग (एनपिएल) अन्तर्गत आज हुने भनिएको लुम्बिनी लायन्स र चितवन राइनोजबीचको खेल स्थगित गरिएको छ ।

लगातारको झरीले मैदान खेलाउन योग्य नभएपछि लुम्बिनी र चितवनबीचको खेल रद्द गरिएको नेपाल क्रिकेट सङ्घ (क्यान) का सचिव पारस खड्काले जानकारी दिए । उनका अनुसार बिहीबार रातिदेखि परेको वर्षाका कारण कीर्तिपुरस्थित त्रिभुवन अन्तरराष्ट्रिय क्रिकेट मैदान पूरै भिजेको छ ।

खेल रद्द भएसँगै चितवन र लुम्बिनीले एक-एक अङ्क बाँडेका छन् ।

क्यानका अनुसार आज हुने दोस्रो खेलमा विराटनगर किङ्स र सुदूरपश्चिम रोयल्स खेल्ने तालिका छ । उक्त खेल अपरान्ह ५ः०० बजेदेखि सुरु हुने पूर्वनिर्धारित तालिका रहेको उक्त खेल पनि वर्षाले प्रभावित हुने सम्भावना छ ।

गेमिङ क्षेत्रलाई उद्योगका रूपमा विकास गरिने : प्रधानमन्त्री शाह

Sat, 31 Oct 2026 12:55:00 +0545

प्रधानमन्त्री वालेन्द्र शाह (बालेन) ले नेपालमा गेमिङ तथा आईटी क्षेत्रलाई उद्योगका रूपमा विकास गर्न र यस क्षेत्रलाई सहजीकरण गर्न नीतिगत पुनरावलोकन तथा आवश्यक गृहकार्य सुरु गरिएको जानकारी दिएका छन्।

सामाजिक सञ्जाल फेसबुकमार्फत शनिबार आफ्नो धारणा सार्वजनिक गर्दै प्रधानमन्त्री शाहले नेपालमा सयौँ युवा गेम एप विकासमा सक्रिय रहेको उल्लेख गरेका छन्। ‘सयौँ युवाहरू गेम एप बनाउन तल्लीन हुनुहुन्छ। हामीले उहाँहरूलाई बोलाएर समस्याहरू पनि बुझ्यौँ र गेम डेभलपमेन्ट क्षेत्रलाई सहज बनाउँदै उद्योगका रूपमा अघि बढाउने विषयमा छलफल गर्‍यौँ,’ उनले लेखेका छन्, ‘अब उहाँहरूका समस्या समाधान गर्ने गृहकार्य अघि बढाइएको छ। नेपालबाटै ग्लोबल युनिकर्न कम्पनी बनाउन सहज हुने नियम र वातावरण निर्माणका लागि आवश्यक सबै पक्षको पुनरावलोकन गर्नेछौँ।’

प्रधानमन्त्री शाहले नेपालमै विकसित गेमिङ एपहरूले विश्वभर पहिचान बनाइरहेको उल्लेख गर्दै यस क्षेत्रको सम्भावना र विकासका लागि सरकारले आवश्यक पहल गर्ने बताएका छन्। उनका अनुसार विश्वभर लोकप्रिय लुडो गेमले करिब २० करोड र कलब्रेक गेमले १५ करोडभन्दा बढी डाउनलोड हासिल गरेका छन्। यी गेम नेपालीले नै विकास गरेको उल्लेख गर्दै उनले सयौँ युवा गेम विकासमा सक्रिय रहेको बताएका छन्।

त्यसैगरी, नेपालबाटै विश्वस्तरीय ‘ग्लोबल युनिकर्न’ कम्पनी स्थापना गर्न अनुकूल वातावरण निर्माण गरिने प्रधानमन्त्री शाहले बताएका छन्। आईटी उत्पादन तथा निर्यातको सम्भावनालाई ध्यानमा राख्दै यस क्षेत्रका कम्पनीले सहज रूपमा आम्दानी गर्न र त्यसलाई पुनः लगानी गर्न सक्ने वातावरण बनाइने उनको भनाइ छ।

यसका लागि कर प्रणालीलाई सहज बनाउने, नीतिगत सुधार गर्ने तथा अन्तर्राष्ट्रिय आम्दानीसम्बन्धी विद्यमान कडा र परम्परागत नियमलाई थप सहज बनाउने विषयमा काम गरिने उनले उल्लेख गरेका छन्।

गेमिङ र समग्र आईटी क्षेत्रलाई प्रवर्द्धन गर्न ‘गेम ज्याम’, ‘स्टार्टअप इभेन्ट्स’ तथा ‘ह्याकाथन’ जस्ता कार्यक्रमहरूमा लगानी गरिने र आईटी क्षेत्र, नेपाल राष्ट्र बैंक र अर्थ मन्त्रालयबीच निरन्तर र नियमित छलफलको वातावरण मिलाइने उनले बताएका छन्।

नेपाली युवाको सीप, सिर्जनशीलता र प्रविधिको क्षमतालाई उपयोग गर्दै नेपालमै अन्तर्राष्ट्रिय बजारमा प्रतिस्पर्धा गर्न सक्ने आईटी तथा गेमिङ उद्योगको विकास गर्ने सरकारको लक्ष्य रहेको उनको भनाइ छ।

नेपालगन्ज रङ्गशालामा पूर्वाधार भएपनि संरक्षणको अभाव

Sat, 31 Oct 2026 12:21:00 +0545

नेपालगन्जको रङ्गशालामा खेलकुद पूर्वाधार भएपनि उचित प्रयोग र संरक्षणको अभाव देखिएको छ ।

खेलकुद पूर्वाधारलाई खेलाडी उत्पादनको श्रोत मानिएपनि यसबाट खेलाडी उत्पादन हुन नसक्दा खेलाडी अभावमा पूर्वाधारको संरक्षण हुन नसकेको हो ।

पौडी खेलका एसिएन अफिसियल दामोदर अर्यालले नेपालगन्जमा रहेको खेलकुद पूर्वाधारले गिज्जाइरहेको उल्लेख गर्दै अपनत्वका कारण आर्थिक अभावले पूर्वाधारको संरक्षण हुन नसकेको बताउनुभयो ।

उहाँले नेपालगन्जको रङ्गशालामा खेलकुद पूर्वाधारको विकास आठौं राष्ट्रिय खेलकुदमा भएको जानकारी दिँदै पूर्वाधारले खेलाडी खोजीरहेको उल्लेख गर्नुभयो ।

अर्यालले भन्नुभयो, “आर्थिक अभावका कारण त्यहाँ रहेको पौडी पोखरी तीन वर्षअघिदेखि स्विमिङ क्लवको पहलले इज्जत जोगारहेको छ”

सो रङ्गशालामा रहेको एक मात्र पौडी पोखरीको सरसफाइमा मात्रै करिव दुई लाखदेखि तीन लाखसम्म अतिरिक्त खर्च भएको छ । नेपालगन्ज स्वीमिङ क्लबका अध्यक्ष केशव न्यौपानेले नियमित खेल हुने पौडी पोखरीमा नियमित सरसफाइ नभएकाले पोखरी सफा गर्न सो रकम खर्च भएको जानकारी दिनुभयो ।

नेपालगन्ज स्वीमिङ क्लबको आयोजनामा कात्तिक १४ र १५ गते नेपालगन्ज रङ्गशालामा हुने तेस्रो नेपालगन्ज अन्तरराष्ट्रिय स्वीमिङ च्याम्पियनसिपका लागि पोखरी सफाइ तथा आन्तरिक व्यवस्थापनको काम पूरा भएको उहाँले बताउनुभयो ।

मध्यपश्चिम खेलकुद विकास समितिका प्रमुख महेश चन्दले रङ्गशालाको आन्तरिक स्रोत परिचालनबाट सक्दो काम भइरहेको उल्लेख गर्दै सङ्घीयता लागुभएपछि बजेट आउन कठिनाई भएको बताउनुभयो ।

स्वीमिङ क्लबका महासचिव कृष्ण अधिकारीले पौडी प्रतियोगिताका लागि सबै तयारी पुरा भएको उल्लेख गर्दै भारत, नेपालका गरी २०० खेलाडीले नाम दर्ता गरेको जानकारी दिनुभयो ।

प्रतियोगितामा यसपटक स्वदेशी खेलाडीसँगै भारतीय खेलाडीको सहभागिताले प्रतिस्पर्धालाई थप रोचक बनाउने अपेक्षा गरिएको छ । प्रतियोगितामा विभिन्न उमेर समूहका खेलाडीबीच प्रतिस्पर्धा हुनेछ । यसले नयाँ प्रतिभादेखि अनुभवी खेलाडीसम्मलाई आफ्नो क्षमता प्रदर्शन गर्ने अवसर दिने आयोजकको जनाएका छन् ।

