खुकुरी च्यालेञ्जर्स कपमा शान्तिनगर र केसीटीसी विजयी
- नेप्लेज
- |
- २०७४-१०-१४
- |
- 147 पटक हेरिएको
माघ १४, काठमाडौं । काठमाडौंमा जारी खुकुरी च्यालेञ्जर कप टि–२० क्रिकेट प्रतियोगिता अन्तर्गत आइतबार शान्तिनगर युथ क्लब र काठमाडौं क्रिकेट ट्रेनिङ सेन्टर केसीटीसी विजयी भएका छन् ।
मुलपानी स्थित क्रिकेट मैदानमा सम्पन्न पहिलो खेलमा शान्तिनगरले अल्टिमेट इन्डोर क्रिकेटलाई ३६ रनले हरायो ।
टस हारेर ब्याटिङको निम्तो पाएको शान्तिनगरले २० ओभरमा ९ विकेट गुमाउँदै १३६ रन बनाएको थियो । शान्तिनगरका लागि मन्जित श्रेष्ठले ४१, पुरुषोत्तम झाले ३१ त्था सुनिल धमलाले २३ रनको योगदान दिए ।
ब्लिङ तर्फ कृष्णसिंह नेगीले ४, जितेन्द्र यादवले ३ तथा नरेश थापाले २ विकेट लिए ।
१३७ रनको लक्ष्य पछ्याएको अल्टिमेट ६ विकेटको क्षतिमा १०० रनमा समेटियो । उसका लागि किरण ठगुन्नाले ५० रनको योगदान दिए भने अन्य खेलाडीले राम्रो प्रदर्शन गर्न सकेनन् ।
अल्टिमेटलाई कम स्कोरमा रोक्नका लागि सुनिल धमलाले २ विकेट लिए ।
अर्को खेलमा केसीटीसीले प्युउठान च्यालेञ्जर्सलाई ७ रनले हरायो । पहिला ब्याटिङ गर्दै केसीटीसी ५ विकेटको क्षतिमा १४७ रन बनाएको थियो ।
सो लक्ष्य पछ्याउने क्रममा प्युठान च्यालेञ्जर्स १४० रनमा समेटियो । प्रेम तामाङले ५८ रन र राजवीर सिंहले ४७ रनको योगदान दिएपनि टिमलाई जित दिलाउन सकेनन् ।
पहिलो जित निकाल्दै केसीटीसीले ४ अंक जोड्दा शान्तिनगर युथ क्लब ७ अंक सहित समुह एको शीर्ष स्थानमा छ । प्युठानले पनि एक खेलमात्र जितेको छ ।