डीपीएलमा काठमाडौको लगातार दोस्रो र चौराहाको पहिलो जित
- नेप्लेज
- |
- २०७४-१२-१९
- |
- 250 पटक हेरिएको
नेप्लेज, १९ चैत्र । काठमाडौ गोल्डेन्सले धनगढीमा जारी धनगढी प्रिमियर लिग डिपिएलमा लगातार दोस्रो जित निकालेको छ ।
लिगको दोस्रो खेलमा काठमाडौले रुपन्देही च्यालेञ्जर्सलाई ६३ रनले पराजित गर्यो ।
टस जितेर पहिले ब्याटिङ गरेको काठमाडौले २० ओभरमा ४ विकेट गुमाउदै एक सय ८६ रन बनायो ।
बलियो सुरुवात गरेको काठमाडौका विदेशी खेलाडी सुबोध भाटी ४२ रनमा आउट हुँदा ६५ रनमा पहिलो विकेट गुमायो ।
त्यसपछि चौराहालाई हराउँदा नायक बनेका अमित श्रेष्ठ ३० रनमा पेभेलियन फर्किएपछि काठमाडौले ७४ रनमा दोस्रो विकेट खेर फाल्यो ।
काठमाडौको मिडलअडरका खेलाडलाई पनि राम्रो प्रदर्शन गरे । सन्नी पटेलले अविजीत ४८ रन बनाए भने नरेश बुढाऐरले ३० तथा कप्तान ज्ञानेन्द्र मल्लले २० रन बनाए । यस्तै भुपेन्द्र थापाले १४ रन थपे ।
जवाफमा लगातार दोस्रो हार ब्यहोर्ने क्रममा रुपन्देही १८ ओभर ४ बलमा मात्र एक सय २३ रनमा अलआउट भयो ।
दरिलो सुरुवात गरेको रुपन्देहीले पहिलो विकेटका लागि ७१ रनको साझेदारी गरेको थियो । तर त्यसपछि अरु ५२ रन थप्दा उसले सबै विकेट गुमायो ।
रुपन्देहीका ओपनर प्रदिप ऐरीले ५७ तथा सागर पुनले १८ रन बनाउनु बाहेक बाकि खेलाडी एकोहोरो रुपमा आउट भए ।
उसको मिडिलअडर पुर्ण रुपमा ध्वस्त भयो । रुपन्देहीलाई कम स्कोरमा रोक्न रासिद खानले ४ तथा ललित राजवंशीले ३ विकेट लिए ।
दुई खेल हारेपछि रुपन्देहीलाई शिर्ष चारमा पुग्न दबाव बढेको छ ।
चौराहाको पहिलो जित
कप्तान सोमपाल कामीको कप्तानी पारीका कारण धनगढी टिम चौराहाले प्रतियोगितामा पहिलो जित निकालेको छ ।
पहिलो खेलमा काठमाडौ गोल्डेनसँग ७ विकेटले पराजित भएको चौराहाले आज अत्तरीयालाई ३ विकेटले हरायो ।
टस हारेर ब्याटिङको निम्तो पाएको अत्तरीयाले निर्धारीत २० ओभरमा आठ विकेट गुमाउँदै एक सय ५० रन बनायो ।
उसका लागि प्रेम तामाङ र बिपिन चन्दले समान २८–२८ रन बनाए । यस्तै कुशल भुर्तेलले २५ तथा दिपेन्द्र ऐरीले १९ रन जोडे ।
यस्तै कृष्ण कार्कीले १४ रन बनाउदा कप्तान सुवास खकुरेल र गौरभ चितकाराले १३–१३ रनको योगदान गरे ।
१७ रन हुँदा पहिलको विकेट गुमाएको अत्तरीयाले ७२ रन हुदा ४ विकेट खेर फालेको थियो । उसका कुनै पनि खेलाडी विच दरीलो साझेदारी नभएपनि उसले राम्रो लक्ष्य दिन सफल भयो ।
बलिङ तर्फ ललीतराज भण्डारीले तीन विकेट लिए ।
जवाफमा चौराहाले १९ ओभर २ बलमा सात विकेट गुमाउँदै लक्ष्य पुरा गर्यो ।
१९ रन हुँदा दुई विकेट गुमाइसकेको चौराहाले ४६ रन हँदा ४ विकेट खेर फालेको थियो । तर कप्तान सोमपाल कामीले विस्फोटक ३८ रनको पारी खेल्दा चौराहाले जित निकाल्न सफल भयो ।
उसका लागि अरु खेलाडीमा विदेशी खेलाडी रोहन मुस्तफाले ४० रन बनाए भने राजेश पुलामी मगरले २५ रनको योगदान गरे ।
यी दुई खेलाडीले पाचौ किवेटका लागि ४१ रनको साझेदारी गरेका थिए । यस्तै अस्फाक अहमदले १० रन जोडे । प्रतियोगितामा अत्तरीयाको पहिलो हार हो ।