क्लबका अनुसार अण्डर आठदेखि अण्डर १७ तथा ओपन अर्थात १७ वर्षभन्दा बढी उमेरका खेलाडीले फ्रि स्टाइल, बेष्टस्ट्रोक, ब्याकस्ट्रोक, बटरफ्लाइ, रिले र व्यक्तिगत मेड्ले गरि ६ छुट्टाछुट्टै बिधाका ८० वटा इभेन्टमा प्रतिस्पर्धा गर्नेछन् । क्लबले पहिलो र दोस्रो संस्करण सम्पन्न गरिसकेको छ । प्रतियोगिता सम्पन्न गर्न रु ३५ लाख खर्च हुने अनुमान गरिएको छ ।

डकार र्‍याली: सुरक्षा चिन्ताले साउदी अरबबाट हट्यो, अब मोरक्को र पोर्चुगलमा हुने

Sat, 31 Oct 2026 12:15:00 +0545

सुरक्षा चिन्ताका कारण साउदी अरबमा डकार र्‍याली आयोजना नहुने घोषणा गरेको पाँच दिनपछि आयोजक 'अमोरी स्पोर्ट अर्गनाइजेसन' ले सन् २०२७ को डकार र्‍याली मोरक्कोमा हुने जानकारी दिएको छ। यसअन्तर्गतको 'प्रोलोग' (सुरुआती चरण) र पहिलो चरण भने पोर्चुगलमा सञ्चालन हुनेछन्।

अर्गनाइजेसनले जारी गरेको विज्ञप्तिमा भनिएको छ, “पोर्चुगलको अल्गार्वे क्षेत्रमा प्रोलोग र पहिलो विशेष चरण आयोजना हुनेछन्। मोरक्कोले उत्तरदेखि सुदूर दक्षिणसम्म आफ्नो सम्पूर्ण भू-भाग समेट्ने गरी ११ वटा चरणहरू र अगादिरमा एक दिनको विश्रामको आयोजना गर्नेछ।”

डकार र्‍यालीको ४९औँ संस्करण, जुन सुरुमा जनवरी १ देखि जनवरी १५ सम्म सञ्चालन हुने तय गरिएको थियो, अब जनवरी ९ देखि जनवरी २३ सम्म हुने भएको छ। यद्यपि, यसका लागि इन्टरनेसनल अटोमोबाइल फेडेरेसनको 'वर्ल्ड मोटर स्पोर्ट काउन्सिल' को स्वीकृति आवश्यक पर्नेछ।

डकारका निर्देशक डेभिड क्यास्टेराले भने, “नयाँ स्थानमा आयोजना हुन लागेको डकारको ४९औँ संस्करणले ती खेलकुद मापदण्डहरू पूरा गर्नेछ, जसले यसलाई सधैं सबैभन्दा चुनौतीपूर्ण 'र्‍याली-रेड' प्रतियोगिता बनाएका छन्।”

“हामीसँग काम गर्नका लागि निकै कम समय भए तापनि हामीले एउटा वास्तविक 'डकार' को रूपरेखा तयार पारेका छौं।”

डकार २०२७ मा 'लोले-फारो' देखि 'माराकेस' सम्मको कुल ७,८२४ किलोमिटर (४,८६२ माइल) को दूरी समेटिनेछ, जसमा ४,३४१ किलोमिटर (२,६९७ माइल) को 'विशेष चरण' हरू समावेश हुनेछन्।

अर्गनाइजेसनले जनाए अनुसार साउदी अरबबाट यो दौड अन्यत्र सार्ने निर्णय “असाधारण र एकपटकका लागि मात्र” हो। सन् २०२० देखि यस प्रतियोगिताको आयोजना गर्दै आएको साउदी अरबमा, सन् २०२८ मा हुने डकार र्‍यालीको ५०औँ संस्करण पुनः फर्किनेछ।

मोरक्कोमा यो दौड आयोजना हुनुको अर्थ, सन् २००८ पछि पहिलो पटक डकार र्‍याली अफ्रिकामा फर्कँदै छ।

सन् १९७८ मा सुरु भएको यो प्रतियोगिता पेरिसबाट सहारा मरुभूमि हुँदै पश्चिम अफ्रिकी राष्ट्र सेनेगलको राजधानी डकारसम्मको दौडका रूपमा थालिएको थियो। यसलाई लामो समयदेखि विश्वकै सबैभन्दा कठिन मोटरस्पोर्ट चुनौतीका रूपमा लिइँदै आएको छ।

सुरक्षाका कारण अफ्रिकाबाट हटाइएपछि, सन् २००९ देखि २०१९ को बीचमा यसलाई दक्षिण अमेरिकामा आयोजना गरिएको थियो।

फिफा महिला विश्वकप: १५ अर्ब डलर आम्दानी गरे पनि महिला टाेलीलाई कम रकम

Sat, 31 Oct 2026 12:12:00 +0545

यस गर्मीमा आयोजित पुरुष प्रतियोगिताबाट १५ अर्ब डलर (११.२ अर्ब पाउन्ड) को कीर्तिमानी आम्दानी गरे पनि फिफाले अर्को वर्ष हुने महिला विश्वकपमा प्रदान गरिने पुरस्कार रकममा लैंगिक समानता कायम गर्न असफल हुने देखिएको छ।

फिफा अध्यक्ष जियानी इन्फान्टिनोले सन् २०२३ मा संस्थाको "महत्वाकांक्षा" सन् २०२७ सम्ममा पुरस्कार रकममा "समानता" ल्याउने रहेको बताएका थिए। उनले भनेका थिए, "फिफा केवल शब्दमा मात्र होइन, काममा पनि अघि बढिरहेको छ।" त्यसैले, महिला फुटबल जगतमा यो व्यापक आशा थियो कि सन् २०२७ को पुरस्कार रकम कम्तीमा प्रति-टोलीको आधारमा पुरुष प्रतियोगिताको बराबर हुनेछ।

पुरुष प्रतियोगितामा ४८ टोलीहरू थिए भने अर्को गर्मीमा ब्राजिलमा हुने महिला प्रतियोगितामा ३२ टोलीहरू सहभागी हुनेछन्। तसर्थ, पुरुषहरूको ६५ करोड ५० लाख (६५५ मिलियन) डलरको पुरस्कार राशिको दुई-तिहाइ हिस्सा महिलाहरूका लागि छुट्याइएको भए त्यसलाई समानता मान्न सकिन्थ्यो तर महिलाहरूको पुरस्कार रकम पुरुषहरूको तुलनामा करिब एक-तिहाइ मात्र हुने बुझिएको छ।

यद्यपि, यो रकममा भएको उल्लेखनीय वृद्धि हो। हालैका हप्ताहरूमा भएका विस्तृत वार्ताहरूबारे जानकारी राख्ने केही स्रोतहरूले यस वृद्धिलाई निजी रूपमा सकारात्मक रूपमा लिएका छन् तर एक वरिष्ठ महिला स्रोतले भने फिफाको यस कदमलाई "ठूलो अवसर गुमाएको" भनी टिप्पणी गरेकी छिन्। डिसेम्बरमा हुने फिफा काउन्सिलको बैठक अघि यससम्बन्धी कुनै पनि निर्णय आधिकारिक हुने अपेक्षा गरिएको छैन।

फिफाले महिला प्रतियोगिताको पुरस्कार रकमलाई पुरुष प्रतियोगिताको बराबर नबनाउने कुरा सार्वजनिक गरेको 'स्काई न्युज' ले जनाए अनुसार महिला प्रतियोगिताको पुरस्कार राशि सन् २०२३ को ११ करोड (११० मिलियन) डलरबाट बढाएर २२ करोड (२२० मिलियन) डलर पुर्‍याउने लक्ष्य राखिएको छ। यो सन् २०१९ मा फ्रान्समा भएको महिला विश्वकपको तुलनामा सात गुणाभन्दा बढीको वृद्धि हो।

यस वर्ष पुरुष टोलीहरूका लागि छुट्याइएको फिफा पुरस्कार रकममा विजेता स्पेनका लागि ५ करोड (५० मिलियन) डलर समावेश थियो। फिफाका उच्च अधिकारीहरूले महिला फुटबलमा गरिने व्यापक लगानीबारे जानकारी दिन र एउटा निर्णयको व्याख्या गर्न केही प्रमुख महिला खेलाडीहरूसँग कुराकानी गरेको बुझिएको छ। उक्त निर्णय सन् २०२७ को प्रतियोगिताबाट प्राप्त हुने व्यावसायिक आम्दानीसँग सम्बन्धित रहेको मानिएको छ।

फिफाका अनुसार, सन् २०२३ को महिला प्रतियोगितालाई परम्परागत टेलिभिजनमा ९३३ मिलियन र स्ट्रिमिङ प्लेटफर्महरूमा ८९५ मिलियन दर्शकले हेरेका थिए। यसअघि इन्फान्टिनोले महिला प्रतियोगिताको टेलिभिजन प्रसारण अधिकारका लागि पर्याप्त रकम नतिरेको भन्दै प्रसारकहरूको आलोचना गरेका थिए। फिफाका अनुसार सिड्नीमा इङ्गल्याण्ड र स्पेनबीच भएको फाइनल खेल ६ करोड ७० लाख (६७ मिलियन) मानिसले प्रत्यक्ष हेरेका थिए भने समग्रमा यो खेल २२ करोड २० लाख (२२२ मिलियन) मानिससम्म पुगेको थियो।

'द गार्जियन' ले सम्पर्क गर्दा फिफाले यस विषयमा कुनै टिप्पणी गरेन, तर उक्त संस्थाका स्रोतहरूले महिला क्लब लाभ कार्यक्रममा थप सुधार गरिने र प्रतियोगितामा सहभागी हुने खेलाडीहरूका लागि छुट्टै रकम विनियोजन गरिने बताएका छन्।

यस महिना यो पुष्टि भएको छ कि सन् २०२७ को महिला विश्वकपमा सहभागी हुने टोलीहरूले फिफाबाट पुरुष विश्वकपमा सहभागी टोलीहरूले पाए सरहकै तयारी रकम प्राप्त गर्नेछन्। यो तयारी रकम दोब्बरभन्दा बढीले वृद्धि गरी प्रतिटोली २५ लाख अमेरिकी डलर (२.५ मिलियन डलर) पुर्‍याइएको छ।

प्रत्येक खेलाडीका लागि 'बिजनेस क्लास' वा चार्टर्ड उडानको सुनिश्चितता गरिएको छ। साथै, उनीहरूले अरूसँग कोठा बाँड्नु नपर्ने गरी छुट्टाछुट्टै होटल कोठा पाउनेछन्। फिफाका अनुसार, यी व्यवस्थाहरू अब पुरुष विश्वकपमा गरिएका व्यवस्थाहरूसँग समान भएका छन्।

शुक्रबारदेखि सौराहा अन्तर्राष्ट्रिय तेक्वान्दो च्याम्पियनसिप सुरु

Sat, 31 Oct 2026 11:04:00 +0545

चितवन, कात्तिक १३ । चितवनको रत्ननगर नगरपालिकामा शुक्रबारदेखि चारदिने अन्तर्राष्ट्रिय खुला तेक्वान्दो च्याम्पियनसिप सुरु भएको छ।

रत्ननगर नगरपालिकामा शुक्रबार एक भव्य सामारोहका बीच प्रथम सौराहा अन्तर्राष्ट्रिय खुला तेक्वान्दो च्याम्पियनसिप सुरु भएको हो। बागमती प्रदेशका पूर्वमुख्यमन्त्री एवम् नेपाली कांग्रसका नेता इन्द्र बानियाँले पानसमा दीप प्रज्वलन गरी चारदिने प्रतियोगिताको उद्घाटन गरे। उद्घाटनका अवसरमा नेपाली तेक्वान्दो डेमोन्स्ट्रेसन टोलीले आफ्नो डेमोन्स्ट्रेसन प्रस्तुती दिएका थिए। कार्यक्रममा चितवन तेक्वान्दो डोजाङको भवन निर्माणमा योगदान पु¥याएका दीपक बाबु नेपाललाई बागमती प्रदेशका पूर्वमुख्यमन्त्री इन्द्र बानियाँ र डोजाङ प्रमुख रोशन खानले सम्मानपत्रबाट सम्मान गरिएको थियो।

कार्यक्रममा साथै विभिन्न देशको मार्चपास्ट, स्थानीय थारु समुदायको नाचका साथै सांस्कृतिक र सांगीतिक प्रस्तुती पनि प्रतियोतिाको आकर्षण बनेको थियो। सो कार्यक्रमममा बागमती प्रदेशका पूर्वमुख्यमन्त्री बानियाँले खेलकुदको देशको प्रतिष्ठा बढाउने माध्यम मात्र नभएर स्वस्थ नागरिक निर्माणको माध्यम पनि रहेकाले यसको विकासका लागि राज्यले लगानी बढाउनुपर्ने बताए । हरेक नागरिकले आफ्नो मानसिक स्वास्थ्यका लागि पनि खेल खेल्न आवश्यक रहेको औंल्याउँदै बानियाँले राज्यले यसतर्पm जनतालाई अग्रसर गराउनुपर्ने धारणा राखेका छन्।

नेपाली कांग्रेसका केन्द्रीय सदस्यसमेत रहेका बानियाँले बागमती प्रदेश सरकारले चितवनलाई नेपालकै पर्यटकीय नगरीका रूपमा विकास गर्दै यस प्रदेशका खेलाडीलाई राष्ट्रिय तथा अन्तर्राष्ट्रिय स्तरसम्म पु¥याउन लगानी गर्दै आएको बताएका छन्। नेपाल तेक्वान्दो संघका अध्यक्ष दीपराज गुरुङले अन्तर्राष्ट्रिय प्रतियोगिता आयोजनाका लागि चितवनका सबै स्थानीयले सहयोग गरेको उल्लेख गर्दै यसै प्रतियोगिता आयोजना गर्न भौतिक पूर्वाधार आवश्यक रहेको औंल्याए। विभिन्न देशका खेलाडीहरूले सुविधा सम्पन्न खेल पूर्वाधार प्रतिस्पर्धा गर्न पाएको खण्डमा विश्वभर नेपालबारे राम्रो सन्देश जाने र खेलाडी उत्पादनमा पनि मद्दत मिल्ने संघका अध्यक्ष गुरुङको भनाइ थियो।

चितवन तेक्वान्दो डोजाङको आयोजनामा सुरु भएको प्रतियोगिता कात्तिक १५ गतेसम्म सञ्चालन हुनेछ। चितवन तेक्वान्दो डोजाङका प्रमुख रोशन खानले प्रतियोगिताको प्रतिस्पर्धा शनिबारदेखि सुरु हुने जानकारी दिए। च्याम्पियनसिपमा पुम्से र ग्योरोगी विधाअन्तर्गत विभिन्न उमेर तथा तौलसमूहमा प्रतिस्पर्धा हुँदैछन्। नेपालसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, साउदी अरेबिया र जापानलगायतका करिब आठ सय खेलाडीले प्रतियोगितामा प्रतिस्पर्धा गर्ने अन्तर्राष्ट्रिय संयोजक अशोक खड्काले जानकारी दिए। टिम च्याम्पियनले ५० हजार रुपैयाँ, दोस्रो हुनेले ३० हजार र तेस्रो हुने टोलीले २० हजार रुपैयाँ पुरस्कार प्राप्त गर्नेछन्।

प्रतियोगिताका संयोजक प्रज्वल दवाडीले ग्यरोगीतर्पm सब जुनियर (९–११ वर्ष), क्याडेट (१२–१४ वर्ष), जुनियर (१५–१७ वर्ष) र सिनियर (१८ वर्षमाथि) तथा पुम्सेमा गरी कुल ६४ स्वर्ण, ६४ रजत र १२८ कांस्य पदकका लागि प्रतिस्पर्धा हुने बताए । प्रतियोगिताका अन्तर्राष्ट्रिय संयोजक अशोक खड्काले उत्कृष्ट पुम्से पुरुष, उत्कृष्ट पुम्से महिला, उत्कृष्ट ग्योरोगी पुरुष, उत्कृष्ट ग्योरोगी महिला, उत्कृष्ट प्रशिक्षक र उत्कृष्ट रेफ्रीलाई जनही १०० अमेरिकी डलर पुरस्कार प्रदान गरिने जानकारी दिए । प्रतियोगिताका संयोजक प्रज्वल दवाडीले यो प्रतियोगितामार्पmत चितवन राष्ट्रिय तथा अन्तर्राष्ट्रिय खेलाडी उत्पादनमा ठूलो टेवा पुग्ने विश्वास व्यक्त गरेका छन् ।

धनगढी एफसी र काठमाडौं स्पोर्ट्स डेभलपमेन्टबीच साझेदारी

Sat, 31 Oct 2026 08:07:00 +0545

काठमाडौं । धनगढी फुटबल क्लब (धनगढी एफसी) र काठमाडौं स्पोर्ट्स डेभलपमेन्ट भेन्चर्स प्रालिबीच सहकार्य भएको छ। दुवै संस्थाको साझेदारीमा फुटबल, क्रिकेटसहित अन्य खेलकुद गतिविधि अघि बढाउन सुदूरपश्चिम स्पोर्ट्स भेन्चर्स कम्पनी स्थापना गरिएको छ।

नयाँ कम्पनीमा धनगढी एफसीका सञ्चालक सुवास शाही र काठमाडौं स्पोर्ट्स डेभलपमेन्ट भेन्चर्सको समान लगानी रहनेछ। सम्झौताअनुसार डा. उपेन्द्र महतो कम्पनीको अध्यक्ष, सुवास शाही सञ्चालक र अनुभव स्वाँर सिरोहिया कार्यकारी निर्देशक रहनेछन्।

कम्पनीको बोर्डमा थप सदस्यसमेत नियुक्त गरिने जनाइएको छ। नयाँ संरचनाअन्तर्गत धनगढी एफसीले हालै घोषणा भएको नेपाल फुटबल लिग (एनएफएल) खेल्नेछ। साथै, ग्रासरुट र महिला फुटबलको विकासमा समेत लगानी गर्ने योजना रहेको छ। धनगढी एफसीको स्थापना भएको ६ वर्ष भइसकेको छ।

गो ड्रिमर्सको स्वामित्वमा रहेको क्लबले नेपाल सुपर लिग (एनएसएल) का पहिलो दुई संस्करणमा फाइनल खेलेको थियो भने तेस्रो संस्करणमा प्लेअफसम्मको यात्रा तय गरेको थियो। क्लबले सुदूरपश्चिमको प्रतिनिधित्व गर्दै फुटबलसँगै विभिन्न सामाजिक गतिविधिमा पनि सहभागिता जनाउँदै आएको छ।

काठमाडौं स्पोर्ट्स डेभलपमेन्ट भेन्चर्सको टोली काठमाडौं गोर्खाजले नेपाल प्रिमियर लिग (एनपीएल) क्रिकेट खेल्दै आएको छ। नयाँ साझेदारीसँगै कम्पनीले क्रिकेटमा गरेको लगानीलाई अन्य खेलकुदमा समेत विस्तार गर्ने लक्ष्य राखेको छ। सुदूरपश्चिम स्पोर्ट्स भेन्चर्सका सञ्चालक शाहीले नेपाली फुटबलमा निजी क्षेत्रको लगानी भित्रिनु सकारात्मक सन्देश भएको बताए।

'अहिलेको अवस्थामा लगानी भित्रिनुले नेपाली फुटबलमा ठूलो सन्देश जानेछ। व्यक्तिगत रूपमा मैले यसलाई निकै सकारात्मक रूपमा लिएको छु। काठमाडौं स्पोर्ट्स डेभलपमेन्ट भेन्चर्सलाई धनगढी एफसीमा स्वागत गर्न चाहन्छु। यसले नेपाली फुटबलमा केही गर्न सकिन्छ भन्ने देखाएको छ,’ उनले भने। उनले यस्तो साझेदारीले अन्य क्लबका लागि पनि लगानीको ढोका खोल्ने विश्वास व्यक्त गरे। साथै, यसले सुदूरपश्चिमको पर्यटनलगायत अन्य क्षेत्रको विकासमा पनि योगदान पुर्‍याउने उनको भनाइ छ।

कम्पनीका कार्यकारी निर्देशक अनुभव स्वाँर सिरोहियाले क्रिकेटमा गर्दै आएको लगानीलाई अन्य खेलमा विस्तार गर्ने उद्देश्यले धनगढी एफसीसँग सहकार्य गरिएको बताए। उनले भने, ‘काठमाडौं स्पोर्ट्स डेभलपमेन्ट भेन्चर्समार्फत हामीले क्रिकेटमा ठूलो लगानी गर्दै आएका छौं। त्यसलाई अन्य खेलकुदमा विस्तार गर्ने उद्देश्यले धनगढी एफसीसँग जोडिएर सुदूरपश्चिम स्पोर्ट्स भेन्चर्स स्थापना गरेका हौं। नेपालको लोकप्रिय खेल फुटबलसँग आबद्ध हुनु हाम्रा लागि ठूलो अर्थ राख्छ। नेपाली फुटबललाई अझ लोकप्रिय बनाउने उद्देश्यका साथ हामी आएका छौं।´

लेहाभ्रेमाथि पिएसजीको ५–१ को शानदार जित

Sat, 31 Oct 2026 07:50:00 +0545

काठमाडौं । फ्रान्सेली घरेलु फुटबल प्रतियोगिता लिग वानअन्तर्गत भएको खेलमा पेरिस सेन्ट जर्मेन (पिएसजी) ले लेहाभ्रेलाई ५–१ गोलले पराजित गरेको छ ।

गएराती सम्पन्न खेलमा पिएसजीले उत्कृष्ट प्रदर्शन गर्दै फराकिलो जित निकालेको हो ।

खेलको १८औँ मिनेटमा जोस माजाले गोल गर्दै लेहाभ्रेलाई सुरुवाती अग्रता दिलाएका थिए । तर पिएसजीले त्यसको आठ मिनेटपछि नै मिका गोड्ट्सको गोलबाट खेल बराबरीमा ल्यायो । त्यसको दुई मिनेटपछि अचरफ हाकिमीले गोल गर्दै पिएसजीलाई २–१ को अग्रता दिलाए ।

दोस्रो हाफमा हाकिमीले आफ्नो उत्कृष्ट प्रदर्शनलाई निरन्तरता दिए । उनले ५५औँ मिनेटमा फ्रिकिकमार्फत व्यक्तिगत दोस्रो गोल गरे भने ६२औँ मिनेटमा सेनी मायुलुले गोल गर्दै पिएसजीको अग्रता ४–१ बनाए ।

खेलको ६९औँ मिनेटमा हाकिमीले व्यक्तिगत तेस्रो गोल गर्दै ह्याट्रिक पूरा गरे । उनले यस खेलमा तीन गोल गर्नुका साथै दुई गोलका लागि अवसरसमेत सिर्जना गरेका थिए । उनको उत्कृष्ट प्रदर्शन पिएसजीको जितमा निर्णायक बन्यो ।

यस जितसँगै पिएसजीले लिग वानमा आफ्नो शीर्ष स्थान थप मजबुत बनाएको छ । नौ खेलबाट २० अंक जोडेको पिएसजी शिर्ष स्थानमा छ ।

यता लिगको पुछारमा रहेको लेहाभ्रे भने लगातार पाँचौँ हार बेहोर्दै दबाबमा परेको छ ।

वर्षाका कारण एनपीएलमा आजका खेल हुने सम्भावना कम

Sat, 31 Oct 2026 07:43:00 +0545

काठमाडौं । नेपाल प्रिमियर लिग (एनपीएल) अन्तर्गत आज हुने तय भएका दुवै खेल प्रभावित हुने सम्भावना बढेको छ ।

काठमाडौंमा निरन्तर झरी परिरहेकोले कीर्तिपुर मैदान पनि चिसो हुँदा आजका खेल नहुने सम्भावना बढेको हो ।

अस्तिको खेल सकिएपछि मैदानलाई कभरले ढाकिएको छ । पानी पर्ने क्रम अहिले बिहानसम्म पनि रोकिएको छैन ।

मौसमविद्काअनुसार दिउँसोसम्म नै पानी पर्ने सम्भावना छ । तालिकाअनुसार आज दिउँसो साढे १२ बजे लुम्बिनी लायन्स र चितवन राइनोज तथा बेलुका ५ बजे विराटनगर किङ्स र सुदूरपश्चिम रोयल्सबीच खेल रहेको छ ।

एनपीएलमा रिजर्भ डे नराखिएकाले खेल रद्द वा नतिजाविहीन भए टोलीहरूले समान एक/एक अंक बाँड्ने छन् ।

मैदान तयार हुन सके कम्तिमा ५ ओभरको खेल खेलाउने सम्भावना भने कायमै रहन्छ ।

वडा कप राष्ट्रिय ¥यापिड चेस हुने

Fri, 30 Oct 2026 20:27:00 +0545

काठमाडौं कात्तिक १३ गते । काठमाडौं स्पोर्ट्स एकेडेमीको आयोजनामा केएसए काठमाडौं १६ वडा कप राष्ट्रिय ¥यापिड चेस प्रतियोगिता कात्तिक १७ गतेदेखि हुने भएको छ।

प्रतियोगिता स्वीस लिग प्रणाली बमोजिम ९ चरणको हुने आयोजक एकेडेमीका अध्यक्ष नारायणदास गमालले जनाएका छन्। प्रतियोगिताको कुल पुरस्कार राशी २ लाख ५३ हजार रुपैयाँ रहेको छ।

खुलातर्फ १ हजार र महिला तथा १६ वर्षमुनि उमेरसमूह खेलाडीका लागि ५ सय दर्ता शुल्क तोकिएको छ। उपत्यका बाहिरका खेलाडीको आवासको व्यवस्था आयोजकले गर्ने बताइएको छ।

काठमाडौं महानगरपालिका वडा १६ र काठमाडौं जिल्ला बुद्धिचाल संघको सह–आयोजनामा हुने दुईदिने प्रतियोगिताका खेलहरु नयाँ बजारस्थित मल्टि भेन्युमा खेलाइने छ।

नेपाल फुटबल लिगमा तीन नयाँ क्लब थपिने

Fri, 30 Oct 2026 18:06:00 +0545

काठमाडौं। नेपाल फुटबल लिग (एनएफएल) ले तीन नयाँ क्लब थप्ने प्रक्रिया अघि बढाएको छ। लिगले विराटनगर, धरान, जनकपुर, वीरगञ्ज, हेटौंडा, भक्तपुर, नेपालगञ्ज र सुर्खेतलगायत सहरलाई आफ्नो प्रतिनिधित्व गर्ने फुटबल क्लब स्थापनाका लागि बोलपत्र पेस गर्न आह्वान गरेको हो।

नयाँ क्लबका लागि बोलपत्र पेस गर्ने अन्तिम मिति १६ नोभेम्बर २०२६ अर्थात् ३० कात्तिक २०८३ तोकिएको छ। बोलपत्र फारामको शुल्क ५० हजार रुपैयाँ निर्धारण गरिएको छ। उक्त शुल्क फिर्ता नहुनेछैन।

नयाँ क्लबका लागि आवेदन दिने इच्छुक पक्षले आफ्नो व्यावसायिक तथा वित्तीय इतिहास, आगामी १० वर्षको क्लब सञ्चालन योजना र सामाजिक विश्वसनीयतासम्बन्धी विवरण पेस गर्नुपर्नेछ।

यसैबीच, नेपाली फुटबललाई व्यावसायिक दिशातर्फ अघि बढाउने लक्ष्यसहित एनएफएलको पहिलो संस्करण आगामी फागुन १ गतेदेखि सञ्चालन हुने घोषणा भइसकेको छ।

एनएफएलको पहिलो संस्करणमा घरेलु फुटबलका सात पुराना क्लबले यसअघि नै खेल्ने पक्का भइसकेको छ। हाल लिगमा काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, पोखरा थन्डर्स, बुटवल लुम्बिनी फुटबल क्लब, धनगढी एफसी र झापा एफसी छन्।

रंगशालाको उपलब्धताका आधारमा प्रतियोगिता ‘होम एन्ड अवे’ प्रणालीमा सञ्चालन गर्ने योजना छ। तयारी अवधिसहित एनएफएल करिब चार महिना सञ्चालन हुनेछ।

क्रिकेटर दीपेन्द्रसिंह ऐरी नेपालका लागि फ्रीमांसको ब्रान्ड एम्बेसडर नियुक्त

Fri, 30 Oct 2026 17:55:00 +0545

काठमाडौं । भारतीय उपमहाद्वीपमा मेजरिंग टुल्स उत्पादन गर्ने अग्रणी तथा सबैभन्दा ठूला उत्पादकमध्ये एक फ्रीमांसले चर्चित नेपाली क्रिकेटर दीपेन्द्रसिंह ऐरीलाई नेपाली मार्केटका लागि आफ्नो ब्रान्ड एम्बेसडर नियुक्त गरेको छ ।

यो सहकार्य फ्रीमांसको नेपाल आगमनको एक महत्त्वपूर्ण उपलब्धि हो । यससँगै ब्रान्डले नेपालमा आफ्नो उपस्थिति थप बलियो बनाउँदै नेपाली मार्केटमा अग्रणी ब्रान्डका रूपमा स्थापित हुने लक्ष्य लिएको छ ।

यस साझेदारीमार्फत फ्रीमांसले नेपाली उपभोक्ता, खुद्रा विक्रेता तथा च्यानल पार्टनरहरूसँगको सम्बन्ध थप सुदृढ बनाउनुका साथै आफ्नो विस्तारित उत्पादन सूचीमा रहेका मेजरिंग टेप, पावर टुल्स तथा ह्याण्ड टुल्सप्रति जनचेतना फैलाउने र माग बढाउने लक्ष्य राखेको छ । आफ्नो बहुआयामिक खेल कौशल, निरन्तर उत्कृष्ट प्रदर्शन र प्रतिस्पर्धी भावनाका लागि परिचित दीपेन्द्र सिंह ऐरीमा फ्रीमांसले आफ्नो ब्रान्डको भावनासँग मेल खाने गुणहरू देखेको जनाएको छ ।

सटीकता, उत्कृष्ट कार्यसम्पादन, विश्वसनीयता र दृढ संकल्पजस्ता गुणहरू फ्रीमांसका पहिचान हुन् । नेपाली क्रिकेटप्रेमीसँग दीपेन्द्रको बलियो सम्बन्धका कारण उनलाई उपभोक्ता तथा व्यावसायिक क्षेत्रका धेरै व्यक्तिहरूसम्म पुग्न चाहने फ्रीमांसका लागि उपयुक्त साझेदार बनाएको जनाइएको छ । यस सहकार्यका बारेमा प्रतिक्रिया दिँदै एफ एम आई लिमिटेड (फ्रीमांस) का कार्यकारी निर्देशक साहिल नायरले भने, “फ्रीमांसका लागि नेपाल एक महत्त्वपूर्ण र रणनीतिक मार्केट हो । हाम्रो लक्ष्य यहाँ आफ्ना उत्पादन उपलब्ध गराउनु मात्र होइन । हामी नेपाललाई बुझ्ने, नेपाली मार्केटप्रति प्रतिबद्ध र आफ्ना साझेदार एवम् ग्राहकहरूको विकासमा सक्रिय योगदान पुर्‍याउने ब्रान्डका रूपमा आफ्नो पहिचान बनाउन चाहन्छौँ ।

दीपेन्द्रसिंह ऐरीले महत्त्वाकांक्षी, मेहनती र उत्कृष्ट प्रदर्शनमा विश्वास गर्ने नयाँ पुस्ताको नेपालको सशक्त प्रतिनिधित्व गर्छन् । उनलाई फ्रीमांस परिवारमा स्वागत गर्न पाउँदा हामी अत्यन्त खुसी छौँ । साथै, हामीले उनीसँगको यो सहकार्य अर्थपूर्ण र दीर्घकालीन बन्ने अपेक्षा गरेका छौँ ।” दीपेन्द्र सिंह ऐरीले भने, “फ्रीमांससँग जोडिन पाउँदा म निकै खुसी छु । गुणस्तर, सटीकता र विश्वसनीयताका लागि परिचित यस ब्रान्डसँग यसको नेपाली बजारको यात्रामा हिस्सा बन्न पाउँदा उत्साहित छु । मैले फ्रीमांस सँगको सहकार्य मार्फत नेपाली उपभोक्ता र व्यवसायीहरूसँग यस ब्रान्डको सम्बन्ध स्थापित गर्न योगदान पुर्‍याउने अपेक्षा गरेको छु ।” फ्रीमांसले मेजरिंग टेपबाट आफ्नो उत्पादन रेन्ज विस्तार गर्दै आफ्नो पोर्टफोलियोमा स्पिरिट लेभल, मेजरिंग ह्वील, ह्याण्ड टुल्स, प्रेसिजन मेजरिंग टुल्स, डिजिटल मेजरिंग टुल्स तथा पावर टुल्स एक्सेसरिज समेत समेटेको छ । यसबाट कम्पनीले व्यावसायिक क्षेत्रका विज्ञ, प्राविधिक कामदार तथा आम उपभोक्ताका लागि आवश्यक पर्ने विभिन्न समाधानहरू उपलब्ध गराउँदै आएको छ ।

बलियो वितरण सञ्जाल र अन्तर्राष्ट्रिय मार्केटमा स्थापित उपस्थिति भएको फ्रीमांस अहिले नेपालमा आफ्नो पहुँच र संलग्नता थप विस्तार गर्दै डिलर, खुद्रा विक्रेता तथा उपभोक्ताबीचको सम्बन्धलाई अझ सुदृढ बनाउन केन्द्रित छ । दीपेन्द्रसिंह ऐरीसँगको साझेदारीले स्थापित टुल्स ब्रान्डप्रतिको विश्वास र नेपालका चर्चित खेलाडीको लोकप्रियता तथा पहुँचलाई एकसाथ जोड्दै यस यात्रामा महत्त्वपूर्ण भूमिका खेल्ने अपेक्षा गरिएको छ ।

सलिको गल्फ प्रतियोगिताको मिति परिवर्तन, अब नोभेम्बर १४ मा हुने

Fri, 30 Oct 2026 17:20:00 +0545

काठमाडौं । सगरमाथा लुम्बिनी इन्स्योरेन्स कम्पनी लिमिटेड (सलिको) ले आयोजना गर्न लागेको ‘सलिको गल्फ प्रतियोगिता २०२६’ को मिति परिवर्तन गरेको छ ।

अक्टोबर ३१ (शनिबार) मा गोकर्ण फरेस्ट रिसोर्टमा आयोजना हुने तय भएको प्रतियोगिता प्रतिकूल मौसमका कारण स्थगित गरिएको कम्पनीले जनाएको छ ।

कम्पनीका अनुसार प्रतियोगिता अब नोभेम्बर १४ (शनिबार) मा सोही स्थान गोकर्ण फरेस्ट रिसोर्टमा आयोजना हुनेछ ।

हालै देशमा देखिएको प्रतिकूल मौसमका कारण प्रतियोगिताको मिति परिवर्तन गर्नुपरेको भन्दै कम्पनीले यसबाट सम्बन्धित सबैमा पर्न गएको असुविधाप्रति क्षमायाचना गरेको छ ।

प्रतियोगिताप्रति उत्साह, चासो र सहयोग देखाउने सबैप्रति आभार व्यक्त गर्दै कम्पनीले नयाँ मितिमा पनि सक्रिय सहभागिता र निरन्तर साथको अपेक्षा गरेको छ ।

इसेवाले वन्यजन्तु रेड पान्डा (हाब्रे) को बासस्थान संरक्षणमा सहयोग गर्ने

Fri, 30 Oct 2026 15:48:00 +0545

नेपालको अग्रणी डिजिटल भुक्तानी सेवा प्रदायक इसेवाले नेपाल प्रिमियर लिग (एनपीएल) २०२६ मार्फत दुर्लभ तथा सङ्‌कटापन्न वन्यजन्तु रेड पान्डा (हाब्रे) को बासस्थान संरक्षणमा सहयोग गर्ने भएको छ ।

‘एभ्री बाउन्ड्री काउन्ट्स’ अभियानअन्तर्गत इसेवाले एनपीएलमा प्रहार हुने प्रत्येक छक्काबापत रु. २,००० र प्रत्येक चौकाबापत रु. १,००० रकम (करसहित अधिकतम सीमा रु. १० लाखसम्म) योगदान गर्नेछ ।

एनपीएलको आधिकारिक टिकटिङ साझेदारसमेत रहेको इसेवाले रेड पान्डा नेटवर्क तथा रेड पान्डा नेटवर्क नेपालसँगको सहकार्यमा प्रतियोगितामा प्रहार हुने प्रत्येक चौका र छक्काबापत रेड पान्डाको बासस्थान संरक्षण कार्यका लागि उक्त रकम योगदान गर्ने भएको हो । यस सम्बन्धमा इसेवा, रेड पान्डा नेटवर्क तथा रेड पान्डा नेटवर्क नेपालबीच त्रिपक्षीय साझेदारी भएको हो । एनपीएलमा प्रहार हुने बाउन्ड्रीबापत इसेवाले योगदान दिने रकम रेड पान्डाको प्राकृतिक बासस्थान पुनर्स्थापना तथा स्थानीय समुदायका लागि रोजगारी सिर्जना गर्न उपयोग गरिनेछ । अन्तर्राष्ट्रिय प्रकृति संरक्षण सङ्‌घ (आइयूसीएन) को रातो सूचीमा सङ्‌कटापन्न प्रजातिका रूपमा सूचीकृत रेड पान्डाको संरक्षणका लागि बासस्थानको सुरक्षा र पुनर्स्थापना महत्त्वपूर्ण मानिन्छ ।

यस अभियानअन्तर्गत रेड पान्डाको बासस्थान रहेको इलाम तथा पाँचथरका सामुदायिक वन क्षेत्रमा सन् २०२७ को जुन-जुलाईमा संरक्षण तथा वृक्षरोपण कार्यक्रम सञ्चालन गर्ने लक्ष्य राखिएको छ । यसअन्तर्गत स्थानीय प्रजातिका बिरुवा रोप्ने, रोपिएका बिरुवाको संरक्षण तथा हेरचाह गर्ने र वन्यजन्तुमैत्री वातावरण पुनर्स्थापना गर्ने कार्यहरू समावेश हुनेछन् । यस अभियानअन्तर्गत करिब १० हेक्टर क्षतिग्रस्त बासस्थान पुनर्स्थापना गर्ने, १० हजार स्थानीय प्रजातिका बिरुवा रोप्ने र स्थानीय समुदायका लागि करिब ६०० श्रमदिन बराबरको पारिश्रमिकसहितको रोजगारी सिर्जना गर्ने लक्ष्य राखिएको छ । रोजगारीका अवसरमा महिलालाई प्राथमिकता दिइनेछ ।

अभियानबारे जानकारी दिँदै इसेवाका प्रमुख रणनीति अधिकृत रवि शाक्यले नेपाल प्रिमियर लिग सम्पूर्ण क्रिकेटप्रेमीका लागि ठुलो उत्सव भएको बताउँदै खेलको यही उत्साहलाई प्रकृति संरक्षणमा रूपान्तरण गर्ने प्रयास गरिएको बताउनुभयो । “नेपाल प्रिमियर लिग देशभरका क्रिकेटप्रेमीका लागि एउटा ठुलो उत्सव हो । एनपीएलमा प्रहार हुने हरेक चौका र छक्काबापत रेड पान्डाको बासस्थान संरक्षणमा सघाउँदै खेलको उत्साहलाई प्रकृति संरक्षणमा रूपान्तरण गर्ने प्रयास गरेका छौँ,” शाक्यले भन्नुभयो, “यस अभियानमार्फत खेलकुदको सकारात्मक प्रभावद्वारा जैविक विविधताको संरक्षण र स्थानीय समुदायको जीविकोपार्जनमा सहयोग पुर्‍याउने हाम्रो लक्ष्य छ । क्रिकेटप्रेमीको यो साझा उत्सवले संरक्षणको क्षेत्रमा पनि अर्थपूर्ण योगदान पुर्‍याउने विश्वास लिएका छौँ ।” यसै गरी, रेड पान्डा नेटवर्कका कार्यकारी निर्देशक आङ फुरी शेर्पाले क्रिकेटको लोकप्रियतालाई रेड पान्डा संरक्षणसँग जोड्न इसेवासँग सहकार्य गर्न पाउँदा खुसी व्यक्त गर्दै यसले संरक्षण र समुदायको हितमा काम गर्न थप प्रोत्साहन मिलेको बताउनुभयो ।

त्यस्तै, रेड पान्डा नेटवर्क नेपालका अध्यक्ष डा. शैलेन्द्रबहादुर थकालीले क्रिकेटको ऊर्जालाई रेड पान्डाको भविष्यसँग जोडेकोमा इसेवाप्रति आभार व्यक्त गर्दै यस सहकार्यले रेड पान्डाको बासस्थान संरक्षण र हरित रोजगारी सिर्जनामा महत्त्वपूर्ण योगदान पुग्ने विश्वास व्यक्त गर्नुभयो । यस अभियानले खेलकुदमार्फत जैविक विविधताको संरक्षणमा योगदान पुर्‍याउनुका साथै संरक्षण क्षेत्रमा स्थानीय समुदायको सहभागिता र जीविकोपार्जनका अवसर सिर्जनामा समेत टेवा पुग्ने इसेवाको विश्वास रहेको छ ।

एनपीएल अवधिभर प्रत्येक चौका र छक्काबाट जम्मा भएको योगदानको विवरण इसेवाको वेबसाइट तथा सामाजिक सञ्जालमार्फत सार्वजनिक गरिनेछ। यस अभियानमार्फत इसेवाले डिजिटल भुक्तानीको दायरालाई वातावरण संरक्षण र समुदायको हितसँग जोड्दै जिम्मेवार व्यावसायिक अभ्यासलाई निरन्तरता दिने जनाएको छ ।

सोमपालले ‘प्लेयर अफ द म्याच’को पुरस्कार रकम सडक जनावरको हेरचाह गर्दै आएकी सिर्जनालाई दिने

Fri, 30 Oct 2026 14:03:00 +0545

काठमाडौं । नेपाल प्रिमियर लिग (एनपीएल) मा विराटनगर किंग्सविरुद्धको खेलमा जित निकालेपछि कर्णाली याक्सका कप्तान सोमपाल कामीले ‘प्लेयर अफ द म्याच’ बापत पाएको पुरस्कार रकम दान गर्ने घोषणा गरेका छन्।

शुक्रबार उनले पुरस्कारस्वरूप पाएको शतप्रतिशत रकम सडकमा रहेका जनावरको हेरचाह र सुरक्षाका लागि काम गर्दै आएकी सिर्जना ठकुरीलाई दिने बताएका हुन्।

कप्तान कामीले सामाजिक सञ्जालमार्फत व्यक्तिगत उपलब्धिभन्दा कर्णाली याक्सलाई जित दिलाउन योगदान गर्न पाउनु ठुलो कुरा भएको बताएका छन्। कठिन समयमा आफूलाई साथ दिने र विश्वास गर्ने सबैप्रति उनले आभार व्यक्त गरेका छन्।

‘यो जर्सी लगाएर यस फ्रेन्चाइजका लागि खेल्नु र संघर्ष गर्नु मेरो लागि ठुलो सम्मानको कुरा हो। तर महानता बाँड्दा अझ बढ्छ,’ उनले लेखेका छन्। कामीले पुरस्कारको रकम जनावरको संरक्षणमा सहयोग गर्न पाउँदा खुसी लागेको बताएका छन्।

‘हरेक सानो पाइला (वा पन्जा) को महत्त्व हुन्छ,’ उनले लेखेका छन्। बिहीबार भएको खेलमा कर्णाली याक्सले विराटनगर किंग्सलाई ४ विकेटले हराएको थियो। विराटनगरले दिएको १८६ रनको लक्ष्य कर्णालीले १९.५ ओभरमा ६ विकेट गुमाएर पूरा गरेको थियो।

कर्णालीको जितमा सोमपालले अलराउन्ड प्रदर्शन गरेका थिए। उनले बलिङमा ४ ओभरमा ३३ रन खर्चेर ४ विकेट लिएका थिए भने ब्याटिङमा ३२ बलमा अविजित ६२ रन बनाएका थिए। कर्णालीले ५७ रनमा ५ विकेट गुमाएर कठिन अवस्थामा पुगेका बेला सोमपालले टोलीलाई जितसम्म पुर्‍याएका थिए।

एनपीएलका ६ खेलमा नेपाली खेलाडीको दबदबा, ६ खेलका 'प्लेयर अफ द म्याच' सबै नेपाली खेलाडी

Fri, 30 Oct 2026 13:12:00 +0545

काठमाडौं। नेपाल प्रिमियर लिग (एनपीएल) को तेस्रो संस्करणमा सम्पन्न सुरुआती ६ खेलका प्लेयर अफ द म्याच सबै नेपाली खेलाडी बनेका छन्। ब्याटिङ र बलिङमा प्रभावशाली प्रदर्शन गर्दै उनीहरूले आफ्नो टोलीको जितमा महत्त्वपूर्ण योगदान दिएका छन्।

उद्घाटन खेलमा लुम्बिनी लायन्सका शेर मल्लले सुदूरपश्चिम रोयल्सविरुद्ध ४ ओभरमा ११ रन खर्चेर ३ विकेट लिए। उनको प्रदर्शनमा लुम्बिनीले सुदूरपश्चिमलाई ८७ रनमा समेट्दै ७ विकेटको जित निकालेको थियो।

दोस्रो खेलमा चितवन राइनोजका कमलसिंह ऐरीले विराटनगर किङ्सविरुद्ध ४ ओभरमा २६ रन खर्चेर ४ विकेट लिए। उनको उत्कृष्ट बलिङमा चितवनले विराटनगरलाई ८ रनले पराजित गरेको थियो।

तेस्रो खेलमा कर्णाली याक्सका युनिशविक्रम सिंह ठाकुरीले जनकपुर बोल्ट्सविरुद्ध ४ ओभरमा २२ रन दिँदै ३ विकेट लिए। उनको बलिङमा कर्णालीले जनकपुरलाई १९ रनले हराएको थियो।

चौथो खेलमा सुदूरपश्चिम रोयल्सका कप्तान दीपेन्द्रसिंह ऐरीले पोखरा एभेन्जर्सविरुद्ध ३६ बलमा अविजित ५१ रन बनाए। उनले बलिङमा पनि २१ रन खर्चेर १ विकेट लिए। उनको अलराउन्ड प्रदर्शनमा सुदूरपश्चिमले ६ विकेटको जित निकालेको थियो।

पाँचौँ खेलमा जनकपुर बोल्ट्सका १७ वर्षीय राहुल यादवले काठमाडौं गोर्खाजविरुद्ध ४ ओभरमा ३१ रन खर्चेर ४ विकेट लिए। उनको प्रभावशाली बलिङमा काठमाडौं १९.३ ओभरमा ११५ रनमा समेटियो। जवाफमा जनकपुरले ११६ रनको लक्ष्य १७.२ ओभरमा २ विकेट गुमाएर पूरा गर्दै प्रतियोगितामा पहिलो जित निकाल्यो।

छैटौँ खेलमा कर्णाली याक्सका कप्तान सोमपाल कामीले विराटनगर किङ्सविरुद्ध अलराउन्ड प्रदर्शन गर्दै टोलीलाई लगातार दोस्रो जित दिलाए। उनले बलिङमा ४ ओभरमा ३३ रन खर्चेर ४ विकेट लिए भने ब्याटिङमा ३२ बलमा अविजित ६२ रन बनाए। चार चौका र तीन छक्का प्रहार गरेका सोमपालको प्रदर्शनमा कर्णालीले १८७ रनको लक्ष्य १९.५ ओभरमा ६ विकेट गुमाएर पूरा गर्दै विराटनगरलाई ४ विकेटले हरायो।

सुरुआती खेलमा बलरहरूको प्रभावशाली प्रदर्शन र अलराउन्डरहरूको निर्णायक योगदानले एनपीएलमा नेपाली खेलाडीको क्षमता उजागर गरेको छ।

अफ्रिका महादेशमा पहिलो पटक ओलम्पिक खेलाउने दाउमा दक्षिण अफ्रिका

Fri, 30 Oct 2026 09:58:00 +0545

अफ्रिकामा पहिलो ओलम्पिक आयोजना गर्न दक्षिण अफ्रिकाले डर्बन सहरलाई प्राथमिकता दिएको छ।

दक्षिण अफ्रिकाले सन् २०३६ वा २०४० को ग्रीष्मकालीन ओलम्पिक तथा पाराओलम्पिक आयोजनाका लागि दाबी (बिड) प्रस्तुत गरिरहेको छ। अन्तर्राष्ट्रिय ओलम्पिक समिति (आइओसी) ले सन् २०२९ को मध्यतिर सन् २०३६ को ओलम्पिक आयोजक सहरको छनोट गर्नेछ।

दक्षिण अफ्रिकाको तेस्रो ठूलो सहर डर्बनलाई अघि सार्ने निर्णयको घोषणा बिहीबार दक्षिण अफ्रिकी स्पोर्ट्स कन्फेडेरेसन, ओलम्पिक तथा प्यारालिम्पिक कमिटीकी कार्यवाहक अध्यक्ष लवान्डिले सिमेलानेले गरेकी हुन्। उनले दक्षिण अफ्रिकाको दाबीका लागि डर्बन मुख्य सहर हुने तर यो सम्भवतः बहुसहरीय दाबी (मल्टी-सिटि बिड) हुने बताइन्, जसमा केही खेलकुद प्रतियोगिताहरू अन्य सहरहरूमा पनि आयोजना गर्ने प्रस्ताव समावेश गरिनेछ।

दक्षिण अफ्रिकाका आर्थिक केन्द्रहरू जोहानेसबर्ग र केप टाउनलाई पनि सम्भावित सहरका रूपमा विचार गरिएको थियो।

हिन्द महासागरको तटमा अवस्थित र करिब ४० लाख जनसङ्ख्या भएको डर्बनमा एक दशकभन्दा बढी समयअघि (सन् २०१० मा अफ्रिकामा पहिलो पटक फुटबल विश्वकप आयोजना गरेपछि) ओलम्पिक आयोजक सहरका रूपमा चर्चा गरिएको थियो। तर, मुख्यतया लागतसम्बन्धी चिन्ताका कारण त्यतिबेला औपचारिक दाबी अघि बढ्न सकेन। सन् २०२२ को कमनवेल्थ गेम्स आयोजना गर्ने जिम्मेवारी पनि यो सहरबाट खोसिएको थियो किनकि यसले उक्त प्रतियोगिताका लागि आवश्यक आर्थिक वा अन्य किसिमका ग्यारेन्टीहरू प्रदान गर्न सकेको थिएन।

अधिकारीहरूले बिहीबार बताएअनुसार यदि दक्षिण अफ्रिकाको दाबी सफल भएमा त्यहाँ ओलम्पिक आयोजना गर्न कति खर्च लाग्छ भन्ने यकिन अनुमान उनीहरूले अहिले नै दिन सकेका छैनन्। उनीहरूले जनाएअनुसार डर्बनको दाबी ५६,००० सिट क्षमता भएको 'मोसेस माभिदा स्टेडियम' मा केन्द्रित हुनेछ, जुन सन् २०१० को विश्वकपका लागि निर्माण गरिएको थियो।

सन् २०३६ को खेलकुद प्रतियोगिता आयोजना गर्न दाबी प्रस्तुत गर्ने सात राष्ट्रमध्ये दक्षिण अफ्रिका पनि एक हो। अन्य राष्ट्रहरूमा भारत, कतार, दक्षिण कोरिया, जर्मनी, हंगेरी र टर्की रहेका छन्।

अन्तर्राष्ट्रिय ओलम्पिक समिति (आइओसी) ले सन् २०३६ को खेलकुद आयोजना गर्न इच्छुक राष्ट्रिय ओलम्पिक समितिहरूलाई आफ्नो दाबी औपचारिक रूपमा प्रस्तुत गर्न अक्टोबर ३१ सम्मको समयसीमा तोकेको छ।

आधिकारिक दाबी प्रक्रिया सुरु गर्नका लागि उम्मेदवारहरूले अर्को महिना आइओसीसमक्ष भर्चुअल प्रस्तुति दिने अवसर पाउनेछन्। आइओसीका अनुसार मार्च महिनामा एक महत्त्वपूर्ण मिति आउँदैछ, जतिबेला समितिको बोर्डले उम्मेदवारहरूको छनोट सूची (सर्टलिस्ट) लाई अनुमोदन गर्नेछ।

यदि दक्षिण अफ्रिकाले आयोजनाको अवसर पायो भने सन् १८९६ मा आधुनिक ओलम्पिकको सुरुवात भएयता ग्रीष्मकालीन ओलम्पिक आयोजना गर्ने यो पहिलो अफ्रिकी राष्ट्र बन्नेछ। अफ्रिकाको सबैभन्दा ठूलो अर्थतन्त्र भएको यस मुलुकले यसअघि केप टाउनमा सन् २००४ को खेलकुद आयोजना गर्न गरेको प्रयास असफल भएको थियो।

यसै साताको अन्त्यमा सेनेगलको डाकारमा 'युथ ओलम्पिक' (यूथ ओलम्पिक गेम्स) सुरु हुँदैछ; अफ्रिकामा आयोजना हुन लागेको यो पहिलो ओलम्पिक खेलकुद प्रतियोगिता हो।

एनपीएलमा आज ब्रेक

Fri, 30 Oct 2026 09:22:00 +0545

काठमाडौं। तेस्रो संस्करणको नेपाल प्रिमियर लिग (एनपीएल) मा आज शुक्रबार कुनै पनि खेल राखिएको छैन।

भोलि शनिबार भने दुई खेल हुँदैछन्। त्रिवि क्रिकेट मैदान कीर्तिपुरमा बिहान साढे १२ बजे हुने पहिलो खेलमा लुम्बिनी लायन्स र चितवन राइनोजबीच प्रतिस्पर्धा हुँदै छ।

दोस्रो खेलमा साँझ ५ बजेसुदूरपश्चिम रोयल्स र बिराटनगर किंग्स भिड्दैछन्।

एनपीएलमा राहुलको सनसनी

Fri, 30 Oct 2026 08:20:00 +0545

काठमाडौं । नेपाल प्रिमियर लिग (एनपीएल) को तेस्रो संस्करणमा जनकपुर बोल्ट्सबाट खेलिरहेका १७ वर्षीय बलर राहुल यादवले सनसनीपूर्ण प्रदर्शन गरेका छन् ।

यादवले सुरुआती दुई खेलमै प्रभावशाली प्रदर्शन गर्दै क्रिकेटप्रेमीको ध्यान खिचेका हुन् । दायाँहाते मध्यम गतिका बलर यादवले दुई खेलमा कुल ६ विकेट लिएपछि उनी एनपीएलका नयाँ सनसनीका रूपमा देखिएका छन् ।

यादवले पहिलो खेलमै आफ्नो बलिङ क्षमता प्रमाणित गरेका थिए । उनले चार ओभरमा १५ रन मात्रै खर्चेर दुई विकेट लिएका थिए । उक्त खेलमा उनले हुसेन तलात र दीपक डुम्रेलाई आउट गर्दै जनकपुर बोल्ट्सका लागि महत्वपूर्ण योगदान दिएका थिए । कम रन खर्चेर दुई महत्वपूर्ण विकेट लिन सफल भएपछि उनको प्रदर्शन चर्चामा आएको थियो ।

दोस्रो खेलमा भने यादवले अझ उत्कृष्ट बलिङ गरे । उनले चार ओभरमा ३१ रन खर्चेर चार विकेट लिए । यस क्रममा उनले स्मित पटेल, साम हेजलेट, करण केसी र आदिल आलमलाई पवेलियन फर्काएका थिए । एकै खेलमा चार विकेट लिएपछि यादवले आफ्नो बलिङ क्षमता र दबाबमा प्रदर्शन गर्न सक्ने खुबी देखाएका छन् ।

एनपीएलमा केवल दुई खेल खेलेका यादवले अहिलेसम्म ६ विकेट लिइसकेका छन् । १७ वर्षको उमेरमै अनुभवी ब्याटरहरूविरुद्ध प्रभावशाली बलिङ गरेका उनले प्रतियोगितामा आफ्नो सम्भावना देखाएका छन् । यही प्रदर्शनलाई निरन्तरता दिन सके यादव जनकपुर बोल्ट्सका महत्वपूर्ण बलर बन्नुका साथै नेपाली क्रिकेटमा उदाउँदो प्रतिभाका रूपमा स्थापित हुन सक्ने विश्लेषण हुन शुरु भएको छ ।

रोनाल्डोको ह्याट्रिकमा अल नासरको शानदार जित

Fri, 30 Oct 2026 08:16:00 +0545

काठमाडौं । पोर्चुगिज स्टार क्रिस्टियानो रोनाल्डोले उत्कृष्ट प्रदर्शन गर्दै ह्याट्रिक गरेपछि अल नासरले साउदी प्रो लिगमा अल खोलुदलाई ५–३ गोलले पराजित गरेको छ ।

गएराति भएको खेलमा रोनाल्डोले दोस्रो हाफमा लगातार तीन गोल गर्दै टोलीको जित सुनिश्चित गरेका हुन् ।

यस ह्याट्रिकसँगै उनको व्यावसायिक फुटबल करियरमा गोल संख्या ९८५ पुगेको छ । खेलको सुरुवात भने अल नासरका लागि सहज रहेन ।

अल खोलुदका जुलियन डोमिन्गेजले १६औँ मिनेटमा गोल गर्दै पाहुना टोलीलाई अग्रता दिलाएका थिए । तर अल नासरका एन्जेलो गाब्रिएलले २४औँ मिनेटमा गोल गर्दै खेल बराबरीमा ल्याए । त्यसपछि साडियो मानेले ३८औँ मिनेटमा गोल गर्दै अल नासरलाई २–१ को अग्रता दिलाए ।

पहिलो हाफको अतिरिक्त समयमा एन्टोइन एसोम्बाले गोल गरेपछि दुवै टोली २–२ को बराबरीमा रहे । दोस्रो हाफमा भने रोनाल्डोले खेल आफ्नो नियन्त्रणमा लिए । उनले ६६औँ मिनेटमा जोआओ फेलिक्सको पासमा गोल गर्दै अल नासरलाई ३–२ को अग्रता दिलाए । त्यसको ६ मिनेटपछि नै फेलिक्सकै अर्को उत्कृष्ट पासमा हेडरमार्फत गोल गर्दै रोनाल्डोले टोलीको अग्रता ४–२ पुर्‍याए । ८१औँ मिनेटमा रोनाल्डोले व्यक्तिगत तेस्रो गोल पूरा गरे । साडियो मानेले उपलब्ध गराएको पासलाई सदुपयोग गर्दै उनले गोल गरेका थिए ।

यससँगै रोनाल्डोले खेलमा ह्याट्रिक पूरा गर्नुका साथै आफ्नो करियरको गोल संख्या ९८५ पुर्‍याए । उनी करियरमा एक हजार गोलको ऐतिहासिक उपलब्धि हासिल गर्न अब १५ गोल मात्र टाढा छन् । जितसँगै अल नासरले ११ खेलबाट २८ अंक जोडेको छ र लिगमा दोस्रो स्थानमा छ ।

त्यस्तै अल खोलुदको भने ११ खेलमा १२ अंक रहेको छ र लिगमा १०औं स्थानमा छ ।